(វ៉ាស៊ីនតោន)៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី (Volodymyr Zelenskiy) នៅថ្ងៃអាទិត្យ បានប្រកាសឆ្លើយតបទៅនឹងការរិះគន់របស់ប្រធានាធិបតីអាមេរិក លោក ដូណាល់ ត្រាំ ថា អ៊ុយក្រែននឹងរៀបចំការបោះឆ្នោត ប្រសិនបើប្រធានាធិបតីរុស្ស៊ី លោក វ្ល៉ាឌីមៀ ពូទីន យល់ព្រមលើបទឈប់បាញ់រយៈពេល ៦០ ថ្ងៃ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី១១ ខែតុលា ឆ្នាំ២០២៦។

ថ្លែងក្នុងបទសម្ភាសន៍ជាមួយកម្មវិធី "This Week" របស់ទូរទស្សន៍ ABC លោក ហ្សេលេនស្គី បានបញ្ជាក់ថា៖ «សូមជួយប្រាប់លោក ពូទីន ផង ឱ្យពេលយើង ២ ខែ ឬ ៦០ ថ្ងៃនៃបទឈប់បាញ់ទាំងស្រុង នោះយើងនឹងរៀបចំការបោះឆ្នោត»។ ការលើកឡើងនេះ ធ្វើឡើងបន្ទាប់ពីលោក ត្រាំ កាលពីថ្ងៃសៅរ៍ បានរិះគន់លោក ហ្សេលេនស្គី ជុំវិញការវាយប្រហារលើរោងចក្រចម្រាញ់ប្រេងរុស្ស៊ី និងបានលើកឡើងនៅសេតវិមានថា «ដល់ពេលដែលអ៊ុយក្រែនត្រូវមានប្រធានាធិបតីថ្មីហើយ»។

ឆ្លើយតបនឹងការចង់ឱ្យប្តូរមេដឹកនាំ លោក ហ្សេលេនស្គី បានគូសបញ្ជាក់ថា ការជ្រើសរើសមេដឹកនាំគឺជា «សិទ្ធិសម្រេចរបស់ប្រជាជនអ៊ុយក្រែន» ហើយលោកបានកត់សម្គាល់ថា សូម្បីតែលោក ពូទីន ក៏ចង់ប្តូរមេដឹកនាំអ៊ុយក្រែនដូចគ្នាដែរ។ លើសពីនេះ លោកបានបន្ថែមថា ការទម្លាក់កំហុសមកលើអ៊ុយក្រែនជុំវិញរឿងប្រេងឡើងថ្លៃ គឺជារឿងងាយស្រួលនិយាយពេកហើយ ខណៈមនុស្សគ្រប់គ្នាក្នុងពិភពលោកដឹងយ៉ាងច្បាស់ថា ថ្លៃប្រេងឡើងដោយសារតែសង្គ្រាមនៅមជ្ឈិមបូព៌ា។

កាលពីព្រឹកថ្ងៃអាទិត្យដដែល លោក ហ្សេលេនស្គី ក៏បានបញ្ជាក់ផងដែរថា អ៊ុយក្រែនត្រៀមខ្លួនជាស្រេចក្នុងការបញ្ឈប់ការវាយប្រហារលើរោងចក្រចម្រាញ់ប្រេងរុស្ស៊ី ប្រសិនបើទីក្រុងមូស្គូ ព្រមបញ្ឈប់ការវាយប្រហារលើហេដ្ឋារចនាសម្ព័ន្ធថាមពលរបស់អ៊ុយក្រែនវិញ៕