(កៀវ)៖ មីស៉ីលរុស្ស៉ីជាច្រើនគ្រាប់បានធ្លាក់នៅទីក្រុងកៀវ នាថ្ងៃព្រហស្បតិ៍នេះ (ម៉ោងក្នុងតំបន់) ខណៈដែលអ៊ុយក្រែនបាញ់ដ្រូនរាប់រយគ្រឿងឆ្ពោះទៅទីក្រុងមូស្គូ កាលពីយប់មិញ អំឡុងពេលមានកិច្ចខិតខំប្រឹងប្រែងសម្របសម្រួលពីសំណាក់សហរដ្ឋអាមេរិកដើម្បីបញ្ចប់សង្គ្រាម។ នេះបើយោងតាមការចេញផ្សាយដោយទីភ្នាក់ងារព័ត៌មាន Reuters នៅថ្ងៃព្រហស្បតិ៍ ទី២២ ខែតុលា ឆ្នាំ២០២៦។

អាជ្ញាធរទីក្រុងកៀវនិយាយថា ការវាយប្រហាររបស់រុស្ស៉ីបណ្តាលឱ្យមនុស្ស ១៥នាក់របួស និងខូចខាតហេដ្ឋារចនាសម្ព័ន្ធផ្លូវរថភ្លើងក្រោមដី នៅប៉ែកខាងស្ពានភាគខាងត្បូងឆ្លងកាត់ទន្លេ Dnipro ក្នុងរដ្ឋធានីរបស់អ៊ុយក្រែន។ វាបានកើតមានឡើងបន្ទាប់ពីមានការវាយប្រហារមួយផ្សេង កាលពីថ្ងៃពុធ បណ្តាលឱ្យមនុស្ស ៦នាក់រងរបួស។ នៅឯតំបន់ Kharkiv ភាគឦសានអ៊ុយក្រែន លោកអភិបាល Oleh Syniehubov បានឱ្យដឹងថា ការវាយប្រហាររបស់រុស្ស៉ីសម្លាប់ស្ត្រីម្នាក់ និងបណ្តាលឱ្យមនុស្ស ៤នាក់រងរបួស។ ដោយឡែក ដ្រូនមួយគ្រឿងបានវាយប្រហារហេដ្ឋារចនាសម្ព័ន្ធថាមពល ក្នុងតំបន់ Kremenchuk ខេត្ត Poltava។

នៅក្នុងប្រទេសរុស្ស៉ី មនុស្ស ២នាក់បានរងរបួស ក្បែរទីក្រុងមូស្គូ បន្ទាប់ពីដ្រូន ៦៣០គ្រឿងត្រូវបានបាញ់ឆ្ពោះមកកាន់រដ្ឋធានីនេះ អំឡុងពេលយប់។ នេះបើតាមការបញ្ជាក់របស់អភិបាលក្រុង លោក Sergei Sobyanin នៅលើបណ្តាញតេឡេក្រាម ដោយបន្ថែមថា ដ្រូនភាគច្រើនត្រូវបានបាញ់ស្ទាក់ពីចម្ងាយឆ្ងាយ។ នៅទីក្រុង Lipetsk ដែលជាតំបន់រោងចក្រផលិតដែកថែបដ៏ធំ ចម្ងាយប្រហែល ៤០០គីឡូម៉ែត្រភាគខាងត្បូងទីក្រុងមូស្គូ បុរសម្នាក់បានរងរបួស បន្ទាប់ពីដ្រូនធ្លាក់ត្រូវអគារលំនៅដ្ឋាន និងមណ្ឌលសុខភាពមួយកន្លែង។ នេះបើតាមការបញ្ជាក់ពីអភិបាលក្រុង លោក Igor Artamonov តាមបណ្តាញតេឡេក្រាម។

សប្តាហ៍នេះ បេសកជនអាមេរិក លោក Steve Witkoff បានជួបប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី និងប្រធានាធិបតីរុស្ស៉ី លោក វ្ល៉ាឌីមៀ ពូទីន ដើម្បីសម្របសម្រួលឈានទៅបញ្ចប់សង្រ្គាម។ លោក ហ្សេឡេនស្គី និយាយថា អ៊ុយក្រែនគាំទ្រសំណើរបស់សហរដ្ឋអាមេរិក សម្រាប់ការចរចាត្រីភាគីរវាងអ៊ុយក្រែន រុស្ស៉ី សហរដ្ឋអាមេរិក កម្រិតក្រុមអ្នកចរចា ឱ្យបានឆាប់តាមដែលអាចធ្វើទៅបាន។ ចំណែក លោក ពូទីន បានយល់ព្រមបន្តការចរចាសន្តិភាពជាមួយទីក្រុងកៀវឡើងវិញ ដោយមានសហរដ្ឋអាមេរិកជាអ្នកសម្របសម្រួល ដែលអាចចាប់ផ្តើមនៅខែក្រោយ៕