(សេអ៊ូល)៖ ក្រសួងការបរទេសកូរ៉េខាងត្បូង នៅថ្ងៃព្រហស្បតិ៍ ទី៨ ខែតុលា ឆ្នាំ២០២៦ បានឱ្យដឹងថាកូរ៉េខាងត្បូងនឹងកោះហៅឯកអគ្គរដ្ឋទូតរបស់ខ្លួនប្រចាំអ៊ុយក្រែនត្រឡប់ទៅស្រុកវិញ បន្ទាប់ពីទីក្រុងសេអ៊ូល និងទីក្រុងកៀវផ្ទុះជម្លោះការទូតនឹងគ្នា ជុំវិញការទម្លាយជាសាធារណៈរបស់ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី ពាក់ព័ន្ធនឹងការផ្ទេរទាហានកូរ៉េខាងជើងជាឈ្លើយសឹក ២នាក់ ទៅកាន់កូរ៉េខាងត្បូង កាលពីពេលថ្មីៗនេះ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

កូរ៉េខាងត្បូង និងអ៊ុយក្រែនបានជាប់គាំងនៅក្នុងជម្លោះការទូត ក្រោយសេអ៊ូលបានចោទប្រកាន់ទីក្រុងកៀវថាបានបំពានលើកិច្ចព្រមព្រៀងសម្ងាត់រវាងប្រទេសទាំង២ ជុំវិញការផ្ទេរទាហានកូរ៉េខាងជើងដែលត្រូវបានចាប់ខ្លួនជាឈ្លើយសឹកដោយទាហានអ៊ុយក្រែន ទៅកាន់កូរ៉េខាងត្បូង។ ប៉ុន្តែអ៊ុយក្រែនបានប្រកែកថាមិនមានកិច្ចព្រមព្រៀងសម្ងាត់បែបនេះឡើយ។ ក្រសួងការបរទេសកូរ៉េខាងត្បូងបាននិយាយថាខ្លួន សង្ឃឹមថាបញ្ហាបច្ចុប្បន្នរវាងប្រទេសទាំង២ អាចនឹងត្រូវបានដោះស្រាយ ហើយថាសេអ៊ូលនឹងបន្តកិច្ចចរចាជាមួយទីក្រុងកៀវ។

នៅឯទីក្រុងកៀវឯណោះវិញ អ្នកនាំពាក្យម្នាក់នៃក្រសួងការបរទេសអ៊ុយក្រែន ក៏បានគូសបញ្ជាក់ដែរថាអ៊ុយក្រែនបើកចំហការស្ដារឡើងវិញនូវកិច្ចសន្ទនាប្រកបដោយលក្ខណៈស្ថាបនាជាមួយកូរ៉េខាងត្បូង បើទោះជាសេអ៊ូលសម្រេចចិត្តថានឹងកោះហៅឯកអគ្គរដ្ឋទូតរបស់ខ្លួនត្រឡប់ទៅស្រុកវិញក៏ដោយ។ តាមអ្នកនាំពាក្យរូបនេះ ឯកអគ្គរដ្ឋទូតកូរ៉េខាងត្បូងត្រូវបានអញ្ជើញទៅកាន់ក្រសួងការបរទេសអ៊ុយក្រែន ក្នុងសប្ដាហ៍នេះដើម្បីស្ដាប់ពីគោលជំហររបស់អ៊ុយក្រែនលើបញ្ហាដែលបានកើតឡើង។

គួរបញ្ជាក់ថា កាលពីសប្ដាហ៍មុន ប្រធានាធិបតីកូរ៉េខាងត្បូង លោក Lee Jae Myung បាននិយាយថាកូរ៉េខាងត្បូងនឹងចាត់វិធានការបន្ថែម ប្រសិនបើអ៊ុយក្រែនមិនព្រមសូមទោស និងនៅតែបន្តប្រកែកថាមិនមានកិច្ចព្រមព្រៀងសម្ងាត់រវាងប្រទេសទាំង២ លើការផ្ទេរទាហានកូរ៉េខាងជើងទាំង២នាក់ទៅកាន់កូរ៉េខាងត្បូង។ លោក Lee ក៏បានបង្ហាញការសោកស្ដាយផងដែរចំពោះការឆ្លើយតបពីអ៊ុយក្រែន៕