(បាងកក)៖ កាលពីថ្ងៃព្រហស្បតិ៍ ទី១៥ ខែតុលា ឆ្នាំ២០២៦ អាល្លឺម៉ង់ បានព្រមានប្រឆាំងនឹងកិច្ចខិតខំប្រឹងប្រែង ដើម្បីនាំប្រទេសរុស្ស៊ីត្រឡប់មកកាន់ឆាកអន្តរជាតិវិញ ខណៈព្រីតថេន (ចក្រភពអង់គ្លេស) បានអំពាវនាវឱ្យរឹតបន្តឹងទណ្ឌកម្មលើ វិស័យដឹកជញ្ជូនតាមសមុទ្ររបស់រុស្ស៊ី ចំពេលមានការចោទជាសំណួរកាន់តែច្រើន អំពីភាពរឹងមាំនៃការគាំទ្ររបស់សហរដ្ឋអាមេរិក ចំពោះអ៊ុយក្រែន។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

រដ្ឋមន្ត្រីហិរញ្ញវត្ថុរុស្ស៊ី លោក Anton Siluanov ក្នុងសប្តាហ៍នេះ បានមកចូលរួមកិច្ចប្រជុំរដ្ឋមន្ត្រីហិរញ្ញវត្ថុ និងទេសាភិបាលធនាគារកណ្តាល នៃក្រុមប្រទេស G20 នៅទីក្រុងបាងកក ពោលគឺជាង១ខែបន្ទាប់ពីសហរដ្ឋអាមេរិក ដែលជាម្ចាស់ផ្ទះរៀបចំកិច្ចប្រជុំ G20 ឆ្នាំនេះ ទើបតែបានទទួលស្វាគមន៍ការបង្ហាញវត្តមានដោយផ្ទាល់លើកដំបូងរបស់លោក នៅ G20 ក្នុងកិច្ចប្រជុំមួយនៅទីក្រុង Asheville រដ្ឋ North Carolina គិតចាប់តាំងពីរុស្ស៊ីបានឈ្លានពានអ៊ុយក្រែន ។

រដ្ឋមន្ត្រីហិរញ្ញវត្ថុអាល្លឺម៉ង់ លោក Lars Klingbeil បានប្រាប់អ្នកសារព័ត៌មានដូច្នេះថា «ខ្ញុំសង្កេតឃើញថា មានការប៉ុនប៉ង ជាពិសេសពីសំណាក់សហរដ្ឋអាមេរិក ដើម្បីនាំរុស្ស៊ីត្រឡប់មកកាន់ឆាកអន្តរជាតិវិញ»។ លោកបានបន្ថែមថា «ខ្ញុំនិងប្រទេសអឺរ៉ុបផ្សេងទៀត នឹងមិនធ្វើដូចជាគ្មានអ្វីកើតឡើង ហើយទទួលស្គាល់ថា រុស្ស៊ីកំពុងត្រឡប់មកចូលរួមក្នុងក្រុម G20 ក្នុងនាមជាសមាជិកធម្មតា ហើយអង្គុយនៅតុប្រជុំជាថ្មីនោះទេ»។

គួរបញ្ជាក់ថា ចាប់តាំងពីការបង្កសង្រ្គាមឈ្លានពាននៅអ៊ុយក្រែន កាលពីខែកុម្ភៈ ឆ្នាំ២០២២មក រុស្ស៉ីបានទទួលរងភាពឯកោផ្នែកការទូតយ៉ាងខ្លាំង ក្នុងនៅក្រុម G20 ទោះបីនៅតែជាសមាជិកក៏ដោយ។ អនុរដ្ឋមន្ត្រីហិរញ្ញវត្ថុអាមេរិក លោកស្រី Erin Browne បាននិយាយថា ទីក្រុងវ៉ាស៊ីនតោនគាំទ្រការចូលរួមរបស់រុស្ស៊ី ហើយបានកត់សម្គាល់ថា បណ្តាសម្ព័ន្ធមិត្តមិនបានលើកឡើងដោយផ្ទាល់ អំពីកង្វល់របស់ពួកគេ មកកាន់គណៈប្រតិភូអាមេរិក ក្នុងសប្តាហ៍នេះទេ។ លោកស្រីបាននិយាយបន្ថែមថា ប្រធានាធិបតីអាមេរិក លោក ដូណាល់ ត្រាំ នៅតែប្តេជ្ញាចិត្តក្នុងការស្វែងរកដំណោះស្រាយដោយសន្តិវិធី ដើម្បីបញ្ចប់សង្គ្រាមរវាងរុស្ស៊ី និងអ៊ុយក្រែន៕