(ម៉ិកស៉ីកូ)៖ ព្យុះហឺរីខេន Simon បានធ្វើដំណើរយឺតៗឆ្ពោះទៅទិសពាយ័ព្យ ក្បែរតំបន់ឆ្នេរ Pacific coast ប្រទេសម៉ិកស៉ិក កាលពីថ្ងៃចន្ទសប្តាហ៍នេះ ដោយរដ្ឋនានានៅភាគខាងលិចរងនូវខ្យល់បោកបក់ដ៏គ្រោះថ្នាក់ ភ្លៀងធ្លាក់ខ្លាំង និងទឹកជំនន់ ក៏ដូចជាតម្រូវឱ្យសហគមន៍រស់នៅតាមបណ្តោយដងទន្លេ ត្រៀមលក្ខណៈសម្រាប់ការជម្លៀស។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃអង្គារ ទី១៣ ខែតុលា ឆ្នាំ២០២៦។

មជ្ឈមណ្ឌលតាមដានព្យុះរបស់សហរដ្ឋអាមេរិក បានឱ្យដឹងថា នៅពេលព្រឹក (ម៉ោងក្នុងតំបន់) ព្យុះ Simon ស្ថិតនៅចម្ងាយប្រហែល ៩០គីឡូម៉ែត្រ ភាគនិរតីនៃតំបន់ Cabo Corrientes រដ្ឋ Jalisco ដោយមានល្បឿនខ្យល់បក់ខ្លាំងបំផុត ១៧៥គីឡូម៉ែត្រក្នុងមួយម៉ោង ដែលជាព្យុះហឺរីខេនកម្រិត២។ លោក Alex DaSilva អ្នកជំនាញផ្នែកតាមដាននៅក្រុមហ៊ុនឧតុនិយមឯកជន AccuWeather បាននិយយាថា កម្លាំងខ្យល់របស់ព្យុះ Simon កំពុងថយចុះជាបណ្តើរៗ ហើយវាអាចឈប់ធ្វើចលនា ឬនៅទ្រឹងក្នុងសប្តាហ៍នេះ រួច​បោកបក់​ចូល​ដល់​ដីគោក​នៅ​ថ្ងៃ​ព្រហស្បតិ៍ ក្នុង​រដ្ឋ Sinaloa របស់​ម៉ិកស៉ិក។

តាមការព្យាករ ព្យុះ Simon ធ្វើដំណើរទៅទិសពាយព្យក្នុងល្បឿន ៦គីឡូម៉ែត្រក្នុងមួយម៉ោង ហើយបន្តធ្វើដំណើរតាមគន្លងនោះ មុនពេលបត់ទៅទិសឦសាន រួចចូលទៅក្នុងដីគោកឆ្លងកាត់តំបន់ភាគខាងលិច ភាគកណ្តាលម៉ិកស៉ិក អំឡុងពាក់កណ្តាលសប្តាហ៍នេះ។ អាជ្ញាធរបានឱ្យដឹងថា ព្យុះ Simon អាចបង្កជាទឹកជំនន់ និងបំណាក់ដីដែលអាចគំរាមកំហែងដល់អាយុជីវិត នៅតាមតំបន់មួយចំនួននៃ Pacific coast និងតំបន់ភ្នំក្បែរនោះ៕