(សូហ្វីយ៉ា)៖ នាយករដ្ឋមន្ត្រីប៊ុលហ្ការី លោក Rumen Radev នៅថ្ងៃអង្គារ ទី១៣ ខែតុលានេះ បាននិយាយថានាវាពីរគ្រឿង បានរងការវាយប្រហារដោយយន្តហោះដ្រូន នៅឯឆ្នេរនៃប្រទេសប៊ុលហ្គារី ក្នុងតំបន់សមុទ្រខ្មៅ ហើយមួយគ្រឿងក្នុងចំណោមនោះបានលិចបាត់ ដែលជាហេតុការណ៍លើកទីពីរហើយក្នុងរយៈពេលត្រឹមមួយសប្តាហ៍។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

លោក Radev បានឱ្យដឹងថា នាវា Chelsea 3 ដែលជាកម្មសិទ្ធិរបស់អ៊ុយក្រែន និងបើកបរក្រោមទង់ជាតិប្រទេសម៉ាល់តា ត្រូវដ្រូន ៣គ្រឿងវាយប្រហារ បណ្តាលឱ្យរងការខូចខាត នៅចម្ងាយប្រហែល ៣៣គីឡូម៉ែត្រពីឆ្នេរសមុទ្រប្រទេសប៊ុលហ្គារី វេលាទៀបភ្លឺថ្ងៃអង្គារនេះ។ សមាជិកនាវិក ដែលមានជនជាតិអ៊ុយក្រែន ៧នាក់ និងអាស៊ែបៃហ្សង់ ៨នាក់ ត្រូវបានជួយសង្គ្រោះ រីឯ ៥នាក់បានទទួលការព្យាបាល ប៉ុន្តែគ្មាននរណារបួសធ្ងន់ទេ។ ដោយឡែក សមាជិកនាវិកម្នាក់នៃនាវាដែលបានលិចនោះ ក៏ត្រូវបានជួយសង្គ្រោះផងដែរ។

នៅក្នុងសុន្ទរកថាតាមទូរទស្សន៍ លោក Radev គូសបញ្ជាក់ថា «វាជារឿងមិនអាចទទួលយកបានឡើយ។ ការវាយប្រហារសម្រាប់តែកើតឡើង នៅក្នុងតំបន់ជុំវិញទឹកដែនដីប៊ុលហ្គារី។ ខ្ញុំបានណាត់ជួបពិភាក្សាជាមួយអគ្គលេខាធិការអង្គការណាតូ លោក Mark Rutte»។ តាមលោក Radev មិនមានភស្តុតាងច្បាស់ថានរណាបង្កការវាយប្រហារទេ ប៉ុន្តែហេតុការណ៍នេះផ្តល់ផលប្រយោជន៍ដល់រុស្ស៉ី ដោយបន្ថែមថា លោកនឹងកោះហៅឯកអគ្គរដ្ឋទូតរុស្ស៉ីមកសាកសួរ។

គួរបញ្ជាក់ថា ប៊ុលហ្គារី គ្មានព្រំដែនជាប់អ៊ុយក្រែន ឬរុស្ស៉ីនោះទេ ប៉ុន្តែក្នុងនាមជាសមាជិកនៃអង្គការណាតូ (NATO) ប្រទេសនេះ មានតួនាទីយុទ្ធសាស្ត្រនៅលើសមុទ្រខ្មៅ ជាទីតំបន់ដែលអ៊ុយក្រែន និងរុស្ស៉ីមានកំពង់ផែសំខាន់ៗ។ ការព្រួយបារម្ភខ្លាំងចេះតែលេចឡើង ជុំវិញការវាយប្រហារបែបចម្រុះ (hybrid attacks) ដោយប្រើប្រាស់ដ្រូនដោយរុស្ស៉ី ខណៈដែលប្រទេសនេះកំពុងធ្វើសង្គ្រាមជាមួយអ៊ុយក្រែន៕