(រ៉ូម)៖ កាលពីថ្ងៃអង្គារ ទី២០ ខែតុលា ឆ្នាំ២០២៦ ប្រទេសអ៉ីតាលីបានអនុម័តវិធានការសន្តិសុខតឹងរ៉ឹងជាងមុន ក្នុងនោះរួមមានទាំង បទល្មើសថ្មីសម្រាប់ការចូលរួមដោយហិង្សាក្នុងបាតុកម្ម ការដាក់ទោសទណ្ឌធ្ងន់ធ្ងរជាងមុនចំពោះអ្នកបង្កកុបកម្ម និងការតម្រូវឱ្យឪពុកម្ដាយទទួលខុសត្រូវផ្នែកហិរញ្ញវត្ថុ ចំពោះការខូចខាតដែលបង្កឡើងដោយកូនរបស់ពួកគេ ក្នុងអំពើបំផ្លិចបំផ្លាញទ្រព្យសម្បត្តិ និងការលួចប្លន់ទំនិញ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។។

ចំណាត់ការនេះ គឺបន្ទាប់ពីភាពចលាចលបានផ្ទុះឡើងនៅតាមបណ្តាទីក្រុង ភាគខាងជើងប្រទេសអ៉ីតាលី កាលពីចុងសប្តាហ៍មុន រួមទាំងទីក្រុង Milan ដែលជាមជ្ឈមណ្ឌលហិរញ្ញវត្ថុ។ នៅទីនោះ ក្រុមមនុស្សដែលភាគច្រើនជាយុវជន បានបង្កអំពើហិង្សា ដោយនាំគ្នាវាយបំបែកកញ្ចក់បង្អួច លួចគាស់យកទំនិញពីហាង និងវាយប្រហារលើប៉ូលិស។

ទន្ទឹមនឹងការប្រកាសរឹតបន្តឹងវិធានការសន្តិសុខ នាយករដ្ឋមន្ត្រីអ៉ីតាលី លោកស្រី Giorgia Meloni បានសរសេរនៅលើបណ្ដាញសង្គមដូច្នេះថា «ការបំផ្លិចបំផ្លាញទ្រព្យសម្បត្តិ និងការលួចប្លន់ មិនមែនជាអ្វីដែលបង្ហាញពីការបដិវត្តន៍នោះឡើយ។ ការបំផ្លិចបំផ្លាញនិងការលួចបន្ល់ មិនមែនជាការតវ៉ាទេ ប៉ុន្តែជាឧក្រិដ្ឋកម្ម»។

ក្រោមវិធានការថ្មីខាងលើ ដែលចូលជាធរមានភ្លាមៗ អ្នកដែលចូលរួមក្នុងក្រុមមនុស្សយ៉ាងហោច ៥នាក់ ហើយបង្កគ្រោះថ្នាក់ដល់ សុវត្ថិភាពសាធារណៈ ក្នុងអំឡុងបាតុកម្ម អាចប្រឈមនឹងការជាប់ពន្ធនាគាររហូតដល់៥ឆ្នាំ និងពិន័យជាប្រាក់អតិបរមា ២០ ០០០អឺរ៉ូ (២២ ៤៦០ដុល្លារអាមេរិក)។ ការដាក់ទោសនឹងកាន់តែធ្ងន់ធ្ងរ ប្រសិនបើជនល្មើសបិទបាំងមុខ ឬបណ្ដាលឱ្យមានអ្នករងរបួស។

សម្រាប់អាជ្ញាធរវិញ គឺត្រូវបានផ្ដល់សិទ្ធិអាចចេញបញ្ជាឱ្យមានការសងសំណងភ្លាមៗ ចំពោះការខូចខាតណាមួយដែលបានបង្កឡើង។ ក្នុងករណីជនបង្កជាអនីតិជន ឪពុកម្ដាយរបស់ពួកគេនឹងត្រូវទទួលខុសត្រូវចំពោះការខូចខាតទាំងនោះ។ ប៉ូលិសក៏នឹងត្រូវបានអនុញ្ញាត ឱ្យឃាត់ខ្លួនយុវជនអាយុចន្លោះពី១៤ឆ្នាំ ដល់ ១៧ឆ្នាំផងដែរ ទោះបីពួកគេមិនទាន់បានប្រព្រឹត្តបទល្មើសជាក់ស្តែងក៏ដោយ ប្រសិនបើមានភស្តុតាងបង្ហាញថា ពួកគេបង្កហានិភ័យ។ វិធានការនេះពង្រីកសិទ្ធិអំណាចដែលពីមុនមក អនុវត្តតែចំពោះមនុស្សពេញវ័យ ប៉ុណ្ណោះ។

លើសពីនេះ ស្របពេលអាជ្ញាធរបារម្ភថា អាចមានភាពចលាចលបន្ថែមទៀត ក្នុងបាតុកម្មដែលគ្រោងធ្វើឡើងនាថ្ងៃសៅរ៍សប្តាហ៍នេះ រដ្ឋាភិបាលបានប្រកាសថា នឹងដាក់ពង្រាយទាហាន ៥០០នាក់ឱ្យជួយប៉ូលិសនៅទីក្រុង Milan រហូតដល់ចុងឆ្នាំ២០២៦។ ក្រសួងការពារជាតិអ៉ីតាលី បាននិយាយថា កងទ័ពនឹងជួយពង្រឹងសន្តិសុខនៅតាមទីតាំងសំខាន់ៗ ហើយបង្កើនការឃ្លាំមើលស្ថានការណ៍នៅទូទាំងតំបន់។

គួរបញ្ជាក់ថា ភាពចលាចលនៅភាគខាងជើងប្រទេសអ៉ីតាលី គឺមានលក្ខណៈស្រដៀងនឹង កុបកម្មនៅប្រទេសក្បែរខាង គឺបារាំង ជាទីដែលមនុស្សរាប់សែននាក់ បាននាំគ្នាធ្វើសកម្មភាពតវ៉ា កាលពីថ្ងៃសៅរ៍ចុងសប្តាហ៍មុន ហើយផ្ទុះជាអំពើហិង្សាយ៉ាងកក្រើក៕