(រីយ៉ាដ)៖ ក្រុមប្រដាប់អាវុធហ៊ូទី (Houthi) នៅយេម៉ែន នៅថ្ងៃអាទិត្យ បានព្រមានសារជាថ្មីដល់ក្រុមហ៊ុនអាកាសចរណ៍ អ្នកដំណើរ និងបុគ្គលិកព្រលានយន្តហោះ ឱ្យចៀសឆ្ងាយពីព្រលានយន្តហោះទូទាំងប្រទេសអារ៉ាប៊ីសាអូឌីត មួយថ្ងៃក្រោយការវាយប្រហារលើព្រលានយន្តហោះអន្តរជាតិរដ្ឋធានីរីយ៉ាដ បានសម្លាប់មនុស្ស ១២ នាក់ និងរបួសជាង ៣០០ នាក់។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី១១ ខែតុលា ឆ្នាំ២០២៦។

នេះជាការវាយប្រហារបង្ហូរឈាមបំផុតនៅក្នុងទឹកដីអារ៉ាប៊ីសាអូឌីត ក្នុងរយៈពេលជាងមួយទសវត្សរ៍មកនេះ។ តាមរយៈការបង្ហោះលើបណ្តាញសង្គម X ក្រុមហ៊ូទីបានបញ្ជាក់ថា៖ «យើងសូមក្រើនរំលឹកជាថ្មីដល់គ្រប់ក្រុមហ៊ុនអាកាសចរណ៍ បុគ្គលិក និងអ្នកដំណើរទាំងអស់ កុំប្រើប្រាស់ព្រលានយន្តហោះ និងដែនអាកាសអារ៉ាប៊ីសាអូឌីតឱ្យសោះ ព្រោះទីតាំងទាំងនោះបានក្លាយជាសមរភូមិវាយប្រហាររបស់កងកម្លាំងយើង លើកលែងតែព្រលានយន្តហោះក្រុងមេកា (Mecca) និងម៉ាឌីណា (Medina) ប៉ុណ្ណោះ»។

ការកើនកម្ដៅសង្គ្រាមនេះ ធ្វើឡើងក្រោយអារ៉ាប៊ីសាអូឌីតបានបង្កើនការទម្លាក់គ្រាប់បែកនៅយេម៉ែន និងជួយកងទ័ពរដ្ឋាភិបាលវាយដណ្តើមទឹកដីតាមបណ្តោយឆ្នេរសមុទ្រក្រហមមកវិញ។ ក្រសួងការបរទេសនៃរដ្ឋបាលហ៊ូទី បានព្រមានតាមកញ្ចក់ទូរទស្សន៍ Al Masirah ថា ប្រសិនបើអារ៉ាប៊ីសាអូឌីតមិនបញ្ឈប់ការឈ្លានពាន និងលូកដៃចូលកិច្ចការផ្ទៃក្នុងយេម៉ែនទេ គ្រោះមហន្តរាយកាន់តែធ្ងន់ធ្ងរនឹងធ្លាក់លើប្រទេសនេះមិនខាន។

កាលពីថ្ងៃសៅរ៍ ប្រធានាធិបតីអាមេរិក លោក ដូណាល់ ត្រាំ បានបង្ហើបថា អាមេរិកកំពុងពិចារណាចូលដៃជាមួយអារ៉ាប៊ីសាអូឌីត ដើម្បីវាយប្រហារលើក្រុមហ៊ូទី ដែលជាផ្នែកមួយនៃការរាលដាលនៃសង្គ្រាមរវាងអាមេរិក-អ៊ីស្រាអែល និងអ៊ីរ៉ង់។ ស្របពេលជាមួយគ្នានេះ សម្ព័ន្ធភាពយោធាដឹកនាំដោយអារ៉ាប៊ីសាអូឌីត បានឱ្យដឹងថា គ្រាប់ផ្លោងមួយគ្រាប់បានធ្លាក់ក្បែរព្រលានយន្តហោះអន្តរជាតិ King Fahd ក្នុងក្រុងដាមម៉ាំ (Dammam) កាលពីថ្ងៃសៅរ៍ ព្រមទាំងបានបាញ់ស្ទាក់កម្ទេចដ្រូនមួយគ្រឿងទៀតកាលពីថ្ងៃអាទិត្យ៕