(សេអ៊ូល)៖ ប៉ូលិសកូរ៉េខាងត្បូង បានឃាត់ខ្លួនបុរសម្នាក់ ក្រោយធ្វើសកម្មភាពយកកាំបិតចាក់មនុស្ស ៨ នាក់ នៅថ្ងៃអង្គារនេះ នៅផ្សារទំនើបមួយក្នុងទីក្រុងអុិនឈុន (Incheon) ខណៈជនរងគ្រោះម្នាក់កំពុងសង្គ្រោះបន្ទាន់ក្នុងស្ថានភាពធ្ងន់ធ្ងរ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី១៣ ខែតុលា ឆ្នាំ២០២៦ ដោយស្រង់របាយការណ៍ពីទីភ្នាក់ងារព័ត៌មាន Yonhap។

សាក្សីម្នាក់បានរៀបរាប់ប្រាប់ Yonhap ថា ជនសង្ស័យបានចងកាំបិតភ្ជាប់នឹងដៃទាំងសងខាង ហើយបានដើរកាត់ជាន់ជាច្រើនក្នុងផ្សារទំនើប ដោយដេញចាក់មនុស្សតាមផ្លូវ មុនពេលពលរដ្ឋនាំគ្នាព្រួតចាប់ប្រគល់ឱ្យប៉ូលិស។ ក្នុងចំណោមជនរងគ្រោះទាំង ៨ នាក់ មានស្ត្រី ៦ នាក់ និងបុរស ២ នាក់ ដោយក្នុងនោះស្ត្រីវ័យខ្ទង់ ២០ ឆ្នាំម្នាក់ រងរបួសធ្ងន់ធ្ងរ និងកំពុងទទួលការវះកាត់សង្គ្រោះជីវិតនៅមន្ទីរពេទ្យក្បែរនោះ។

ជនសង្ស័យវ័យ ៥៩ ឆ្នាំរូបនេះ ធ្លាប់ជាប់ពន្ធនាគារ ៤ ឆ្នាំរួចមកហើយ ពីបទប៉ុនប៉ងមនុស្សឃាត។ ក្រសួងយុត្តិធម៌កូរ៉េខាងត្បូង បានឱ្យដឹងថា ជននេះធ្លាប់ជាប់កងជើងតាមដានអេឡិចត្រូនិក (GPS) តាំងពីចេញពីពន្ធនាគារក្នុងឆ្នាំ២០១៩ ព្រមទាំងកំពុងព្យាបាលជំងឺផ្លូវចិត្ត និងការញៀនស្រាផងដែរ ខណៈក្រសួងសន្យានឹងស៊ើបអង្កេតឡើងវិញលើប្រសិទ្ធភាពនៃប្រព័ន្ធតាមដាននេះ។

គួរបញ្ជាក់ថា កូរ៉េខាងត្បូងធ្លាប់រងការរង្គោះរង្គើដោយសាររលកនៃអំពើហិង្សាដេញចាក់មនុស្សជាបន្តបន្ទាប់កាលពីឆ្នាំ២០២៣ ដែលបណ្ដាលឱ្យមនុស្សជាច្រើនស្លាប់ និងរបួស ខណៈកាលពីខែឧសភាកន្លងទៅ យុវតីម្នាក់ក៏ត្រូវគេចាក់សម្លាប់ និងម្នាក់ទៀតរងរបួសក្នុងទីក្រុងក្វាងជូ (Gwangju) ផងដែរ ៕