(មូស្គូ)៖ នៅក្នុងពេលសន្ទនាតាមទូរស័ព្ទកាលពីថ្ងៃសុក្រ ទី១៦ ខែតុលា ប្រធានាធិបតីរុស្ស៉ី លោក វ្ល៉ាឌីមៀ ពូទីន បានប្រាប់សម្តេចប៉ាប Leo ថាលោកគាំទ្រគំនិតផ្តួចផ្តើមរបស់បុរីវ៉ាទីកង់ដែលចង់បញ្ជូនសម្ភារផ្គត់ផ្គង់ទៅឱ្យជនស៉ីវិលនៅក្នុងទីក្រុង Oleshky ភាគខាងត្បូងប្រទេសអ៊ុយក្រែន ដែលស្ថិតក្រោមការគ្រប់គ្រងរបស់រុស្ស៉ី ហើយថាលោកក៏បានត្រៀមខ្លួនរួចរាល់ក្នុងការសហការលើបញ្ហានេះផងដែរ។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន Reuters។

បុរីវ៉ាទីកង់ បានឱ្យដឹងថា សម្តេចប៉ាប Leo បានស្នេីលោក ពូទីន យល់ព្រមលើបទឈប់បាញ់មួយ ដើម្បីអនុញ្ញាតឱ្យមានការនាំជំនួយសង្គ្រោះបឋម និងស្បៀងអាហារចូលទៅក្នុងទីក្រុងនោះ ព្រមទាំងអនុញ្ញាតឱ្យប្រជាជនស៉ីវិលអាចជម្លៀសខ្លួនចេញដោយស្ម័គ្រចិត្ត។ តាមសេចក្តីថ្លែងការពីវិមានក្រឹមឡាំង «បំណងរបស់បុរីវ៉ាទីកង់ក្នុងការជួយបង្កើតលក្ខខណ្ឌចាំបាច់នានា ដើម្បីធានាសុវត្ថិភាពរបស់ប្រជាជនក្នុងទីក្រុងនោះ និងរៀបចំការផ្គត់ផ្គង់សម្ភារៈចាំបាច់នានា គឺទទួលបានការគាំទ្រហើយ»។

គួរបញ្ជាក់ថា ទាំងរុស្ស៉ី និងអ៊ុយក្រែន សុទ្ធតែចោទប្រកាន់គ្នាទៅវិញទៅមកថា បានរារាំងការផ្គត់ផ្គង់ជំនួយទៅកាន់ប្រជាជននៅក្នុងទីក្រុង Oleshky ដែលកងកម្លាំងអ៊ុយក្រែនចង់ដណ្តើមយកមកវិញពីដៃរុស្ស៉ី និងជាទីដែលមានសេចក្តីរាយការណ៍អំពីវិបត្តិមនុស្សធម៌៕