(វ៉ាស៉ីនតោន)៖ ប្រធានាធិបតីអាមេរិក លោក ដូណាល់ ត្រាំ បាននិយាយនៅថ្ងៃពុធ ទី១៤ ខែតុលា ឆ្នាំ២០២៦ថា ការរុករកប្រេង ឧស្ម័ន និងធនធានរ៉ែក្នុងទ្រង់ទ្រាយធំនៅកោះ Greenland របស់ប្រទេសដាណឺម៉ាក កំពុងត្រៀមចាប់ផ្តើម។​ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

លោក ត្រាំ មិនបានបង្ហាញព័ត៌មានលម្អិតអំពីផែនការខាងលើទេ ប៉ុន្តែលោកបាននិយាយដូច្នេះថា «អ្នកជំនាញមួយចំនួន បានលើកឡើងថា បរិមាណប្រេងដែលអាចទាញយកបានយ៉ាងងាយស្រួលនៅលើកោះនោះ គឺមានច្រើនលើសលប់ បើធៀបជាមួយតំបន់ផ្ទៃដីស្ទើរតែគ្រប់កន្លែងផ្សេងទៀតនៅលើពិភពលោក»។

កាលពីខែកញ្ញា សហរដ្ឋអាមេរិក ដាណឺម៉ាក និង Greenland បានចុះកិច្ចព្រមព្រៀងមួយ ក្នុងគោលបំណងបញ្ចប់ភាពតានតឹង បន្ទាប់ពីលោក ត្រាំ បានគំរាមម្តងហើយម្តងទៀតថា នឹងដណ្តើមយកការគ្រប់គ្រងកោះនេះ ដែលមានទីតាំងយុទ្ធសាស្ត្រសំខាន់ និងសម្បូរទៅដោយធនធានរ៉ែ។

ទន្ទឹមគ្នាជាមួយសេចក្តីប្រកាសខាងលើ លោក ត្រាំ បានបន្ថែមនៅក្នុងសារបង្ហោះលើបណ្តាញសង្គម Truth Social របស់លោកថា «ការវាយប្រហារណាមួយ នាពេលអនាគតលើសហរដ្ឋអាមេរិក នឹងត្រូវឆ្លងកាត់ Greenland ជាទីដែលប្រព័ន្ធការពាររបស់យើង នឹងបាញ់ទម្លាក់ជាប្រចាំនូវយន្តហោះដ្រូន មីស៊ីល ឬអាវុធគ្រប់ប្រភេទផ្សេងទៀត ដែលសូម្បីតែមិនទាន់ត្រូវបានបង្កើតឡើងនៅឡើយ»។

គួរបញ្ជាក់ថា កិច្ចព្រមព្រៀងដែលបានចុះហត្ថលេខារវាងសហរដ្ឋអាមេរិក ដាណឺម៉ាក និង Greenland នឹងពង្រីកតួនាទីរបស់យោធាអាមេរិក នៅលើដែនកោះនេះ ដោយបើកផ្លូវឱ្យមានការបង្កើតមូលដ្ឋានយោធាថ្មីចំនួន២ និងការដាក់ពង្រាយប្រព័ន្ធការពារមីស៊ីល «Golden Dome» របស់លោក ត្រាំ។ ជាមួយគ្នានេះ កិច្ចព្រមព្រៀងក៏បានបញ្ជាក់ជាថ្មី អំពីអធិបតេយ្យភាពរបស់ប្រទេសដាណឺម៉ាក និងសិទ្ធិរបស់ប្រជាជន Greenland ក្នុងការសម្រេចជោគវាសនាខ្លួនឯងផងដែរ៕