បទវិភាគ៖ ជំរុញដោយស៊ីសង្វាក់គ្នានូវការកសាង «បណ្តាញតភ្ជាប់ទាំង៦» ដើម្បីបំពេញបន្ថែមកម្លាំងចលករដ៏ខ្លាំងក្លាដល់សេដ្ឋកិច្ច
13-10-2026 16:56
(ប៉េកាំង)៖ “ចិនកំពុងគ្រោងផែនការមេ ដើម្បីជំរុញការកសាង "បណ្តាញតភ្ជាប់ទាំង៦” នៅរយៈពេល ៥ឆ្នាំខាងមុខនេះ ចិនមានផែនការទម្លាក់ថវិកា៥ ទ្រីលានយាន់ប្រាក់ចិន ដើម្បីកសាងនិងកែលម្អបណ្តាញបំពង់ក្រោមដីក្នុងទីក្រុងដែលមានប្រវែង៧៧ម៉ឺនគីឡូម៉ែត្រ តាមការប៉ាន់ប្រមាណ ការទម្លាក់ថវិកាលើបណ្តាញតភ្ជាប់អគ្គិសនីនឹងលើសពី៥ទ្រីលានយាន់ប្រាក់ចិន ហើយការទម្លាក់ថវិកាលើការកសាងបណ្តាញធារាសាស្ត្រនឹងកើនឡើងលើសពី៦ទ្រីលានយាន់ប្រាក់ចិន ។” ពេលថ្មីៗកន្លងទៅនេះ កាសែត «Reference News»របស់ចិនបានចុះផ្សាយអត្ថបទរបស់វេបសាយទស្សនាវដ្តី «The Economist» របស់អង់គ្លេស ក្រោមប្រធានបទ «ចិនកំពុងបំពេញបន្ថែមកម្លាំងចលករដ៏ខ្លាំងក្លាដល់សេដ្ឋកិច្ច»។ នៅឆ្នាំចាប់ផ្តើមនៃការអនុវត្ត “ផែនការអភិវឌ្ឍន៍ជាតិ៥ឆ្នាំទី១៥” ការកសាង “បណ្តាញទាំង៦” របស់ចិន គឺបណ្តាញធារាសាស្ត្រ បណ្តាញតភ្ជាប់អគ្គិសនីប្រភេទថ្មី បណ្តាញ Computing បណ្តាញទូរគមនាគមន៍ជំនាន់ថ្មី បណ្តាញបំពង់ក្រោមដីក្នុងទីក្រុងនិងបណ្តាញតភ្ជាប់ភស្តុភារកម្ម កំពុងបង្កើនល្បឿនដោយគ្រប់ជ្រុងជ្រោយ ។
ក្នុងរយៈពេលរាប់សិបឆ្នាំកន្លងទៅនេះ សន្ទុះនៃការកសាងហេដ្ឋារចនាសម្ព័ន្ធរបស់ចិនមាន “ល្បឿនលឿនដ៏អស្ចារ្យ” ដែលបានទាក់ទាញការចាប់អារម្មណ៍ពីមជ្ឈដ្ឋានអន្តរជាតិ៖ ប្រវែងសរុបនៃផ្លូវដែកល្បឿនលឿនជាប់ចំណាត់លេខ១លើពិភពលោក ទំហំបណ្តាញតភ្ជាប់អគ្គិសនីធំជាងគេលើពិភពលោកនិងចំនួនស្ថានីយអង់តែនប្រព័ន្ធ៥G ច្រើនជាងគេលើពិភពលោក ។ ប៉ុន្តែបច្ចុប្បន្ននេះ ការកសាង “បណ្តាញទាំង៦” មិនមែនផ្តោតលើការប្រកួតប្រជែងទំហំនោះទេ ប៉ុន្តែគឺផ្តោតលើ “ការបង្កើនប្រសិទ្ធភាព” ។ លោក Liu Dong អនុប្រធាននាយកដ្ឋានផែនការចម្រុះ នៃក្រសួងគមនាគមន៍និងដឹកជញ្ជូនរបស់ចិនបានថ្លែងថា បន្ទាប់ពីប្តូរទិសដៅទៅរក “ការតភ្ជាប់ខ្សែសង្វាក់និងបង្កើតជាបណ្តាញ” យើងលែងផ្តោតសំខាន់លើចំនួន និងទំហំនៃសំណង់ទេ ប៉ុន្តែកាន់តែយកចិត្តទុកដាក់ចំពោះប្រសិទ្ធភាពជាក់ស្តែងនៃការដំណើរការតភ្ជាប់គ្នា រវាងចំណុចស្នូលនិងរបៀងតាមរយៈការជំរុញការបង្កើតការតភ្ជាប់នៅតាមមជ្ឈមណ្ឌលស្នូល ការពង្រីកផ្លូវថ្នល់ ការលើកកម្ពស់ការតភ្ជាប់នៅទីក្រុងនិងជនបទ និងការបង្កើតជាបណ្តាញតភ្ជាប់លើផ្ទៃអន្តរជាតិ ដើម្បីបង្កើតជាប្រព័ន្ធភស្តុភារកម្មទំនើប “ផ្លូវថ្នល់ + មជ្ឈមណ្ឌលស្នូល +ការតភ្ជាប់” និងធានាឱ្យសមត្ថភាពផ្គត់ផ្គង់នៃភស្តុភារកម្មសមស្របនឹងតម្រូវការខាងការអភិវឌ្ឍឧស្សាហកម្មប្រកបដោយកម្រិតខ្ពស់ ។
