(កៀវ)៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី (Volodymyr Zelenskiy) បានបញ្ជាក់នៅថ្ងៃអាទិត្យនេះថា អ៊ុយក្រែនត្រៀមខ្លួនបញ្ឈប់ការវាយប្រហារលើរោងចក្រចម្រាញ់ប្រេងរុស្ស៊ី ប្រសិនបើទីក្រុងមូស្គូព្រមបញ្ឈប់ការវាយប្រហារលើបណ្ដាញថាមពលអ៊ុយក្រែនវិញ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី១១ ខែតុលា ឆ្នាំ២០២៦។

ការលើកឡើងនេះ ធ្វើឡើងក្រោយប្រធានាធិបតីអាមេរិក លោក ដូណាល់ ត្រាំ បានទាមទារឱ្យក្រុងកៀវបញ្ឈប់ការវាយប្រហារជាឯកតោភាគី ដើម្បីទាញទម្លាក់តម្លៃប្រេងម៉ាស៊ូតនៅអាមេរិក។

កាលពីថ្ងៃសៅរ៍ លោក ត្រាំ បានព្រមានលោក ហ្សេលេនស្គី ឱ្យបញ្ឈប់ការវាយប្រហាររោងចក្រប្រេងជាបន្ទាន់ និងបានលើកឡើងថា អ៊ុយក្រែនគួរតែរកមេដឹកនាំថ្មីជំនួសលោក ព្រោះបានខកខានឱកាសចរចាជាមួយរុស្ស៊ី។ ជាការឆ្លើយតប លោក ហ្សេលេនស្គី បានសង្កត់ធ្ងន់ថា អ៊ុយក្រែននឹងព្រមផ្អាកការវាយប្រហារ លុះត្រាតែរុស្ស៊ីឈប់វាយប្រហារលើប្រព័ន្ធថាមពលរបស់ខ្លួនដែរ និងត្រូវមានការធានាជាក់ស្ដែង ដោយលោកបញ្ជាក់ថា រុស្ស៊ីជាដើមចមតែមួយគត់នៃសង្គ្រាមនេះ។

ការទាមទាររបស់លោក ត្រាំ ឱ្យផ្លាស់ប្តូរមេដឹកនាំអ៊ុយក្រែន បានបង្កការខឹងសម្បារយ៉ាងខ្លាំងពីពលរដ្ឋក្នុងរដ្ឋធានីកៀវ ខណៈច្បាប់អាជ្ញាសឹកមិនអនុញ្ញាតឱ្យរៀបចំការបោះឆ្នោតក្នុងគ្រាសង្គ្រាមឡើយ។ ទន្ទឹមគ្នានេះ លោក ហ្សេលេនស្គី បានបន្តពិភាក្សាជាមួយមេដឹកនាំអឺរ៉ុប ដើម្បីស្វែងរកជំនួយការពារដែនអាកាសបន្ថែម និងរឹតបន្តឹងទណ្ឌកម្មលើរុស្ស៊ី៕