(គូឡាឡាំពួរ)៖ រដ្ឋមន្រ្តីក្រសួងអប់រំម៉ាឡេស៉ី លោកស្រី Fadhlina Sidek បាននិយាយកាលពីថ្ងៃពុធសប្តាហ៍នេះថា កម្រិតកំណត់នៃគុណភាពខ្យល់ សម្រាប់ការបិទសាលារៀននឹងត្រូវបានដំឡើង ដើម្បីធ្វើឱ្យគោលការណ៍ណែនាំរបស់ក្រសួង ស្របគ្នាជាមួយផែនការសកម្មភាពជាតិស្តីពីផ្សែងអ័ព្ទរបស់ប្រទេស។ នេះបើយោងតាមការចេញផ្សាយដោយសារព័ត៌មាន CNA នៅថ្ងៃព្រហស្បតិ៍ ទី១៥ ខែតុលា ឆ្នាំ២០២៦។

សាលារៀននឹងត្រូវបិទនៅក្នុងតំបន់ដែលសន្ទស្សន៍គុណភាពខ្យល់ (API) មានកម្រិតលើសពី ២០០ ខណៈសកម្មភាពនៅខាងក្រៅ នឹងត្រូវផ្អាកពេលដែលកម្រិតសន្ទស្សន៍ឡើងដល់ ១០០ ឬខ្ពស់ជាងនេះ។ យោងតាមគោលការណ៍ណែនាំពីមុនរបស់ក្រសួងអប់រំ សាលារៀននានានៅក្នុងតំបន់ដែលមាន API លើសពី ១៨០ ឬនៅតែបន្តលើសពី ១៥០ រយៈពេល ៣ថ្ងៃជាប់ៗគ្នា តម្រូវឱ្យផ្អាកដំណើរការ។

លោកស្រី Fadhlina និយាយថា ក្រសួងគាំទ្រជំហររបស់ទីភ្នាក់ងារជាតិគ្រប់គ្រងគ្រោះមហន្តរាយ ដែលថាការគ្រប់គ្រងបញ្ហាផ្សែងអ័ព្ទគួរតែផ្អែកលើផែនការថ្នាក់ជាតិ។ លោកស្រី Fadhlina បានកត់សម្គាល់ថា API អាចប្រែប្រួលក្នុងរយៈពេលខ្លីៗ ដូច្នេះការសម្រេចចិត្តបិទសាលារៀនជាមុនរយៈពេលច្រើនថ្ងៃ ដោយមិនពិចារណាលើស្ថានភាពប្រែប្រួល អាចធ្វើឱ្យសិស្សខាតពេលរៀនសូត្រ។

គួរបញ្ជាក់ថា ចាប់តាំងពីសប្តាហ៍មុន ម៉ាឡេស៉ី បានដាក់ចេញ និងអនុវត្តវិធានការផ្អាកដំណើរការសាលារៀននានាជាបបណ្តោះអាសន្ន ដោយសារតែគុណភាពខ្យល់ធ្លាក់ចុះ ដែលបណ្តាលមកពីផ្សែងអ័ព្ទចេញពីភ្លើងឆេះព្រៃក្នុងប្រទេសជិតខាង គឺឥណ្ឌូណេស៉ី។ កាលពីថ្ងៃដើមសប្តាហ៍នេះ ក្រសួងអប់រំម៉ាឡេស៉ី បានដាក់ចេញនូវវិធីសាស្ត្របិទសាលារៀនទៅតាមភាពជាក់ស្តែង ខណៈដែលមាតាបិតាសិស្សទាមទារឱ្យមានភាពច្បាស់លាស់ជាងនេះ អំឡុងពេលដែលស្ថានភាពផ្សែងអ័ព្ទកាន់តែធ្ងន់ធ្ងរឡើង។

មាតាបិតាសិស្សមមួយចំនួន ថែមទាំងបានស្នើឱ្យបិទសាលារៀនរយៈពេលជាច្រើនថ្ងៃជាប់ៗគ្នា ដើម្បីសម្រួលដល់ការរៀបចំកិច្ចការផ្សេងៗ។ យ៉ាងនេះក្តីរដ្ឋមន្រ្តីអប់រំ ថាការសម្រេចចិត្តនានាត្រូវតែគិតគូរពីគុណភាពខ្យល់ ដែលប្រែប្រួលមិនទៀងទាត់ និងផលរំខានដល់ការរៀនសូត្ររបស់សិស្ស ដែលអាចកើតឡើងពីការបិទសាលារៀនក្នុងរយៈពេលយូរ៕