(ប៉េកាំង)៖ ទីក្រុងប៉េកាំង និងទីក្រុងមូស្គូ បានរិះគន់យ៉ាងខ្លាំងជុំវិញការជ្រៀតជ្រែកពីខាងក្រៅចំពោះតំបន់អឺរ៉ាស៉ី នៅក្នុងសេចក្តីថ្លែងការណ៍រួមមួយ អំឡុងដំណើរទស្សនកិច្ចរបស់នាយករដ្ឋមន្ត្រីចិន លោក Li Qiang ទៅកាន់ប្រទេសរុស្ស៉ី ជាទីដែលលោកបានជួបប្រធានាធិបតី លោក វ្ល៉ាឌីមៀ ពូទីន និងនាយករដ្ឋមន្ត្រី លោក Mikhail Mishustin។ នេះបើយោងតាមការចេញផ្សាយដោយទីភ្នាក់ងារព័ត៌មាន AFP នៅថ្ងៃព្រហស្បតិ៍ ទី២២ ខែតុលា ឆ្នាំ២០២៦។

សេចក្តីថ្លែងការណ៍រួមចេញផ្សាយលើ សារព័ត៌មានចិន Xinhua បានឱ្យដឹងថា ភាគីទាំងពីរថ្កោលទោសយ៉ាងម៉ឺងម៉ាត់ ចំពោះរាល់ទង្វើបង្ខិតបង្ខំពីខាងក្រៅ ដែលពាក់ព័ន្ធការប្រើប្រាស់កម្លាំង ក្នុងបំណងរំខានដល់ដំណើរសាមគ្គីភាពអឺរ៉ាស៉ី។ សេចក្តីថ្លែងការណ៍ដដែលក៏បានឱ្យដឹងថា ភាគីទាំងពីរនឹងបន្តគាំទ្រគ្នាទៅវិញទៅមក លើបញ្ហាដែលពាក់ព័ន្ធផលប្រយោជន៍ស្នូល និងកង្វល់សំខាន់ៗរបស់គ្នាទៅវិញទៅមក ហើយចិនគាំទ្ររុស្ស៉ី ក្នុងកិច្ចការពារសន្តិសុខ ស្ថិរភាព ឯកភាពជាតិ ព្រមទាំងប្រឆាំងការជ្រៀតជ្រែកពីកម្លាំងខាងក្រៅចូលក្នុងកិច្ចការផ្ទៃក្នុងរុស្ស៉ី។

សេចក្តីថ្លែងការណ៍នោះ មិនបានលើកឡើងអំពីលទ្ធភាពនៃជំនួបរវាង លោក ពូទីន ជាមួយប្រធានាធិបតីចិន ស៉ី ជីនពីង និងប្រធានាធិបតីអាមេរិក ដូណាល់ ត្រាំ ឡើយ តែបើតាមលោក Yuri Ushakov ជំនួយការវិមានក្រឹមឡាំង ជំនួបមួយ រវាងមេដឹកនាំនៃប្រទេសចិន រុស្ស៉ី និងសហរដ្ឋអាមេរិក ដែលអាចជាជំនួបលើកដំបូងបំផុតនោះកំពុងស្ថិតក្នុងការរៀបចំ ហើយមានបំណងបញ្ចូល ទៅក្នុងកម្មវិធីនៃកិច្ចប្រជុំកំពូលអាស៉ី ប៉ាស៊ីហ្វិក ប្រារព្ធឡើងនៅទីក្រុង Shenzhen ប្រទេសចិន នាខែក្រោយ៕