(វ៉ាស៉ីនតោន)៖ ក្រុមរដ្ឋអាជ្ញាសហព័ន្ធនៅសហរដ្ឋអាមេរិក បាននិយាយកាលពីថ្ងៃអង្គារ ទី១៣ ខែតុលា ឆ្នាំ២០២៦ថា ពួកគេបានចាប់ខ្លួនមនុស្ស២នាក់ និងរឹបអូសកុំព្យូទ័រជាង១៨០គ្រឿង ដើម្បីបង្ក្រាបផែនការរបស់កូរ៉េខាងជើង ក្នុងការបង្កើតចំណូលពីការងារផ្នែកព័ត៌មានវិទ្យា (IT) នៅអាមេរិក។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ក្រសួងយុត្តិធម៌អាមេរិកបានឱ្យដឹងថា អាជ្ញាធរបានឆែកឆេរ ទីតាំងសង្ស័យជាកន្លែងគេហៅថា laptop farm សរុបជាង ៤០កន្លែងនៅទូទាំងរដ្ឋ Texas ដែលបានបង្កើតប្រាក់ចំណូល រហូតដល់ជាង ៣លានដុល្លារ សម្រាប់ទីក្រុងព្យុងយ៉ាង តាមរយៈការបោកបញ្ឆោតនិយោជកអាមេរិក ឱ្យជួលជនជាតិកូរ៉េខាងជើងធ្វើការងារ។

ក្រៅពីជនជាតិអាមេរិក២នាក់ ដែលត្រូវបានចាប់ខ្លួននៅរដ្ឋ Ohio និងរដ្ឋ Pennsylvania ក្រោមការចោទប្រកាន់ ពីបទលាងលុយ និងលួចអត្តសញ្ញាណ អាជ្ញាធរអាមេរិក ក៏បានចោទប្រកាន់មនុស្ស ១៤នាក់ផ្សេងទៀតផងដែរ ក្នុងប្រតិបត្តិការហៅថា Operation Lonestar Roundup ហើយក្នុងចំណោមនោះ ១០នាក់មានមូលដ្ឋាននៅឯប្រទេសចិន។

ឧបការីរដ្ឋមន្ត្រីក្រសួងយុត្តិធម៌អាមេរិកទទួលបន្ទុកសន្តិសុខជាតិ លោក John A. Eisenberg បាននិយាយដូច្នេះថា «របបដឹកនាំកូរ៉េខាងជើង ប្រើប្រាស់ផែនការអ្នកធ្វើការ IT របស់ខ្លួន ដើម្បីបង្កើនប្រាក់ចំណូលសម្រាប់គោលដៅខុសច្បាប់ផ្សេងៗ រួមទាំងការអភិវឌ្ឍសព្វាវុធ ដែលអាចក្លាយជាការគំរាមកំហែងដល់សហរដ្ឋអាមេរិក ឬសម្ព័ន្ធមិត្ត នាពេលអនាគត»។

សេចក្តីប្រកាសកាលពីថ្ងៃអង្គារ គឺជាសកម្មភាពថ្មីចុងក្រោយបំផុត ក្នុងចំណោមប្រតិបត្តិការអនុវត្តច្បាប់ជាបន្តបន្ទាប់ ដែលផ្តោតលើ ទីតាំង laptop farm នៅសហរដ្ឋអាមេរិក។ ទីតាំងទាំងនេះ គឺជាកន្លែងផ្ទុកកុំព្យូទ័រជាច្រើនគ្រឿងធ្វើការជាបណ្តាញ ដែលត្រូវបានប្រើដើម្បីបង្កើតប្រាក់ចំណូលខុសច្បាប់ សម្រាប់រដ្ឋាភិបាលកូរ៉េខាងជើង។

គួរបញ្ជាក់ថា កាលពីខែមេសា ឆ្នាំនេះ ជនជាតិអាមេរិកពីរនាក់ ឈ្មោះ Zhenxing Wang និង Kejia Wang ត្រូវបានផ្តន្ទាទោសឱ្យជាប់ពន្ធនាគារ ម្នាក់រយៈពេល៩២ខែ និងម្នាក់ទៀត១០៨ខែ ពីបទពាក់ព័ន្ធ ផែនការរយៈពេលច្រើនឆ្នាំ ដែលប្រើប្រាស់អត្តសញ្ញាណត្រូវបានលួចពីពលរដ្ឋអាមេរិក យ៉ាងតិច៨០នាក់ និងបង្កើតប្រាក់ចំណូលខុសច្បាប់សរុបជាង ៥លានដុល្លារអាមេរិក សម្រាប់រដ្ឋាភិបាលទីក្រុងព្យុងយ៉ាង៕