(បាងកក)៖ ព្រះរាជវាំងថៃនៅថ្ងៃសុក្រ ទី៩ ខែតុលា ឆ្នាំ២០២៦ បានប្រកាសឱ្យដឹងថា អគ្គមហេសីរបស់ព្រះមហាក្សត្រថៃ បានបើកយន្តហោះចម្បាំង Gripen ដោយអង្គឯងជាលើកដំបូង ខណៈព្រះស្វាមីរបស់ទ្រង់ គឺព្រះអង្គ Maha Vajiralongkorn ដែលជាអ្នកចូលចិត្តបើកយន្តហោះដូចគ្នានោះ បានទតមើលនៅខាងក្រោម។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

យោងតាមវីដេអូដែលព្រះរាជវាំងថៃបានផ្សព្វផ្សាយ ម្ចាស់ក្សត្រី Suthida ដែលមានព្រះជន្ម៤៨ព្រះវស្សា បានបើកយន្តហោះចម្បាំង JAS 39C Gripen ប្រភេទមានកៅអីអង្គុយតែមួយ ចេញពីមូលដ្ឋានទ័ពអាកាស ក្នុងខេត្ត Surat Thani នៅភាគខាងត្បូងប្រទេសថៃ កាលពីថ្ងៃព្រហស្បតិ៍សប្តាហ៍នេះ។ ប្រព័ន្ធផ្សព្វផ្សាយក្នុងស្រុក បានរាយការណ៍ថា ការហោះហើរនេះ ធ្វើឡើងបន្ទាប់ម្ចាស់ក្សត្រី បានហ្វឹកហាត់ជាមួយម៉ាស៊ីនរៀនហោះហើរនៅលើដី អស់រយៈពេលជាច្រើនសប្តាហ៍ នៅឯមូលដ្ឋានយោធានោះ និងបានចំណាយពេលប្រហែល ១០ម៉ោង ហោះហើរផ្ទាល់នៅក្នុងយន្តហោះចម្បាំង Gripen ស៊េរីមានកៅអីអង្គុយ២ ដោយមានអ្នកផ្សេងជាអ្នកបើក។

ម្ចាស់ក្សត្រី Suthida ធ្លាប់បំពេញការងារជាអ្នកបម្រើការលើយន្តហោះរបស់ក្រុមហ៊ុនអាកាសចរណ៍ Thai Airways មុនពេលរៀបអភិសេក ជាមួយព្រះអង្គ Maha Vajiralongkorn ក្នុងឆ្នាំ២០១៩ ពោលគឺប៉ុន្មានថ្ងៃមុន ពិធីឡើងគ្រងរាជ្យរបស់ព្រះអង្គ។ ទ្រង់បានចាប់ផ្តើមបើកយន្តហោះនៅឆ្នាំ២០១០ ហើយបានប្រមូលបទពិសោធហោះហើរសរុបជិត ១១៩០ម៉ោង។ តាមសេចក្តីរាយការណ៍ ម្ចាស់ក្សត្រី Suthida តែងតែចូលរួមបើកយន្តហោះ ក្នុងតួនាទីជាពីឡុតរង ឬ co-pilot ជាមួយព្រះអង្គ Vajiralongkorn ក្នុងដំណើរបំពេញព្រះរាជទស្សនកិច្ចនានា។

គួរបញ្ជាក់ថា បច្ចុប្បន្ន ប្រទេសថៃមានយន្តហោះចម្បាំង Gripen ស៊េរី C/D ដែលផលិតដោយក្រុមហ៊ុន Saab របស់ប្រទេសស៊ុយអែត ជាង១០គ្រឿង។ កាលពីឆ្នាំមុន ថៃក៏បានចុះកិច្ចព្រមព្រៀងទិញយន្តហោះ Gripen E ចំនួន៣គ្រឿង និង Gripen F ចំនួន ១គ្រឿង ក្នុងតម្លៃប្រហែល៥៥៦លានដុល្លារផងដែរ ជាមួយគម្រោងប្រគល់យន្តហោះទាំងនេះ ឱ្យបាននៅត្រឹមឆ្នាំ២០៣០។ តាមរយៈ​ការបើកយន្តហោះដោយអង្គឯងខាងលើ ធ្វើឱ្យម្ចាស់ក្សត្រី Suthida ត្រូវបានទទួលស្គាល់ជា ពីឡុតដំបូងគេដែលជាស្រ្តី របស់យន្តហោះចម្បាំង Gripen នៅក្នុងប្រទេសថៃ៕