(ប៉េកាំង)៖ ចិន បានប្រកាសនៅថ្ងៃចន្ទ ទី១២ ខែតុលា ឆ្នាំ២០២៦ ពីការដាក់ទណ្ឌកម្មប្រឆាំងនឹងរដ្ឋមន្ត្រីមកពីប្រទេសប៉ារ៉ាហ្កាយ និងបេលីស ជុំវិញទំនាក់ទំនងការទូតរបស់ពួកគេជាមួយតៃវ៉ាន់ ដែលប៉េកាំងចាត់ទុកថាជាផ្នែកមួយនៃទឹកដីរបស់ខ្លួន។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

ក្រសួងការបរទេសចិនបានឱ្យដឹងថាវិធានការដាក់ទណ្ឌកម្មខាងលើត្រូវបានធ្វើឡើងប្រឆាំងនឹងរដ្ឋមន្ត្រីទូរគមនាគមន៍របស់ប៉ារ៉ាហ្កាយ លោក Gustavo Villate និងរដ្ឋមន្ត្រីការបរទេសនៃប្រទេសបេលីស លោក Francis Fonseca។ វិធានការដាក់ទណ្ឌកម្មទាំងនោះរួមមានការបង្កកទ្រព្យសម្បត្តិរបស់រដ្ឋមន្ត្រីទាំង២រូបដែលមានតម្កល់ទុកក្នុងប្រទេសចិន ការបដិសេធផ្ដល់ទិដ្ឋាការ និងការហាមឃាត់មិនឱ្យអង្គការ ឬស្ថាប័ននៅក្នុងប្រទេសចិនមានទំនាក់ទំនងជាមួយនឹងពួកគេ។ ចំណាត់ការដាក់ទណ្ឌកម្មនេះកើតមានឡើងតែ ២ថ្ងៃប៉ុណ្ណោះបន្ទាប់ពីតៃវ៉ាន់ ប្រារព្ធទិវាបុណ្យជាតិរបស់ខ្លួន។

នៅថ្ងៃបុណ្យជាតិតៃវ៉ាន់ លោក Villate បានបង្ហោះសារលើបណ្ដាញទំនាក់ទំនងសង្គមដោយនិយាយថាប៉ារ៉ាហ្កាយបានគូសបញ្ជាក់ឡើងវិញពីទំនាក់ទំនងមិត្តភាព និងកិច្ចសហប្រតិបត្តិការដោយឈរលើគុណតម្លៃរួម និងគោលការណ៍ការសម្រេចពីជោគវាសនារបស់ខ្លួនឯងដោយប្រជាជន សិទ្ធិមនុស្ស ​និងប្រជាធិបតេយ្យ។

តៃប៉ិមានទំនាក់ទំនងការទូតផ្លូវការជាមួយប្រទេសចំនួន ១២ប៉ុណ្ណោះនៅលើពិភពលោក។ ប្រធានាធិបតីប៉ារ៉ាហ្កាយ លោក Santiago Pena ដែលបានចាត់ទុកតៃវ៉ាន់ជាដៃគូដ៏សំខាន់មួយសម្រាប់ប្រទេសរបស់លោកបានធ្វើទស្សនកិច្ចទៅកាន់ទីក្រុងតៃប៉ិ កាលពីដើមឆ្នាំ២០២៦ ហើយនៅទីនោះលោកបានចុះហត្ថលេខាលើកិច្ចព្រមព្រៀងជាច្រើនស្ដីពីការផ្ដល់ជំនួយផ្នែកទៅវិញទៅមកលើបញ្ហាឧក្រិដ្ឋកម្ម កិច្ចសហប្រតិបត្តិការ សាយប័រ AI និងការវិនិយោគលើបច្ចេកវិទ្យាកុំព្យូទ័រ។

គួរបញ្ជាក់ថា កាលពីខែកញ្ញាកន្លងទៅ រដ្ឋមន្ត្រីការបរទេសតៃវ៉ាន់ លោក Lin Chia-lung ក៏បានធ្វើទស្សនកិច្ចទៅកាន់ប្រទេសបេលីសផងដែរ ជាទីដែលក្រសួងរបស់លោកបាននិយាយថាភាគីទាំង២បានឯកភាពគ្នាលើការពង្រឹងទំនាក់ទំនងឱ្យកាន់តែស៊ីជម្រៅ។ សម្ព័ន្ធមិត្តផ្សេងទៀតរបស់តៃវ៉ាន់ក្នុងតំបន់អាមេរិក រួមមាន ក្វាតេម៉ាឡា និងហៃទី ហើយតៃវ៉ាន់ក៏មានទំនាក់ទំនងការទូតផ្លូវការជាមួយប្រទេសមួយចំនួនក្នុងតំបន់ Caribbean ផងដែរ៕