(កូឡុំបូ)៖ អាជ្ញាធរប្រឆាំងអំពើពុករលួយនៃប្រទេសស្រីលង្កា ក្នុងសប្តាហ៍នេះ បានចាប់ខ្លួនអតីតជំទាវទីមួយ លោកស្រី Shiranthi Rajapaksa ជុំវិញការចោទប្រកាន់ថា មូលនិធិសប្បុរសធម៌របស់លោកស្រី បានប្រើប្រាស់ខុសគោលដៅ នូវលុយបរិច្ចាគដែលប្រមូលបាន សម្រាប់មន្ទីរពេទ្យកុមារ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

រដ្ឋាភិបាលរបស់ប្រធានាធិបតីបច្ចុប្បន្ន លោក Anura Kumara Dissanayake បានបើកដំណើរការឡើងវិញ នូវការស៊ើបអង្កេតករណីពុករលួយ ដែលបានផ្អាកជាយូរមកហើយ ពាក់ព័ន្ធនឹងសមាជិកគ្រួសារត្រកូល Rajapaksa ដែលធ្លាប់មានអំណាចខ្លាំង និងបានគ្របដណ្តប់លើនយោបាយក្នុងប្រទេសអាស៉ីខាងត្បូងមួយនេះ អស់រយៈពេលជិតពីរទសវត្សរ៍។

លោកស្រី Shiranthi Rajapaksa អាយុ ៧៣ឆ្នាំ ដែលជាភរិយារបស់អតីតប្រធានាធិបតី លោក Mahinda Rajapaksa ត្រូវបានចាប់ខ្លួននៅរដ្ឋធានីកូឡុំបូ ហើយត្រូវបានបញ្ជូនទៅគណៈកម្មការស៊ើបអង្កេតការចោទប្រកាន់អំពើសូកប៉ាន់ ឬពុករលួយ (CIABOC) ដើម្បីសួរនាំបន្ថែម។ មន្ត្រី CIABOC ម្នាក់បានឱ្យដឹងថា ការចាប់ខ្លួននេះពាក់ព័ន្ធនឹងមូលនិធិ Siriliya Saviya របស់លោកស្រី។ ប៉ូលិសបាននិយាយថា អាជ្ញាធរចង់សាកសួរលោកស្រី Shiranthi Rajapaksa អំពីប្រាក់បរិច្ចាគចំនួន ១០លានរូពីស្រីលង្កា ឬស្មើប្រហែល ៣០ ៣០០ដុល្លារ ដែលមូលនិធិសប្បុរសធម៌ Siriliya Saviya របស់លោកស្រី បានប្រមូល ដើម្បីទិញម៉ាស៊ីនស្កេន PET សម្រាប់មន្ទីរពេទ្យព្យាបាលជំងឺមហារីកកុមារ ក្នុងតំបន់មួយ។

ក្រុមអ្នកស៊ើបអង្កេត បានប្រាប់តុលាការថា រដ្ឋាភិបាលចិនបានបរិច្ចាគម៉ាស៊ីនស្កេនប្រភេទនេះរួចហើយ ប៉ុន្តែមូលនិធិសប្បុរសធម៌ខាងលើ ត្រូវបានចោទប្រកាន់ថា នៅតែបន្តស្នើសុំប្រាក់បរិច្ចាគ ហើយបានប្រើប្រាស់ថវិកាទាំងនោះខុសគោលដៅ។ លោកស្រី Shiranthi Rajapaksa បានបដិសេធថា លោកស្រីមិនបានប្រព្រឹត្តខុសអ្វីនោះទេ ដោយអះអាងថា ប្រាក់រៃអង្គាសមិនត្រូវបានកិបកេងឡើយ។

សមាជិកដទៃទៀតនៃគ្រួសារត្រកូត Rajapaksa ក៏បានប្រឈមនឹងបញ្ហាផ្លូវច្បាប់ដែរ។ តួយ៉ាង កូនប្រុសច្បងរបស់លោកស្រី Shiranthi គឺលោក Namal Rajapaksa ដែលជាសមាជិកសភាមកពីគណបក្សប្រឆាំង កំពុងស្ថិតក្នុងការឃុំខ្លួនបណ្តោះអាសន្ន ជុំវិញការចោទប្រកាន់ ពាក់ព័ន្ធនឹងកិច្ចព្រមព្រៀងទិញយន្តហោះ Airbus កាលពីក្នុងឆ្នាំ២០១៣ ដែលបានចុះហត្ថលេខា អំឡុងពេលឪពុករបស់លោក នៅកាន់តំណែងជាប្រធានាធិបតី។ គ្រួសារ Rajapaksa បានបដិសេធជាបន្តបន្ទាប់ ចំពោះការចោទប្រកាន់អំពើពុករលួយទាំងនេះ ហើយបានចាត់ទុកសំណុំរឿងប្រឆាំងនឹងពួកគេថា មានហេតុផលនយោបាយនៅពីក្រោយ។

គួរបញ្ជាក់ថា លោក Mahinda Rajapaksa បានកាន់តំណែងជាប្រធានាធិបតីស្រីលង្កា ពីឆ្នាំ២០០៥ ដល់ឆ្នាំ ២០១៥ ហើយនៅតែជាឥស្សរជននយោបាយដ៏មានឥទ្ធិពលម្នាក់របស់ស្រីលង្កា បើទោះបីជាឥទ្ធិពលរបស់គ្រួសារលោកបានធ្លាក់ចុះ ចាប់តាំងពីបាតុកម្មទ្រង់ទ្រាយធំ ក្នុងឆ្នាំ២០២២ បានបង្ខំឱ្យប្អូនប្រុសរបស់លោក គឺលោក Gotabaya Rajapaksa ត្រូវចុះចេញពីតំណែងប្រធានាធិបតីក៏ដោយ៕