(សេអ៊ូល)៖ មេដឹកនាំកូរ៉េខាងជើង លោក គីម ជុងអ៊ុនបានធ្វើទស្សនកិច្ចទៅកាន់សារៈមន្ទីរឧស្សាហកម្មការពារជាតិមួយដែលដាក់តាំងបង្ហាញមីស៊ីលបាលិស្ទីគអន្តរទ្វីបមួយគ្រាប់មានសមត្ថភាពបាញ់ដល់សហរដ្ឋអាមេរិក។ នេះបើតាម KCNA ដកស្រង់ចេញផ្សាយដោយទីភ្នាក់ងារសារព័ត៌មាន Reuters។

សេចក្ដីរាយការណ៍របស់ប្រព័ន្ធផ្សព្វផ្សាយរដ្ឋកូរ៉េខាងជើង KCNA នៅថ្ងៃអង្គារ ទី១៣ ខែតុលា ឆ្នាំ២០២៦ កើតមានតែមួយថ្ងៃប៉ុណ្ណោះបន្ទាប់ពីលោកប្រធានាធិបតីអាមេរិក ដូណាល់ ត្រាំ បាននិយាយថារូបលោកអាចនឹងជួបលោក គីម ជុងអ៊ុង ក្នុងគម្រោងនៃដំណើរទស្សនកិច្ចមួយទៅកាន់តំបន់អាស៊ី ជាទីដែលលោកត្រូវបានរំពឹងថានឹងចូលរួមកិច្ចប្រជុំកំពូល APEC ក្នុងប្រទេសចិន នៅពាក់កណ្ដាលខែវិច្ឆិកាខាងមុខ។

KCNA បានឱ្យដឹងថាលោក គីម ធ្វើទស្សនកិច្ចទៅកាន់សារៈមន្ទីរឧស្សាហកម្មការពារជាតិ កាលពីថ្ងៃអាទិត្យចុងសប្ដាហ៍កន្លងទៅ អមដំណើរដោយកូនស្រីឈ្មោះ Ju Ae និងភរិយារបស់លោក គឺលោកស្រី Ri Sol Ju។ រូបថតបង្ហោះដោយ KCNA បានបង្ហាញពីការដាក់តាំងបង្ហាញនៅឯសារៈមន្ទីរឧស្សាហកម្មការពារជាតិនូវអាវុធដែលត្រូវបានអភិវឌ្ឍនៅក្រោមការដឹកនាំរបស់លោក គីម ជុងអ៊ុន ក្នុងនោះរួមមាន​ ចាប់ពីដ្រូន រហូតដល់មីស៊ីលបាលិស្ទីគអន្តរទ្វីប (ICBM) Hwasong-20។

គួរបញ្ជាក់ថា បើតាមក្រុមអ្នកវិភាគ សារៈមន្ទីរឧស្សាហកម្មការពារជាតិ ក៏បានឆ្លុះបញ្ចាំងផងដែរពីកិច្ចប្រឹងប្រែងរបស់លោក គីម ជុងអ៊ុន នៅក្នុងការលើកកម្ពស់ឃ្លាំងអាវុធរបស់កូរ៉េខាងជើង ទៅជា និមិត្តរូបនៃសមិទ្ធផលយោធាដែលរបបរបស់លោកសម្រេចបាន៕