(ហ្ស៊េរុយសាឡិម)៖ នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បានឱ្យដឹងនៅថ្ងៃពុធនេះថា លោកមិនគាំទ្រឱ្យមានការវាយប្រហារទុកជាមុនលើប្រទេសអ៊ីរ៉ង់ មុនការបោះឆ្នោតនៅអ៊ីស្រាអែលនាថ្ងៃទី២៧ ខែតុលា ខាងមុខនេះទេ ប៉ុន្តែបានព្រមានក្រុងតេអេរ៉ង់ និងក្រុមសម្ព័ន្ធមិត្ត កុំឱ្យបើកការវាយប្រហារលើអ៊ីស្រាអែលឱ្យសោះ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃពុធ ទី១៤ ខែតុលា ឆ្នាំ២០២៦។

ថ្លែងប្រាប់វិទ្យុកងទ័ពអ៊ីស្រាអែល ជុំវិញការចោទប្រកាន់ពីគូប្រជែងនយោបាយថា លោកចង់បង្កជម្លោះយោធាមុនការបោះឆ្នោត លោក ណេតាន់យ៉ាហ៊ូ បានបដិសេធថា៖ «វាមិនមែនជារឿងចំណេញសម្រាប់យើងទេ។ សូម្បីតែអ៊ីរ៉ង់បាញ់មីស៊ីលមកលើយើងមុន ក៏ពួកគេនៅតែទម្លាក់កំហុសលើខ្ញុំដែរ»។ យ៉ាងណាក្ដី លោកបានព្រមានថា អ៊ីស្រាអែលនឹងវាយបកវិញយ៉ាងខ្លាំងក្លា ប្រសិនបើរងការវាយប្រហារ ហើយពេលសួរពីរឿងជួយអារ៉ាប៊ីសាអូឌីតទប់ទល់នឹងក្រុមហ៊ូទី (Houthi) លោកគ្រាន់តែបញ្ជាក់ថា ប្រទេសជាច្រើននៅមជ្ឈិមបូព៌ាកំពុងងាកមករកអ៊ីស្រាអែល បន្ទាប់ពីឃើញជោគជ័យរបស់ខ្លួន។

ទន្ទឹមគ្នានេះ រដ្ឋមន្ត្រីការពារជាតិអ៊ីស្រាអែល លោក Israel Katz បានថ្លែងចេញពីតំបន់សន្តិសុខដែលកងទ័ពអ៊ីស្រាអែលកំពុងកាន់កាប់នៅភាគខាងត្បូងលីបង់ ដោយព្រមានថា ប្រសិនបើក្រុមហេសបូឡា (Hezbollah) ហ៊ានវាយប្រហារអ៊ីស្រាអែល ក្រុមនេះនឹងរងការវាយបកយ៉ាងដំណំ និងបាត់បង់ទឹកដីបន្ថែមទៀតក្នុងតំបន់ Nabatieh និង Litani ហើយសូម្បីតែមូលដ្ឋានធំក្នុងរដ្ឋធានីបេរ៉ូត ក៏មិនអាចគេចផុតឡើយ។

គួរបញ្ជាក់ថា សង្គ្រាមរវាងអាមេរិក និងអ៊ីរ៉ង់ បានផ្ទុះឡើងតាំងពីថ្ងៃទី២៨ ខែកុម្ភៈ ក្រោយពេលអាមេរិក និងអ៊ីស្រាអែល បើកការវាយប្រហារលើអ៊ីរ៉ង់ ប៉ុន្តែអ៊ីស្រាអែល និងអ៊ីរ៉ង់ មិនបានបាញ់ប្រហារដាក់គ្នាទៀតឡើយចាប់តាំងពីខែមិថុនាមក។ ដោយឡែក នៅលីបង់វិញ កងទ័ពអ៊ីស្រាអែលបានបើកការវាយប្រហារតាមអាកាស និងវាយលុកថ្មើរជើងចូលភាគខាងត្បូងប្រទេសនេះ បន្ទាប់ពីក្រុមហេសបូឡាបានបាញ់ផ្លោងចូលអ៊ីស្រាអែលដើម្បីសងសឹកឱ្យក្រុងតេអេរ៉ង់៕