(ព្យុងយ៉ាង)៖ កូរ៉េខាងជើងបានប្រកាសថា ខ្លួនគ្រោងនឹងចាប់ផ្ដើមយុទ្ធនាការផ្សាយសារឃោសនាប្រឆាំងកូរ៉េខាងត្បូងជាថ្មីឡើងវិញ នៅតាមបណ្ដោយព្រំដែន ខណៈទីក្រុងសេអ៊ូល បានអំពាវនាវឱ្យពិភាក្សាគ្នា អំពីការបន្ធូរបន្ថយភាពតានតឹង។ នេះបើតាមការចេញផ្សាយ​ដោយទីភ្នាក់ងារព័ត៌មាន Reuters នៅថ្ងៃព្រហស្បតិ៍ ទី២១ ខែតុលា ឆ្នាំ២០២៦។

លោកស្រី Kim Yo Jong ដែលជាមន្ត្រីជាន់ខ្ពស់កូរ៉េខាងជើង និងជាប្អូនស្រីរបស់មេដឹកនាំកំពូល លោក គីម ជុងអ៊ុន បាននិយាយកាលពីថ្ងៃពុធថា កូរ៉េខាងជើង នឹងដាក់ពង្រាយឧបករណ៍បំពងសំឡេង នៅតាមបណ្ដោយព្រំដែនទាំងមូល បន្ទាប់ពីលោកស្រី បានចុះត្រួតពិនិត្យសំណង់ការពារ តាមចំណុចព្រំដែនកូរ៉េខាងត្បូង ជាមួយក្រុមមន្ត្រីយោធាជាន់ខ្ពស់កូរ៉េខាងជើង។

លោកស្រី Kim បានព្រមានទីក្រុងសេអ៊ូលថា នឹងប្រឈមមុខជាមួយ ស្ថានភាពដ៏គួរឱ្យភ័យខ្លាច និងឈឺចាប់បំផុត ប្រសិនបើកូរ៉េខាងត្បូង បន្តនូវអ្វីដែលទីក្រុងព្យុងយ៉ាងចាត់ទុកថា ជាការជ្រៀតជ្រែកកិច្ចការផ្ទៃក្នុងរបស់កូរ៉េខាងជើង។ រីឯក្នុងសេចក្ដីថ្លែងការណ៍នាថ្ងៃព្រហស្បតិ៍នេះ លោកស្រី Kim បាននិយាយថា កូរ៉េខាងជើងនឹងដាក់មធ្យោបាយតបតថ្ម ឱ្យស្ថិតក្នុងស្ថានភាពត្រៀមខ្លួន នៅតាមព្រំប្រទល់ ប៉ុន្តែមិនបានបញ្ជាក់លម្អិតទេ ហើយឧបករណ៍បំពងសំឡេង នឹងត្រូវដាក់ស្ថិតក្នុងស្ថានភាពត្រៀមដំណើរការ ក្នុងរយៈពេលប៉ុន្មានថ្ងៃខាងមុខ។

ហេតុការណ៍ផ្ទុះគ្រាប់មីន កាលពីខែមុន ដែលបានបណ្ដាលឱ្យទាហានកូរ៉េខាងត្បូង ៣នាក់រងរបួសនៅតំបន់ទ្រនាប់គ្មានយោធា (DMZ) រវាងប្រទេសទាំងពីរ បានធ្វើឱ្យភាពតានតឹងកាន់តែកើនឡើងខ្លាំង។ ទីក្រុងសេអ៊ូលបានចោទប្រកាន់កងទ័ពកូរ៉េខាងជើងថា បានដាក់មីនដោយចេតនានៅតំបន់ព្រំដែន ជាផ្នែកមួយនៃការងារពង្រឹងការការពាររបស់កូរ៉េខាងជើង។

លោកស្រី Kim បានបដិសេធការចោទប្រកាន់ ដោយហៅឧប្បត្តិហេតុនោះថា ជាការប្រឌិតរឿងរបស់កូរ៉េខាងត្បូង។ លោកស្រី ក៏បានចោទកងទ័ពកូរ៉េខាងត្បូងដែរថា បានផ្សាយសារព្រមានតាមឧបករណ៍បំពងសំឡេង និងបាញ់គ្រាប់ព្រមាននៅទីតាំងជាច្រើន ក្បែរព្រំដែន។ ខាងទីក្រុងសេអ៊ូលបាននិយាយថា ការបាញ់ព្រមាននេះគឺជា វិធានការស្របច្បាប់ និងការពារខ្លួន។

នាថ្ងៃព្រហស្បតិ៍នេះ អ្នកនាំពាក្យក្រសួងការពារជាតិកូរ៉េខាងត្បូង បាននិយាយថា ក្រសួងបានអំពាវនាវឱ្យកូរ៉េខាងជើង ពិភាក្សាអំពីវិធានការបន្ធូរបន្ថយភាពតានតឹងនៅតាមព្រំដែន និងទប់ស្កាត់ការប៉ះទង្គិចយោធាដោយចៃដន្យ។ ទីក្រុងព្យុងយ៉ាង បានផ្ដាច់ខ្សែទូរសព្ទទំនាក់ទំនងយោធាជាមួយកូរ៉េខាងត្បូង ចាប់តាំងពីប្រកាសថា ខ្លួននឹងលែងស្វែងរកកិច្ចសន្ទនា ឬការបង្រួបបង្រួម ជាមួយប្រទេសដែលខ្លួនហៅថា «សត្រូវ» ទៀតហើយ៕