(ប៉េកាំង)៖ រដ្ឋមន្ត្រីការបរទេសចិន លោក Wang Yi បានប្រាប់ប្រធានាធិបតីអ៉ីស្រាអែល លោក Isaac Herzog ថា អ៉ីស្រាអែលគួរតែបញ្ឈប់ និងលុបចោលនូវអ្វីដែលរូបលោកហៅថា «ការបង្កើតការតាំងទីលំនៅដោយបង្ខំ» ក្នុងតំបន់ West Bank ដែលជាដែនដីប៉ាឡេស្ទីន ស្ថិតក្រោមការត្រួតត្រារបស់អ៉ីស្រាអែល។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃសុក្រ ទី១៦ ខែតុលា ឆ្នាំ២០២៦។

ក្នុងសេចក្តីថ្លែងការណ៍មួយនាថ្ងៃសុក្រនេះ ក្រសួងការបរទេសចិន បានឱ្យដឹងថា ក្នុងជំនួបជាមួយលោក Herzog នៅឯប្រទេសអាស៊ែបៃហ្សង់ លោក Wang បាននិយាយថា ប្រទេសចិនតែងតែប្រកាន់ជំហរថា បញ្ហាប៉ាឡេស្ទីន គឺជារឿងអយុត្តិធម៌ប្រវត្តិសាស្ត្រដ៏ធំបំផុត ក្នុងសតវត្សរ៍នេះ។ លោក Wang បានបញ្ជាក់ថា ការជំរុញសន្តិភាព និងការផ្សះផ្សា នៅក្នុងតំបន់ គឺជា មូលដ្ឋានគ្រឹះនៃគោលនយោបាយរបស់ចិន ចំពោះមជ្ឈិមបូព៌ា។

លោក Wang បានបន្ថែមថា ប្រទេសចិនជឿជាក់ថា ដំណោះស្រាយរដ្ឋពីរ គឺជាមាគ៌ាដ៏ត្រឹមត្រូវ សម្រាប់ដោះស្រាយបញ្ហានេះ ហើយអាទិភាពបន្ទាន់នាពេលបច្ចុប្បន្ន គឺការអនុញ្ញាតឱ្យយ៉ាងពេញ ក្នុងការចូលទៅកាន់តំបន់ហ្កាហ្សា ដើម្បីកុំឱ្យមហន្តរាយវិបត្តិមនុស្សធម៌នៅទីនោះ កាន់តែរីករាលដាល។

លោកប្រមុខការទូតចិន បាននិយាយទៀតថា ក្នុងពេលជាមួយគ្នានេះ អ៉ីស្រាអែលគួរតែបញ្ឈប់ និងលុបចោល ការបង្កើតការតាំងទីលំនៅដោយបង្ខំ ក្នុងតំបន់ West Bank។ លោក Wang បានសង្កត់ធ្ងន់ថា ប្រទេសចិនមានឆន្ទៈធ្វើការជាមួយសហគមន៍អន្តរជាតិ ដើម្បីជំរុញឱ្យគ្រប់ភាគីវិលត្រឡប់មករកកិច្ចសន្ទនា និងការពិគ្រោះយោបល់វិញឱ្យបានឆាប់ តាមដែលអាចធ្វើទៅបាន ព្រមទាំងស្វែងរកដំណោះស្រាយនយោបាយចំពោះជម្លោះនេះ។

គួរបញ្ជាក់ថា ប្រទេសចិនបានគាំទ្របុព្វហេតុរបស់ប៉ាឡេស្ទីនជាយូរមកហើយ ហើយទីក្រុងប៉េកាំង ក៏មានទំនាក់ទំនងជិតស្និទ្ធជាមួយអ៉ីរ៉ង់ ដែលជាគូសត្រូវធំជាងគេបំផុតរបស់អ៉ីស្រាអែល នៅក្នុងតំបន់ផងដែរ៕