(តូក្យូ)៖ នៅថ្ងៃព្រហស្បតិ៍ ទី១៥ ខែតុលា ឆ្នាំ២០២៦ ជប៉ុនបានបដិសេធថា ខ្លួនមិនបានធ្វើសកម្មភាពចារកម្មនៅក្នុងប្រទេសរុស្ស៊ីទេ បន្ទាប់ពីទីក្រុងមូស្គូចាប់ខ្លួនអ្នកសារព័ត៌មានជប៉ុនម្នាក់ ក្រោមការសង្ស័យធ្វើចារកម្ម។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

នៅពេលត្រូវបានសាកសួរ អំពីការចោទប្រកាន់របស់រុស្ស៊ី នាយករដ្ឋមន្ត្រីជប៉ុន លោកស្រី Sanae Takaichi បានប្រាប់អ្នកសារព័ត៌មានថា «មិនមានការពិតបែបនេះទេ»។ លោកស្រីបានបន្ថែមថា «ការការពារពលរដ្ឋជប៉ុន គឺមានសារសំខាន់ខ្លាំងណាស់នៅពេលនេះ ហើយយើងមានបំណងផ្តោតការខិតខំប្រឹងប្រែងរបស់យើងលើបញ្ហានេះ»។

ក្នុងរយៈពេលប៉ុន្មានឆ្នាំចុងក្រោយ រុស្ស៊ីបានចាប់ខ្លួនពលរដ្ឋបរទេសជាច្រើននាក់ មកពីប្រទេសដែលខ្លួនហៅថា «ប្រទេសអមិត្ត» ដោយចោទប្រកាន់ពួកគេថា បានធ្វើការឱ្យទីភ្នាក់ងារចារកម្មរបស់ប្រទេសលោកខាងលិច។ កាលពីថ្ងៃអង្គារ ក្រសួងការបរទេសរុស្ស៊ី បានបញ្ជាក់ថា អ្នកសារព័ត៌មានដែលត្រូវបានចាប់ខ្លួននោះ មានឈ្មោះ Yuki Imai មកពីស្ថាប័នកាសែត Hokkaido Shimbun។ អ្នកនាំពាក្យក្រសួងបាននិយាយថា បុគ្គលម្នាក់នោះត្រូវបានចោទប្រកាន់ពីបទ «ធ្វើសកម្មភាពចារកម្មនៅលើទឹកដីរុស្ស៊ី»។

ជាការឆ្លើយតប ទីក្រុងតូក្យូបានកោះហៅឯកអគ្គរដ្ឋទូតរុស្ស៊ី ដើម្បីតវ៉ាចំពោះការចាប់ខ្លួន ខណៈក្រសួងការបរទេសជប៉ុន បានទាមទារឱ្យមានការប្រព្រឹត្តដាក់អ្នកកាសែតខាងលើ ដោយយុត្តិធម៌និងមិនលម្អៀង។ នៅថ្ងៃព្រហស្បតិ៍នេះ លោកស្រី Takaichi បាននិយាយថា ព័ត៌មានលម្អិតអំពីការចោទប្រកាន់ នៅមិនទាន់ច្បាស់លាស់នៅឡើយ។ លោកស្រី បានថ្លែងដូច្នេះថា «ច្បាប់ក្នុងស្រុករបស់ប្រទេសនីមួយៗមានភាពខុសគ្នា ដូច្នេះយើងមិនទាន់ដឹងពីព័ត៌មានលម្អិត នៃអ្វីដែលពួកគេហៅថា ការចោទប្រកាន់នោះទេ។ ទោះជាយ៉ាងណា ជប៉ុននឹងបញ្ជាក់ជំហររបស់ខ្លួនយ៉ាងម៉ឺងម៉ាត់»។

ទីភ្នាក់ងារសន្តិសុខ FSB របស់រុស្ស៊ី បានប្រកាសថា ជនជាតិជប៉ុនម្នាក់ ត្រូវបានចាប់ខ្លួននៅលើកោះ Sakhalin ក្នុងតំបន់ចុងបូព៌ារបស់រុស្ស៊ី ដែលស្ថិតនៅក្បែរប្រជុំកោះ ដែលមានបញ្ហាវិវាទនឹងគ្នា ប៉ុន្តែមិនបានបញ្ជាក់ឈ្មោះបុគ្គលនោះទេ។ FSB បានអះអាងថា បុគ្គលរូបនោះ បានធ្វើការឱ្យទីភ្នាក់ងារចារកម្មជប៉ុន ដើម្បីប្រមូលព័ត៌មាន អំពីសមត្ថភាពការពារជាតិរបស់រុស្ស៊ី។

គួរបញ្ជាក់ថា ទីក្រុងមូស្គូ និងទីក្រុងតូក្យូ បានជាប់ជំពាក់ក្នុងបញ្ហាជម្លោះទឹកដីអស់ជាច្រើនទសវត្សរ៍មកហើយ ជុំវិញអធិបតេយ្យភាព លើក្រុមកោះមួយនៅក្នុងមហាសមុទ្រប៉ាស៊ីហ្វិក ដែលស្ថិតនៅក្បែរឆ្នេរភាគឦសានរបស់ជប៉ុន និងភាគនិរតីនៃតំបន់ Sakhalin របស់រុស្ស៊ី។ កោះ Kuril ដែលជប៉ុនហៅថា «ដែនដីភាគខាងជើង» ស្ថិតក្រោមការគ្រប់គ្រងរបស់រុស្ស៊ី ចាប់តាំងពីចុងបញ្ចប់ នៃសង្គ្រាមលោកលើកទី២ នៅពេលដែលសហភាពសូវៀត បានដណ្តើមកាន់កាប់កោះទាំងនោះ៕