(មូស្គូ)៖ ទីភ្នាក់ងារសន្តិសុខរុស្ស៉ី FSB បានឱ្យដឹងនៅថ្ងៃអង្គារ ទី១៣ ខែតុលា ឆ្នាំ២០២៦ ពីការឃាត់ខ្លួនអ្នកកាសែតជប៉ុនម្នាក់ពីបទសង្ស័យធ្វើចារកម្ម ហើយក្រសួងការបរទេសរុស្ស៉ីបាននិយាយថាមានការសោកស្ដាយដែលទីក្រុងតូក្យូប្រើប្រាស់អ្នកកាសែតដើម្បីធ្វើចារកម្ម។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

នៅក្នុងសេចក្ដីថ្លែងការណ៍មួយបង្ហោះលើគេហទំព័ររបស់ខ្លួន FSB បានបញ្ជាក់ថាអ្នកកាសែតម្នាក់មកពីកាសែតជប៉ុន Hokkaido Shimbun ត្រូវបានឃាត់ខ្លួននៅក្នុងតំបន់ Sakhalin ស្ថិតនៅចុងបូព៌ានៃប្រទេសរុស្ស៉ី នៅថ្ងៃដែលរូបលោកមានគម្រោងចាកចេញពីរុស្ស៉ី។ ប៉ុន្តែ FSB មិនបានបង្ហើបឱ្យដឹងថាតើអ្នកកាសែតរូបនេះត្រូវបានចាប់ខ្លួនតាំងពីថ្ងៃណាឱ្យប្រាកដនោះទេ។

ជុំវិញការចាប់ខ្លួនអ្នកកាសែតជប៉ុនរូបនេះដែរ អ្នកនាំពាក្យក្រសួងការបរទេសរុស្ស៉ី លោកស្រី Maria Zakharova បានកត់សម្គាល់នៅក្នុងសេចក្ដីថ្លែងការណ៍មួយថាអ្នកកាសែតជប៉ុនរូបនោះត្រូវបានកំណត់អត្តសញ្ញាណមានឈ្មោះថា Imai Yuki ហើយថាការចាប់ខ្លួនអ្នកកាសែតរូបនេះអាចនឹងបង្កើនភាពអាប់អួរនៅក្នុងទំនាក់ទំនងជាមួយតូក្យូ។ លោកស្រី Zakharova ក៏បានចោទប្រកាន់ផងដែរថាជប៉ុនកំពុងព្យាយាមប្រើប្រាស់អ្នកកាសែតរបស់ខ្លួនក្នុងប្រទេសរុស្ស៉ីដែលមានឋានៈជាអ្នកកាសែតបរទេសដើម្បីប្រមូលព័ត៌មានដែលអាចបំផ្លាញដល់សន្តិសុខរបស់ រុស្ស៉ី ហើយដែលនេះជារឿងគួរឱ្យសោកស្ដាយ។

ដោយឡែក ខាងអាជ្ញាធរជប៉ុននៅឯណោះ នៅថ្ងៃពុធ ទី១៤ ខែតុលា បានស្នើសុំព័ត៌មានលម្អិត និងជំរុញឱ្យរុស្ស៉ីធានាឱ្យបាននូវការប្រព្រឹត្តដោយភាពយុត្តិធម៌ និងមិនលម្អៀងចំពោះអ្នកកាសែតជប៉ុនដែលត្រូវបានអាជ្ញាធររុស្ស៉ីចាប់ខ្លួនដោយចោទថាធ្វើចារកម្ម។ ព្រមពេលជាមួយគ្នា កាសែត Hokkaido Shimbun បានឱ្យដឹងថាបានទទួលព័ត៌មានពីការចាប់ខ្លួនអ្នកកាសែតរបស់ខ្លួនប្រកាសដោយអាជ្ញាធររុស្ស៉ីហើយ ប៉ុន្តែនៅត្រូវការព័ត៌មានលម្អិតបន្ថែម ជាមួយការជំរុញឱ្យមានការធានាសុវត្ថិភាពអ្នកកាសែតរបស់ខ្លួន៕