(ឡុងដ៍)៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គីបាននិយាយថារូបលោកមានអារម្មណ៍ហាក់ដូចជាត្រូវបានគេក្បត់ បន្ទាប់ពីប្រធានាធិបតីអាមេរិក លោក ដូណាល់ ត្រាំ បានប្រកាសពីការឈានដល់កិច្ចព្រមព្រៀងថ្មីមួយដើម្បីទិញប្រេងពីរុស្ស៉ីកាលពីសប្ដាហ៍មុន។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

លោក ហ្សេលេនស្គី ធ្វើការកត់សម្គាល់បែបនេះនៅក្នុងបទសម្ភាសន៍ជាមួយពិធីករដ៏ល្បីឈ្មោះ លោក Piers Morgan កាលពីថ្ងៃពុធ ទី១៤ ខែតុលា ឆ្នាំ២០២៦។ «ជាការពិតណាស់ ខ្ញុំមានអារម្មណ៍ហាក់ដូចជាត្រូវបានគេក្បត់»។ នេះជាការលើកឡើងរបស់លោក ហ្សេលេនស្គី ឆ្លើយតបទៅនឹងសំណួររបស់លោក Piers Morgan ថាតើរូបលោកត្រូវបានក្បត់ដោយរដ្ឋបាលលោក ដូណាល់ ត្រាំ ដែរឬក៏យ៉ាងណា? តាមលោក ហ្សេលេនស្គី កិច្ចព្រមព្រៀងប្រេងគឺជាជ័យជម្នះមួយសម្រាប់វិមានក្រឹមឡាំង ហើយវាពិតជារឿងដ៏សោកសៅមួយដែលអ៊ុយក្រែនកំពុងបាត់បង់ដៃគូដ៏រឹងមាំមួយ។

តែទោះជាយ៉ាងណាក៏ដោយ លោក ហ្សេលេនស្គី បានទទូចថាអ៊ុយក្រែននៅតែពឹងផ្អែកលើភាពជាដៃគូជាមួយសហរដ្ឋអាមេរិក និងបានជំរុញ ឱ្យក្រុមហ៊ុនអាមេរិក Starlink អនុញ្ញាតឱ្យអ៊ុយក្រែនប្រើប្រាស់ប្រព័ន្ធផ្កាយរណបយ៉ាងពេញលេញ បន្ទាប់ពីទីក្រុងកៀវបានរាយការណ៍ពីការធ្លាក់ចុះល្បឿនអ៉ីនធើណិត។

គួរបញ្ជាក់ថា កាលពីសប្ដាហ៍មុន លោក ដូណាល់ ត្រាំ បានបង្ហោះសារលើបណ្ដាញទំនាក់ទំនងសង្គមថាលោកប្រធានាធិបតីរុស្ស៉ី វ្ល៉ាឌីមៀ ពូទីន បានយល់ព្រមផ្គត់ផ្គង់ប្រេងម៉ាស៊ូត ទៅកាន់ផ្សារ ខណៈលោក ត្រាំ កំពុងព្យាយាមបញ្ចុះតម្លៃថាមពល នៅមុនការបោះឆ្នោតពាក់កណ្ដាលអាណត្តិចូលមកដល់នៅខែវិច្ឆិកាខាងមុខ៕