(ប៉េកាំង)៖ កាសែតចិន Beijing Daily បានរាយការណ៍ថារដ្ឋធានីប៉េកាំងរបស់ចិនត្រូវបានរំពឹងថានឹងក្លាយជាសង្គាមមួយសម្បូរដោយមនុស្សចាស់នៅឆ្នាំ២០៣៥ ដោយប្រមាណ ១ភាគ៣នៃប្រជាជនរស់នៅក្នុងរដ្ឋធានីនឹងមានអាយុចាប់ពី ៦០ឆ្នាំឡើងទៅ។ នេះបើតាមការដកស្រង់ចេញផ្សាយដោយទីភ្នាក់ងារសារព័ត៌មាន Reuters។

តាមការវាយតម្លៃរបស់ Reuters អ្នករៀបចំគោលនយោបាយចិនបានចាត់ទុកថាការរៀបចំផែនការប្រជាជន គឺជាគន្លឹះដ៏សំខាន់មួយនៃយុទ្ធសាស្ត្រសេដ្ឋកិច្ចរបស់ចិន ហើយក្នុងឆ្នាំ២០២៦នេះ រដ្ឋាភិបាលចិនកំពុងប្រឈមមុខនឹងការចំណាយថវិកា ១៨០ពាន់លានយ័ន ឬស្មើនឹង ២៦,៩២ពាន់លានដុល្លារដើម្បីជំរុញអត្រាកំណើត។ ក្នុងសេចក្ដីរាយការណ៍មួយកាលពីថ្ងៃទី១៧ ខែតុលា ឆ្នាំ២០២៦ កាសែត Beijing Daily បានឱ្យដឹងថាមនុស្សម្នាក់ក្នុងចំណោម៣នាក់រស់នៅក្នុងរដ្ឋធានីប៉េកាំង នឹងមានអាយុចាប់ពី៦០ឆ្នាំឡើងទៅ នៅឆ្នាំ២០៣៥។ តាមកាសែតនេះដដែល កាលពីចុងឆ្នាំ២០២៥ ប៉េកាំងមានប្រជាជន៥,២៩លាននាក់ដែលមានអាយុចាប់ពី ៦០ឆ្នាំឡើងទៅ ឬជិតស្មើនឹង១ភាគ៤នៃប្រជាជនសរុបជាង ២១លាននាក់ដែលរស់នៅក្នុងរដ្ឋធានីមួយនេះ។

Beijing Daily បានបន្ថែមថារដ្ឋាភិបាលកំពុងបង្កើនការគាំទ្រដល់ប្រជាជនមានវ័យចំណាស់ ក្នុងនោះរួមមានការដំឡើងប្រាក់សោធននិវត្តន៍ជាដើម។

គួរបញ្ជាក់ថា ចំនួនប្រជាជនចិនត្រូវបានរាយការណ៍ថាបានធ្លាក់ចុះចាប់តាំងពីឆ្នាំ២០២២ ខណៈអត្រាមនុស្សចាស់បានកើនឡើង ដែលនេះបាន និងកំពុងបង្កភាពស្មុគស្មាញដល់ផែនការរបស់រដ្ឋាភិបាល ក្នុងការជំរុញការប្រើប្រាស់ក្នុងស្រុក និងគ្រប់គ្រងបំណុល ខណៈមនុស្សរាប់លាននាក់គ្រោងនឹងត្រូវចូលនិវត្តន៍ក្នុងគ្រាដែលកញ្ចប់ថវិកាសោធននិវត្តន៍កំពុងស្ថិតនៅក្រោមសម្ពាធរួចទៅហើយ។ ក្រុមអ្នកជំនាញខាងប្រជាសាស្ត្រ និងសេដ្ឋកិច្ចបានអះអាងថាអត្រាកំណើត ឬការមានកូនតិចក្នុងពេលបច្ចុប្បន្នអាចនឹងធ្វើឱ្យចំនួនសមាជិកគ្រួសារថយចុះដែលនេះនឹងធ្វើឱ្យកំណើនការប្រើប្រាស់មានការយឺតយ៉ាវ៕