(វ៉ាស៊ីនតោន)៖ ក្រុមអ្នកស្រាវជ្រាវចំនួន ២ ស្ថាប័ន បានឱ្យដឹងនៅថ្ងៃព្រហស្បតិ៍ថា ក្រុមហ៊ុនផ្សាយពាណិជ្ជកម្មឌីជីថលអ៊ីស្រាអែល Discover-Tech បានលួចតាមដានអ្នកប្រើប្រាស់អ៊ីនធឺណិត តាមរយៈបណ្តាញផ្សាយពាណិជ្ជកម្មអនឡាញដ៏ធំមួយ ដើម្បីកំណត់មុខសញ្ញា និងលួចជ្រៀតចូល (Hack) ក្នុងឧបករណ៍របស់ពួកគេ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃព្រហស្បតិ៍ ទី១៥ ខែតុលា ឆ្នាំ២០២៦។

តាមរបាយការណ៍ពីក្រុមឃ្លាំមើលសន្តិសុខសាយប័រកាណាដា Citizen Lab និងក្រុមហ៊ុន Confiant នៅញូវយ៉ក សេវាកម្មរបស់ Discover-Tech បានជួយឱ្យក្រុមហ៊ុនផលិតមេរោគចារកម្ម (Spyware) អ៊ីស្រាអែលឈ្មោះ Candiru ដែលស្ថិតក្នុងបញ្ជីខ្មៅរបស់អាមេរិក រួមទាំងក្រុមហ៊ុនចារកម្មអ៊ីស្រាអែលផ្សេងទៀត អាចចូលប្រើប្រាស់បណ្តាញផ្សាយពាណិជ្ជកម្មរបស់ក្រុមហ៊ុនធំៗដូចជា Google, Comcast និង Yandex របស់រុស្ស៊ី។ ផ្ទាំងពាណិជ្ជកម្មរបស់ Discover-Tech ដែលភាគច្រើនបង្ហាញពីផលិតផលធម្មតាៗដូចជាទូរស័ព្ទ ឬកាស បានសាយភាយទៅដល់គេហទំព័រជាង ១២០,០០០ និងកម្មវិធីទូរស័ព្ទចំនួន ៧៥,០០០ ដោយគ្រាន់តែផ្ទាំងពាណិជ្ជកម្មនោះលោតបង្ហាញលើអេក្រង់ គេអាចកំណត់អត្តសញ្ញាណ តាមដានទីតាំង ទាញយកលេខទូរស័ព្ទ និងជួយបង្កប់មេរោគចារកម្មរបស់ Candiru ចូលទៅក្នុងទូរស័ព្ទរបស់ជនរងគ្រោះតែម្តង។

គួរបញ្ជាក់ថា របកគំហើញនេះបានលាតត្រដាងឱ្យឃើញថា អាជីវកម្មផ្សាយពាណិជ្ជកម្មអនឡាញ អាចត្រូវគេយកទៅប្រើជាមធ្យោបាយធ្វើចារកម្មទ្រង់ទ្រាយធំយ៉ាងងាយស្រួល ដូចដែលលោក Wolfie Cristl អ្នកស្រាវជ្រាវជាន់ខ្ពស់នៃ Citizen Lab បានព្រមានថា៖ «របៀបដែលប្រព័ន្ធផ្សាយពាណិជ្ជកម្មអនឡាញដំណើរការសព្វថ្ងៃ គឺជាការគំរាមកំហែងផ្នែកសន្តិសុខជាប្រព័ន្ធ ចំពោះទាំងរដ្ឋាភិបាល វិស័យឯកជន សង្គមស៊ីវិល និងមនុស្សគ្រប់គ្នា»៕