(ឡុងដ៍)៖ នាយករដ្ឋមន្ត្រីអង់គ្លេស លោក Andy Burnham បានលើកឡើងថា រុស្ស៊ីពិតជាបានលូកដៃក្នុងការបោះឆ្នោតប្រជាមតិ Brexit ឆ្នាំ២០១៦ មែន ប៉ុន្តែការិយាល័យរបស់លោកបានបញ្ជាក់ឡើងវិញថា ក្រុងមូស្គូមិនអាចកែប្រែលទ្ធផលឆ្នោតបានឡើយ ហើយការចាកចេញពីសហភាពអឺរ៉ុប (EU) គឺស្របច្បាប់ទាំងស្រុង។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

លោក Burnham ដែលទើបឡើងកាន់តំណែងកាលពីខែកក្កដា គឺជាប្រមុខរដ្ឋាភិបាលអង់គ្លេសដំបូងបង្អស់ដែលហ៊ាននិយាយដោយចំហថា មានភស្តុតាងពីរឿងរុស្ស៊ីជ្រៀតជ្រែកការបោះឆ្នោតប្រជាមតិនេះ។ លោកបានថ្លែងបែបនេះ ក្នុងបំណងដាស់តឿនម្ចាស់ឆ្នោតនៅបារាំង និងអាល្លឺម៉ង់ ឱ្យប្រុងប្រយ័ត្នចំពោះការប៉ុនប៉ងរបស់រុស្ស៊ីក្នុងការលូកដៃចូលឆាកនយោបាយរបស់ពួកគេ មុនការបោះឆ្នោតនៅឆ្នាំក្រោយចូលមកដល់។

ក្នុងបទសម្ភាសន៍ជាមួយកម្មវិធីផតខាស់ The Rest Is Politics លោក Burnham បានបញ្ជាក់ថា៖ «ពេលខ្ញុំចូលមកកាន់ការិយាល័យ Downing Street ខ្ញុំបានសួរសំណួរថា តើរុស្ស៊ីពិតជាបានលូកដៃក្នុងការបោះឆ្នោតប្រជាមតិឆ្នាំ២០១៦ មែនឬទេ? ហើយខ្ញុំទទួលបានចម្លើយច្បាស់ៗថា ពិតជាមានមែន»។ យ៉ាងណាក្ដី លោកនាយករដ្ឋមន្ត្រី មិនបានបញ្ជាក់លម្អិតថារុស្ស៊ីជ្រៀតជ្រែកតាមរបៀបណា ឬបង្ហាញភស្តុតាងជាក់ស្ដែងណាមួយឡើយ។

កន្លងមក ក្រុងមូស្គូតែងតែច្រានចោលការចោទប្រកាន់ថាខ្លួនលូកដៃក្នុងការបោះឆ្នោត Brexit ដោយចាត់ទុកថា អង់គ្លេសកំពុងកើតជំងឺរវើរវាយប្រឆាំងរុស្ស៊ី ខណៈស្ថានទូតរុស្ស៊ីប្រចាំរដ្ឋធានីឡុងដ៍ មិនទាន់ឆ្លើយតបចំពោះសំណើសុំការបំភ្លឺចុងក្រោយនេះនៅឡើយទេ៕