(ប៉េកាំង)៖ បេីតាមទស្សនៈរបស់លោកបណ្ឌិត​ ជា​ មុនីឫទ្ធិ​ ប្រធាន​សមាគម​អ្នកស្រាវជ្រាវ​វឌ្ឍនភាព​កម្ពុជា​-ចិន​ បានបញ្ជាក់ថា​ «ក្បាច់គុនបុរាណចិន» មិនត្រឹមតែជាសិល្បៈការពារខ្លួន និងជាវប្បធម៌ប្រពៃណីដែលបង្កប់នូវគុណធម៌ សេចក្តីក្លាហាន និងការគោរពយុត្តិធម៌ក្នុងសង្គមប៉ុណ្ណោះទេ ប៉ុន្តែថែមទាំងជាសកម្មភាពរាងកាយដែលមានទំនាក់ទំនងជាមួយការថែរក្សាសុខភាព និងការលើកកម្ពស់សុខុមាលភាពផ្លូវកាយ និងផ្លូវចិត្តផងដែរ។

តាមរយៈការហាត់ប្រាណ ការគ្រប់គ្រងដង្ហើម ការរក្សាលំនឹងរាងកាយ និងការផ្តោតអារម្មណ៍ ក្បាច់គុនបុរាណចិនមួយចំនួន ដូចជា តៃជី (太极拳) និងឈីកុង (气功) ត្រូវបានចាត់ទុកថាជាវិធីសាស្ត្របែបប្រពៃណីដែលអាចជួយលើកកម្ពស់ភាពបត់បែន ការរក្សាលំនឹង និងការកាត់បន្ថយភាពតានតឹង។ ទោះជាយ៉ាងណា អត្ថប្រយោជន៍ជាក់លាក់អាស្រ័យលើប្រភេទនៃការហាត់ ស្ថានភាពសុខភាព និងការអនុវត្តរបស់មនុស្សម្នាក់ៗ។

នៅក្នុងសៀវភៅ «វិជ្ជា​ពេទ្យ​បុរាណចិន» ដែលបានបោះពុម្ពឆ្នាំ២០២២ លោកបណ្ឌិត ជា មុនីឫទ្ធិ បានបង្ហាញពីទំនាក់ទំនង រវាងចំណេះដឹងវេជ្ជសាស្ត្រប្រពៃណីចិន វប្បធម៌ និងវិធីសាស្ត្រថែរក្សាសុខភាពតាមបែបបុរាណ។

អ្វីដែលគួរឱ្យចាប់អារម្មណ៍នោះ គឺក្បាច់គុនចិនមិនបានផ្តោតតែលើកម្លាំងសាច់ដុំ ឬសមត្ថភាពប្រយុទ្ធប៉ុណ្ណោះទេ ប៉ុន្តែថែមទាំង ផ្តោតលើវិន័យ ការអត់ធ្មត់ ការគ្រប់គ្រងអារម្មណ៍ និងការរស់នៅប្រកបដោយតុល្យភាព។ គោលការណ៍ទាំងនេះមានភាពស្របគ្នានឹង ទស្សនៈបុរាណចិនដែលយកចិត្តទុកដាក់លើភាពសុខដុមរមនារវាងរាងកាយ ចិត្ត និងបរិស្ថានរស់នៅ។

ក្នុងបរិបទនៃការលើកកម្ពស់សុខភាពសាធារណៈ ការសិក្សាអំពីក្បាច់គុនបុរាណចិនអាចជួយឱ្យប្រជាជនចិន ក្នុងយុគសម័យថ្មី យល់កាន់តែច្បាស់អំពីតម្លៃនៃវប្បធម៌ប្រពៃណី និងការរួមចំណែករបស់វាចំពោះការរស់នៅ ប្រកបដោយសុខុមាលភាព។

ជារួម ក្បាច់គុនបុរាណចិនជាមរតកវប្បធម៌ដែលភ្ជាប់សិល្បៈការពារខ្លួន វិន័យផ្លូវចិត្ត និងការថែរក្សាសុខភាព។ ការសិក្សាស្វែងយល់ពីមរតកនេះ តាមរយៈសៀវភៅ «វិជ្ជា​ពេទ្យ​បុរាណចិន» អាចជាច្រកមួយសម្រាប់សាធារណជន ក្នុងការសឈ្វេងយល់កាន់តែស៊ីជម្រៅពីទស្សនៈសុខភាពរបស់ចិនបុរាណ ព្រមទាំងពិចារណាអំពីការអនុវត្តដែលសមស្របនឹង ជីវភាពសម័យទំនើប។ ទោះបែបណាក៏ដោយ លោកបណ្ឌិត បានបញ្ជាក់ថា ក្បាច់គុនមិនគួរត្រូវបានចាត់ទុកជំនួសការធ្វើរោគវិនិច្ឆ័យ ឬការព្យាបាលតាមវេជ្ជសាស្ត្រដែលឈរលេី ការវិភាគបែបវិទ្យាសាស្ត្រវេជ្ជសាស្ត្រនោះឡេីយ៕

វិទ្យុមិត្តភាពកម្ពុជាចិន