(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ នៅថ្ងៃព្រហស្បតិ៍ ទី៨ ខែតុលា ឆ្នាំ២០២៦ បានច្រានចោលលទ្ធភាពបើកការវាយប្រហារសាជាថ្មីលើអ៉ីរ៉ង់ នៅមុនការបោះឆ្នោតពាក់កណ្ដាលអាណត្តិរបស់សហរដ្ឋអាមេរិក នៅថ្ងៃទី៣ ខែវិច្ឆិកាខាងមុខ ដោយនិយាយថាទីក្រុងវ៉ាស៊ីនតោនកំពុងមានកិច្ចពិភាក្សាដ៏ល្អជាមួយទីក្រុងតេហេរ៉ង់។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

ការបង្ហោះសារបែបនេះរបស់លោក ត្រាំ នៅលើបណ្ដាញទំនាក់ទំនងសង្គម Truth Social ធ្វើឡើងចំពេលតម្លៃប្រេងហក់ឡើងថ្លៃខ្ពស់ បន្ទាប់ពីប្រព័ន្ធផ្សព្វផ្សាយអាមេរិកនាំគ្នារាយការណ៍ពីលទ្ធភាពដែលសហរដ្ឋអាមេរិកអាចនឹងបើកការវាយប្រហារសាជាថ្មីលើអ៉ីរ៉ង់នៅមុនការបោះឆ្នោតពាក់កណ្ដាលអាណត្តិ។ «ខ្ញុំចង់បញ្ជាក់ឱ្យច្បាស់ទៅកាន់អ្នករាល់គ្នាថាខណៈអ៉ីរ៉ង់កំពុងស្ថិតនៅក្នុងស្ថានការណ៍ដ៏អាក្រក់ទាំងសេដ្ឋកិច្ច និងយោធា ហើយខណៈការបិទខ្ទប់នឹងបន្តអនុវត្តយ៉ាងពេញលេញ...យើងនឹងមិនបើកការវាយប្រហារលើអ៉ីរ៉ង់ក្នុងពេលណាមួយនៅមុនការបោះឆ្នោតពាក់កណ្ដាលអាណត្តិចូលមកដល់ នោះទេ»។ នេះជាការគូសបញ្ជាក់របស់លោក ត្រាំ ដោយបន្ថែមថាសហរដ្ឋអាមេរិកកំពុងមានកិច្ចពិភាក្សាដ៏ល្អជាមួយសាធារណរដ្ឋអ៉ីស្លាមអ៉ីរ៉ង់ តែលោកក៏មិនបានផ្ដល់ព័ត៌មានលម្អិតអ្វីនោះដែរ។

គួរបញ្ជាក់ថា ទស្សនាវដ្ដីអាមេរិក Atlantic បានរាយការណ៍កាលពីថ្ងៃពុធសប្ដាហ៍នេះថាសេតវិមានបានស្នើសុំឱ្យមន្ទីរបញ្ចកោណរៀបចំជម្រើសដើម្បីវាយប្រហារលើអ៉ីរ៉ង់ដែលជម្រើសទាំងនោះអាចនឹង ត្រូវបានប្រើប្រាស់នៅមុនការបោះឆ្នោតពាក់កណ្ដាលអាណត្តិ។ កាសែតអាមេរិក New York Times ក៏បានធ្វើសេចក្ដីរាយការណ៍ស្រដៀងគ្នានេះដែរកាលពីថ្ងៃព្រហស្បតិ៍ ដោយនិយាយថាជម្រើសនៃ ការវាយប្រហារលើអ៉ីរ៉ង់កំពុងត្រូវបានរៀបចំ បើទោះជាលោក ត្រាំ មិនទាន់ធ្វើការសម្រេចចិត្តចុងក្រោយក៏ដោយ៕