(កៀវ)៖ អ៊ុយក្រែន នៅថ្ងៃពុធនេះ បានចោទប្រកាន់ក្រុមហ៊ុន SpaceX របស់មហាសេដ្ឋី Elon Musk ថាបានដាក់កំហិតលើសេវាអ៊ីនធឺណិតផ្កាយរណប Starlink ដែលធ្វើឱ្យរាំងស្ទះដល់ប្រតិបត្តិការដ្រូនយោធារបស់ខ្លួន ខណៈរុស្ស៊ីបានបាញ់មីស៊ីលកម្ទេចស្ថានីយអគ្គិសនីជាច្រើនកន្លែង ដែលប្រធានាធិបតី លោក វ៉ូឡូឌីមៀ ហ្សេលេនស្គី ចាត់ទុកថាជាការមិនគោរពចំពោះលោក ដូណាល់ ត្រាំ យ៉ាងចំហ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃពុធ ទី១៤ ខែតុលា ឆ្នាំ២០២៦។

មន្ត្រីយោធាអ៊ុយក្រែន បានឱ្យដឹងថា ក្រុមហ៊ុន SpaceX បានកាត់ផ្ដាច់ដំណើរការឧបករណ៍ Starlink កម្រិតយោធាដែលផ្លាស់ទីក្នុងល្បឿនលឿនដោយមិនបានជូនដំណឹងជាមុន ដែលធ្វើឱ្យក្រុងកៀវមិនអាចប្រើប្រាស់ប្រព័ន្ធនេះសម្រាប់បញ្ជាដ្រូនវាយប្រហារបានឡើយ។ ទីប្រឹក្សាប្រធានាធិបតីអ៊ុយក្រែន លោក Serhiy Beskrestnov បានសរសេរលើបណ្ដាញ Telegram ថា៖ «កងទ័ពការពារជាតិរបស់យើងមិនបានទទួលការជូនដំណឹងជាមុនពីការរឹតត្បិតនេះទេ ដែលធ្វើឱ្យបេសកកម្មជាច្រើនត្រូវរអាក់រអួល»។

ចំណាត់ការរបស់ក្រុមហ៊ុន SpaceX នេះ បានបង្កឱ្យមានប្រតិកម្មយ៉ាងខ្លាំងពីប្រទេសប៉ូឡូញ ដែលជាអ្នកចេញថ្លៃសេវា Starlink ជំនួសឱ្យអ៊ុយក្រែន។ រដ្ឋមន្ត្រីការបរទេសប៉ូឡូញ លោក Radoslaw Sikorski បានសរសេរសួរលោក Elon Musk លើបណ្ដាញសង្គម X ថា៖ «តើលោកកំពុងយកផលិតផលរបស់ខ្លួន មកលេងល្បែងនយោបាយទៀតហើយមែនទេ? ក្នុងនាមជាអតិថិជនអឺរ៉ុប យើងកំពុងឃ្លាំមើលសកម្មភាពរបស់លោក»។

គួរបញ្ជាក់ថា ទំនាក់ទំនងរវាងក្រុងកៀវ និងវ៉ាស៊ីនតោន បានធ្លាក់ចុះយ៉ាងខ្លាំង ចាប់តាំងពីលោក ត្រាំ បានដកទណ្ឌកម្មលើប្រេងម៉ាស៊ូតរុស្ស៊ីកាលពីសប្តាហ៍មុន និងបានទាមទារឱ្យអ៊ុយក្រែនបញ្ឈប់ការវាយប្រហារលើរោងចក្រចម្រាញ់ប្រេងរុស្ស៊ី ព្រមទាំងជំរុញឱ្យផ្លាស់ប្តូរលោក ហ្សេលេនស្គី ចេញពីតំណែង។ ស្របពេលជាមួយគ្នានេះ ប្រភពនានាបានប្រាប់ Reuters ថា សហរដ្ឋអាមេរិកក៏បានគំរាមកាត់ផ្ដាច់ការផ្ដល់ព័ត៌មានចារកម្មសម្រាប់ប្រកាសអាសន្នជាមុនពីការវាយប្រហារដោយមីស៊ីលលើអ៊ុយក្រែនផងដែរ ដើម្បីបង្ខំឱ្យក្រុងកៀវផ្អាកការវាយប្រហារលើរោងចក្រប្រេងរុស្ស៊ី៕