(អាសហ្កាបាត, តួកម៉េនីស្ថាន)៖ ប្រធានាធិបតីរុស្ស៉ី លោក វ្ល៉ាឌីមៀ ពូទីន នៅថ្ងៃព្រហស្បតិ៍ ទី៨ ខែតុលា ឆ្នាំ២០២៦ បានសន្យាថានឹងធ្វើអ្វីៗគ្រប់យ៉ាងដើម្បីជួយបិទបញ្ចប់សង្រ្គាមមជ្ឈិមបូព៌ា ក្នុងជំនួបជាមួយប្រធានាធិបតីអ៉ីរ៉ង់ លោក Masoud Pezeshkian មុនចូលរួមកិច្ចប្រជុំកំពូលថ្នាក់តំបន់មួយ។ នេះបើតាមប្រព័ន្ធផ្សព្វផ្សាយរុស្ស៉ី ដកស្រង់ចេញផ្សាយដោយទីភ្នាក់ងារសារព័ត៌មាន AFP។

មេដឹកនាំរុស្ស៉ី និងអ៉ីរ៉ង់ បានជួបគ្នា​បន្ទាប់ពីបានធ្វើដំណើរទៅដល់ប្រទេសតួកម៉េនីស្ថានដើម្បីចូលរួមក្នុងកិច្ចប្រជុំ Commonwealth of Independent States ឬហៅកាត់ថា CIS ដែលចាប់ផ្ដើមប្រព្រឹត្តទៅ នៅថ្ងៃសុក្រសប្ដាហ៍នេះ ក្នុងទីក្រុងរីសត Avaza នៃតំបន់សមុទ្រ Caspian។ តាមទីភ្នាក់ងារសារព័ត៌មានរុស្ស៉ី លោក ពូទីន បានគូសបញ្ជាក់ប្រាប់លោក Pezeshkian ថារុស្ស៉ីត្រៀមខ្លួនជាស្រេចដើម្បី ជួយសម្របសម្រួលបិទបញ្ចប់សង្រ្គាមក្នុងតំបន់មជ្ឈិមបូព៌ា។

«យើងត្រៀមខ្លួនជាស្រេចដើម្បីធ្វើអ្វីៗគ្រប់យ៉ាងដែលនៅក្នុងអំណាចរបស់យើង ដើម្បីចូលរួមចំណែកដោះស្រាយស្ថានភាពនេះ (សង្រ្គាមនៅមជ្ឈិមបូព៌ា)»។ នេះជាការលើកឡើងរបស់លោក ពូទីន។ លោក ពូទីនបានបន្ថែមថាអ៉ីរ៉ង់ពិតជាបានប្រឹងប្រែងយ៉ាងពិតប្រាកដសំដៅបិទបញ្ចប់សង្រ្គាម ចាប់តាំងពីការវាយប្រហាររបស់អាមេរិក និងអ៉ីស្រាអែលកាលពីថ្ងៃទី២៨ ខែកុម្ភៈ។ ព្រមពេលជាមួយគ្នា លោកប្រធានាធិបតីរុស្ស៉ីក៏បានកត់សម្គាល់ផងដែរពីការអភិវឌ្ឍប្រកបដោយភាពវិជ្ជមាននៅក្នុងទំនាក់ទំនងរវាងរុស្ស៉ី និងអ៉ីរ៉ង់។

គួរបញ្ជាក់ថា រុស្ស៉ី និងអ៉ីរ៉ង់បានពង្រឹងទំនាក់ទំនងកាន់តែជិតស្និទ្ធទាំងយោធា និងការទូត ចាប់តាំងពីរុស្ស៉ីបើកធ្វើសង្រ្គាមប្រឆាំងអ៊ុយក្រែនកាលពីខែកុម្ភៈ ឆ្នាំ២០២២ ពោលគឺបានធ្វើឱ្យប្រទេសទាំង២ ត្រូវពឹងផ្អែកលើគ្នាទៅវិញទៅមកកាន់តែខ្លាំងជាងមុន៕