(បាងកក)៖ លោក គីម អារីស (Kim Aris) កូនប្រុសរបស់អតីតមេដឹកនាំមីយ៉ាន់ម៉ា លោកស្រី អ៊ុងសាន ស៊ូជី បានឱ្យដឹងនៅថ្ងៃព្រហស្បតិ៍នេះថា លោកបាននិយាយទូរសព្ទដោយផ្ទាល់ជាមួយម្តាយវ័យ ៨១ឆ្នាំជាលើកដំបូងក្នុងរយៈពេលជាង ៥ឆ្នាំ តាមរយៈស្ថានទូតមីយ៉ាន់ម៉ាប្រចាំទីក្រុងឡុងដ៍ ខណៈលោកស្រីកំពុងជាប់ឃុំក្នុងផ្ទះនៅឡើយ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃព្រហស្បតិ៍ ទី២២ ខែតុលា ឆ្នាំ២០២៦។

ក្នុងសេចក្តីថ្លែងការណ៍ លោក អារីស បានបញ្ជាក់ថា៖ «ការបានឮសំឡេងម្តាយខ្ញុំម្តងទៀត មានអត្ថន័យធំធេងមិនអាចពណ៌នាជាពាក្យសម្តីបានឡើយ ប៉ុន្តែការសន្ទនាតែមួយលើកនេះ មិនអាចជំនួសពេលវេលាជាច្រើនឆ្នាំដែលបាត់បង់ ឬសិទ្ធិសេរីភាពដែលគាត់នៅតែត្រូវគេដកហូតដោយអយុត្តិធម៌នោះទេ»។ លោកបានទាមទារឱ្យអាជ្ញាធរធានាសិទ្ធិទាក់ទងគ្រួសារជាទៀងទាត់ ផ្តល់ការព្យាបាលសុខភាពដោយឯករាជ្យ និងដោះលែងម្តាយរបស់លោក រួមទាំងអ្នកទោសនយោបាយទាំងអស់ជាបន្ទាន់ដោយឥតលក្ខខណ្ឌ។

គួរបញ្ជាក់ថា ម្ចាស់ពានរង្វាន់ណូបែលសន្តិភាពរូបនេះ ត្រូវយោធាចាប់ឃុំខ្លួនតាំងពីរដ្ឋប្រហារខែកុម្ភៈ ឆ្នាំ២០២១ និងកំពុងអនុវត្តទោសពន្ធនាគារ ១៨ឆ្នាំ ក្រោមបទចោទប្រកាន់ជាច្រើនករណីដែលលោកស្រីបដិសេធទាំងស្រុង។ អាជ្ញាធរទើបតែប្តូរលោកស្រីមកឃុំខ្លួនក្នុងផ្ទះកាលពីខែមេសា ក្រោយការបោះឆ្នោតរៀបចំដោយយោធាបានលើកបន្តុបមេដឹកនាំរដ្ឋប្រហារ លោក មីន អ៊ុងឡាំង (Min Aung Hlaing) ជាប្រធានាធិបតី ហើយកាលពីថ្ងៃចន្ទដើមសប្តាហ៍នេះ រដ្ឋាភិបាលគាំទ្រដោយយោធាក៏បានបញ្ចេញរូបថតដ៏កម្រ បង្ហាញពីសកម្មភាពមន្ត្រីយកសៀវភៅ និងលិខិតរបស់ព្រះមហាក្សត្រអង់គ្លេស ឆាលស៍ (King Charles) ទៅប្រគល់ជូនលោកស្រីផងដែរ៕