(ព្រុចសែល)៖ អង្គការណាតូ (NATO) កាលពីថ្ងៃអង្គារសប្តាហ៍នេះ បានប្រកាសថានឹងបញ្ជូនយន្តហោះល្បាតដែនសមុទ្រ ប្រព័ន្ធរ៉ាដា និងដ្រូនបន្ថែមទៀតទៅកាន់សមុទ្រខ្មៅ ខណៈដែលការសម្រេចចិត្តនេះកើតមានឡើងក្រោយការវាយប្រហារជាបន្តបន្ទាប់ បង្កឱ្យមនុស្សស្លាប់ និងប៉ះពាល់ដល់នាវាចរណ៍នៅក្នុងតំបន់នោះ។ នេះបើយោងតាមការចេញផ្សាយដោយទីភ្នាក់ងារព័ត៌មាន Reuters នាថ្ងៃពុធ ទី២១ ខែតុលា ឆ្នាំ២០២៦។

សេចក្តីប្រកាសនេះបានធ្វើឡើង បន្ទាប់ពីក្រុមប្រឹក្សាអាត្លង់ទិកខាងជើង (North Atlantic Council) ដែលជាស្ថាប័នសម្រេចចិត្តរបស់ NATO បានពិភាក្សាអំពីសន្តិសុខតំបន់សមុទ្រខ្មៅ នៅឯទីស្នាក់ការកណ្តាលក្នុងទីក្រុងព្រុចសែល។ អ្នកនាំពាក្យយោធាមួយរូបរបស់ NATO លោក Martin L. O'Donnell បានឱ្យដឹងថា បន្ថែមលើយន្តហោះចម្បាំង ដ្រូន ប្រព័ន្ធរ៉ាដា សមាជិក NATO បាន ឬនឹងបញ្ជូនភ្នាក់ងារស៉ើបការណ៍សម្ងាត់ ក៏ដូចជាក្រុមការងារនានា ឱ្យទៅវិភាគតាមបែបវិទ្យាសាស្ត្រកោសល្យវិច័យលើគ្រឿងផ្ទុះ។

កាលពីសប្តាហ៍មុន សមាជិកនាវិក ៧នាក់បានបាត់ខ្លួន បន្ទាប់ពីដ្រូនវាយប្រហារនាវាដឹកសារធាតុគីមី ២គ្រឿង ក្បែរឆ្នេរប្រទេសរូម៉ានីក្នុងតំបន់សមុទ្រខ្មៅ បណ្តាលឱ្យឆេះ និងបង្កជាក្តីបារម្ភថ្មីៗអំពីបញ្ហាសន្តិសុខ នៅតាមបណ្តោយផ្លូវដឹកជញ្ជូនតាមសមុទ្រដ៏សំខាន់មួយ ដែលអ៊ុយក្រែនកំពុងប្រើប្រាស់។ តាមសេចក្តីរាយការណ៍ យ៉ាងហោចណាស់នាវាចំនួន ៥គ្រឿងរងការវាយប្រហារនៅក្បែរឆ្នេរប្រទេសរូម៉ានី និងប្រទេសជិតខាងដែលជាសមាជិក NATO គឺប៊ុលហ្ការី ដោយសមាជិកនាវិក ២៣នាក់ត្រូវបានរាយការណ៍ថាស្លាប់ ឬបាត់ខ្លួន។

NATO មិនបានចោទប្រកាន់ប្រទេសណាមួយ​ទេ ជុំវិញអ្នកនៅពីក្រោយការវាយប្រហារជាបន្តបន្ទាប់នាពេលថ្មីនេះ។ អ្នកវិភាគយោធាបានលើកឡើងថា ស្ទើរតែប្រាកដណាស់គឺរុស្ស៉ីជាអ្នកធ្វើការវាយប្រហារ ប៉ុន្តែទីក្រុងមូស្គូបានបដិសេធប្រព្រឹត្តរាល់សកម្មភាពទាំងនោះ៕