(កៀវ)៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានចោទប្រកាន់សហរដ្ឋអាមេរិកថា មិនមានឆន្ទៈក្នុងការជួយអ៊ុយក្រែន បន្ទាប់ពីការទម្លាក់គ្រាប់បែករបស់រុស្ស៉ីកាលពីថ្ងៃព្រហស្បតិ៍ សម្លាប់មនុស្សយ៉ាងហោចណាស់ ៣៥នាក់នៅភាគខាងកើតប្រទេស និងធ្វើឱ្យចំនួនអ្នកស្លាប់សរុបត្រឹមរយៈពេល ២ថ្ងៃនៃការវាយប្រហាររបស់រុស្ស៉ី កើនលើស ៧០នាក់។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃសុក្រ ទី៩​ ខែតុលា ឆ្នាំ២០២៦។

ដោយសំដៅទៅការអះអាងរបស់រដ្ឋមន្ត្រីការបរទេសអាមេរិក Marco Rubio កាលពីថ្ងៃព្រហស្បតិ៍ ដែលថាសង្គ្រាមអ៊ុយក្រែនកំពុងជាប់គាំង ហើយថាសហរដ្ឋអាមេរិកនឹងបន្តប្រឹងប្រែងឆ្ពោះទៅរកដំណោះស្រាយ លោក ហ្សេលេនស្គី បានលើកជាសំណួរថា «តើការពិត និងភាពស្មោះត្រង់នៅឯណា? ហើយតើស្ថានភាពជាប់គាំងនៅត្រង់ណា? នោះគេហៅថាគ្មានឆន្ទៈ»។

លោក ហ្សេលេនស្គី បានឱ្យដឹងថា មនុស្ស ៧៨នាក់បានស្លាប់ និង ២១៥នាក់រងរបួស ដោយសារការវាយប្រហារនៅទូទាំងប្រទេសអ៊ុយក្រែន ក្នុងរយៈពេល ២ថ្ងៃចុងក្រោយ។ លោកបានអំពាវនាវឱ្យសហរដ្ឋអាមេរិកយល់ព្រមតាមសំណើឱ្យបង្កើនលទ្ធភាព ចូលប្រើប្រាស់សេវាកម្មផ្កាយរណប Starlink ដើម្បីជួយដល់ការកំណត់គោលដៅវាយប្រហារលើប្រព័ន្ធបាញ់មីស៉ីលផ្លោងរបស់រុស្ស៉ី។

គួរបញ្ជាក់ថា ក្នុងរយៈពេលប៉ុន្មានខែថ្មីៗ អ៊ុយក្រែនព្យាយាមដណ្តើមជោគជ័យលើសមរភូមិពីរុស្ស៉ី ដែលកំពុងជួបប្រទះភាពយឺតយាវនាចុងឆ្នាំនេះ ប៉ុន្តែអ៊ុយក្រែននៅតែរងផលប៉ះពាល់ ពីយុទ្ធនាការវាយប្រហារតាមផ្លូវអាកាសដ៏សាហាវរបស់ទីក្រុងមូស្គូ៕