អ៊ីរ៉ង់ លួចនាំចេញឧស្ម័ន LPG និងប្រេងយន្តហោះបានមួយចំនួន បើទោះជារងការបិទខ្ទប់ផ្លូវទឹកពីអាមេរិក
16-10-2026 22:34
(ដាម៉ាស)៖ ទិន្នន័យចរាចរណ៍ដែនសមុទ្រ និងប្រភពមន្ត្រីសន្តិសុខ បានបង្ហាញនៅថ្ងៃសុក្រនេះថា ប្រទេសអ៊ីរ៉ង់បានលួចនាំចេញឧស្ម័នប្រេងកាតរាវ (LPG) និងប្រេងឥន្ធនៈយន្តហោះបានមួយចំនួន ចាប់តាំងពីខែកក្កដាមក បើទោះបីជាកំពុងរងការបិទខ្ទប់ផ្លូវទឹកយ៉ាងតឹងរ៉ឹងពីកងទ័ពជើងទឹកសហរដ្ឋអាមេរិកក៏ដោយ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី១៦ ខែតុលា ឆ្នាំ២០២៦។
ប្រភពសន្តិសុខដែនសមុទ្រចំនួន ៤ នាក់ដែលតាមដានចលនាប្រេងនៅតំបន់ឈូងសមុទ្រ បានបង្ហើបប្រាប់ Reuters ថា ក្នុងប៉ុន្មានសប្តាហ៍ចុងក្រោយនេះ ក្រុងតេអេរ៉ង់បានលាក់បាំងទំនិញទាំងនោះ ដោយធ្វើការផ្ទេរពីកប៉ាល់មួយទៅកប៉ាល់មួយ (Ship-to-Ship) លាយឡំជាមួយកប៉ាល់របស់ប្រទេសផលិតប្រេងដទៃទៀតនៅក្បែរឆ្នេរសមុទ្រប្រទេសអូម៉ង់។ ការវិភាគរបស់អង្គការឃ្លាំមើល United Against Nuclear Iran (UANI) បានរកឃើញថាកប៉ាល់ដឹកហ្គាសយ៉ាងហោចណាស់ ៨ គ្រឿងដែលផ្ទុកឧស្ម័ន LPG របស់អ៊ីរ៉ង់ប្រមាណ ៤.១ លានបារ៉ែល បានចាកចេញពីឈូងសមុទ្រអូម៉ង់ តាំងពីពាក់កណ្តាលខែកក្កដា ដោយភាគច្រើនបានធ្វើដំណើរឆ្ពោះទៅប្រទេសម៉ាឡេស៊ី ដើម្បីផ្ទេរបន្តទៅកាន់ប្រទេសចិន។
ក្រៅពីឧស្ម័ន LPG រូបភាពផ្កាយរណប និងការវិភាគរបស់ក្រុមហ៊ុន SynMax បានបង្ហាញថាកប៉ាល់មួយគ្រឿងទៀតដែលដឹកប្រេងយន្តហោះរបស់អ៊ីរ៉ង់ បានធ្វើដំណើរទៅដល់ប្រទេសមីយ៉ាន់ម៉ាកាលពីខែកញ្ញាកន្លងទៅ។ អាមេរិកធ្លាប់បានដាក់ទណ្ឌកម្មលើវិស័យប្រេងឥន្ធនៈយន្តហោះរបស់មីយ៉ាន់ម៉ាតាំងពីឆ្នាំ២០២៣ ដោយចោទប្រកាន់ថាយោធាមីយ៉ាន់ម៉ាបានប្រើប្រាស់ប្រេងទាំងនោះសម្រាប់ការទម្លាក់គ្រាប់បែកលើជនស៊ីវិល ខណៈរបបយោធាមីយ៉ាន់ម៉ាតែងតែបដិសេធ។
គួរបញ្ជាក់ថា ទោះបីជាបរិមាណនាំចេញទាំងនេះមានចំនួនតិចតួចធៀបនឹងសមត្ថភាពនាំចេញកាលពីមុនក្ដី ប៉ុន្តែវាជាភស្តុតាងដ៏កម្រមួយដែលបង្ហាញថា អ៊ីរ៉ង់នៅតែអាចរកវិធីទម្លុះការបិទខ្ទប់ផ្លូវសមុទ្ររបស់អាមេរិកបាន ខណៈកប៉ាល់ដឹកប្រេងភាគច្រើនលើសលប់របស់អ៊ីរ៉ង់ ត្រូវបានកងកម្លាំងអាមេរិកស្ទាក់ចាប់ និងបង្វែរទិសដៅចេញពីតំបន់ឈូងសមុទ្រអូម៉ង់៕
