(ឡុងដ៍)៖ ប្រមុខទីភ្នាក់ងារសន្តិសុខផ្ទៃក្នុងអង់គ្លេស (MI5) បានព្រមាននៅថ្ងៃអង្គារនេះថា អ៊ីរ៉ង់កំពុងបង្កើនការព្យាយាមវាយប្រហារលើគោលដៅរឹងមាំ ដូចជាមូលដ្ឋានយោធាក្នុងចក្រភពអង់គ្លេស ខណៈរុស្ស៊ីកំពុងបង្កើនសង្គ្រាមកូនកាត់ (Hybrid warfare) ប្រឆាំងសម្ព័ន្ធមិត្តរបស់អ៊ុយក្រែន។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី១៣ ខែតុលា ឆ្នាំ២០២៦។

ថ្លែងក្នុងសុន្ទរកថាប្រចាំឆ្នាំស្តីពីការគំរាមកំហែងសន្តិសុខជាតិ អគ្គនាយក MI5 លោក Ken McCallum បានឱ្យដឹងថា ការគំរាមកំហែងពីរដ្ឋបរទេសបានកើនឡើង ៤ ដងក្នុងរយៈពេល ១០ ឆ្នាំចុងក្រោយ ដែលធ្វើឱ្យស្ថាប័នរបស់លោកត្រូវចំណាយធនធានច្រើនជាងសម័យសង្គ្រាមត្រជាក់ទៅទៀត។ លោកក៏បានបង្ហាញក្តីបារម្ភយ៉ាងខ្លាំងចំពោះហានិភ័យនៃបច្ចេកវិទ្យា AI ដោយព្រមានថាក្រុមភេរវករអាចយកវាទៅប្រើដើម្បីផលិតអាវុធជីវសាស្ត្រ ឬបង្កើតមេរោគបំប្លែងថ្មីៗដ៏គ្រោះថ្នាក់។

ការព្រមាននេះ ធ្វើឡើងក្រោយនាយករដ្ឋមន្ត្រីអង់គ្លេស លោក Andy Burnham បានលើកឡើងកាលពីថ្ងៃចន្ទថា ក្រុងតេអេរ៉ង់ «ទំនងជាខ្ពស់» នៅពីក្រោយផែនការប៉ុនប៉ងវាយប្រហារលើមូលដ្ឋានទ័ពអាកាស RAF Fairford ដែលជាទីតាំងយន្តហោះទម្លាក់គ្រាប់បែកអាមេរិកធ្លាប់ឈរជើងដើម្បីវាយប្រហារលើអ៊ីរ៉ង់។ លោក McCallum បានកត់សម្គាល់ថា អ៊ីរ៉ង់បានប្តូរយុទ្ធសាស្ត្រយ៉ាងច្បាស់នៅឆ្នាំនេះ ដោយងាកមករកគោលដៅធំៗ និងរឹងមាំជាងមុន ដូចជាមូលដ្ឋានយោធាជាដើម។

ទាក់ទងនឹងរុស្ស៊ី ប្រមុខ MI5 បានចាត់ទុកក្រុងមូស្គូជា «អ្នកឈ្លានពានលេខមួយ» ដែលកំពុងប្រើល្បិចកលសង្គ្រាមកូនកាត់ ដូចជាការប៉ុនប៉ងវាយប្រហារដោយដ្រូនលើយន្តហោះដឹកទំនិញនៅព្រលានយន្តហោះអាល្លឺម៉ង់ និងការវាយប្រហារសាយប័រលើបណ្តាញថាមពលប៉ូឡូញ។ លោកបានសង្កត់ធ្ងន់ថា មិនមែនជារឿងចៃដន្យឡើយ ដែលរុស្ស៊ីព្យាយាមបង្កចលាចលនៅអឺរ៉ុប ចំពេលដែលការវាយលុកយោធារបស់ខ្លួននៅអ៊ុយក្រែនស្ទើរតែគាំងដំណើរ និងខាតបង់ធនធានយ៉ាងធ្ងន់ធ្ងរនោះ៕