ក្នុងចំណោម “បណ្តាញចំនួន៦” ភាពប្រទាក់ក្រឡារវាងបណ្តាញ Computing និងបណ្តាញអគ្គិសនីជំនាន់ថ្មី គឺបានទទួលការយកចិត្តទុកដាក់បំផុត ។ មជ្ឈមណ្ឌល Computingត្រូវបានប្រសិទ្ធនាមថា “ខ្លាដែលស៊ីភ្លើង” ដោយទំហំនៃការប្រើប្រាស់ថាមពលនៃសួនឧស្សាហកម្មវៃឆ្លាតមួយ គឺអាចប្រៀបបាននឹងទីក្រុងឧស្សាហកម្មខ្នាតតូចមួយ ។ ដូច្នេះ គួរពង្រឹង “ការរួមបញ្ចូលគ្នានៃបណ្តាញទាំងបី” គឺ បណ្តាញ Computing បណ្តាញអគ្គិសនីប្រភេទថ្មី និងបណ្តាញទូរគមនាគមន៍ជំនាន់ថ្មី។
កាលពីមុន ការកសាងហេដ្ឋារចនាសម្ព័ន្ធ ជាទូទៅគឺ ស្ថាប័នគ្រប់គ្រងផ្លូវដែកជាអ្នកទទួលខុសត្រូវលើផ្លូវដែក ហើយស្ថាប័នអគ្គិសនីជាអ្នកទទួលខុសត្រូវលើបណ្តាញអគ្គិសនី ដោយជាការទទួលបន្ទុកតាមជំនាញរៀងៗខ្លួន ។ ប៉ុន្តែបច្ចុប្បន្ននេះ បណ្តាញចំនួន៦ត្រូវដាក់ចូលក្នុងផែនទីមេប្រតិបត្តិការរួម ហើយត្រូវបានជំរុញដោយស៊ីសង្វាក់គ្នា។ លោក Guan Peng អនុប្រធាននាយកដ្ឋានវិនិយោគនៃគណៈកម្មការជាតិអភិវឌ្ឍន៍និងកំណែទម្រង់ចិនបានថ្លែងថា “បណ្តាញចំនួន៦” ជាបណ្តាញតភ្ជាប់ស្នូលនៃប្រព័ន្ធហេដ្ឋារចនាសម្ព័ន្ធទំនើប ដែលមានការប្រទាក់ក្រឡា កម្រិតខ្ពស់និងជួយគាំទ្រគ្នាទៅវិញទៅមក ។ ត្រូវដាក់បញ្ចូលគម្រោង“បណ្តាញចំនួន៦”ចូលក្នុងផែនការមេតែមួយ ដោយដាក់ចេញផែនការសកម្មភាពរួម ការធ្វើផែនការវេលាឱ្យបានត្រឹមត្រូវ ជៀសវាងពីការធ្វើការរៀងៗខ្លួន។ ដូច្នេះ “បណ្តាញតភ្ជាប់ទាំង៦” ទើបអាចត្បាញជាបណ្តាញធំមួយដែលបង្កើនប្រសិទ្ធភាពទ្វេដង។
ការកសាង“បណ្តាញតភ្ជាប់ទាំង៦” ត្រូវបានបង្កើនល្បឿនដោយគ្រប់ជ្រុងជ្រោយតាមរយៈកិច្ចសហប្រតិបត្តិការពហុភាគី ដែលនឹងលើកកម្ពស់គុណភាពនៃជីវភាពរស់នៅរបស់ប្រជាជនយ៉ាងខ្លាំង និងពង្រីកកាលានុវត្តភាពអភិវឌ្ឍន៍ ហើយគោលចុងក្រោយបំផុតគឺបម្រើដល់សុភមង្គលរបស់ប្រជាជនសមាញ្ញរាប់រយលាននាក់។ នេះគឺជាការឆ្លុះបញ្ចាំងយ៉ាងរស់រវើកនៃ “ការធ្វើទំនើបកម្មតាមបែបផែនចិនដែលតម្កល់ទុកជីវភាពរស់នៅរបស់ប្រជាជនជាចម្បង”៕
វិទ្យុមិត្តភាពកម្ពុជាចិន
