(ហ្សេរុយសាឡិម)៖ នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) កំពុងរងការរិះគន់យ៉ាងខ្លាំងពីសំណាក់ក្រុមអ្នកសេដ្ឋកិច្ច និងគូប្រជែងនយោបាយ បន្ទាប់ពីលោកបានលើកឡើងថា អ៊ីស្រាអែលអាចប្រើប្រាស់រូបិយប័ណ្ណឌីជីថលគ្រីបតូ (Cryptocurrency) ដើម្បីជួយការពារសេដ្ឋកិច្ចរបស់ខ្លួនពីការដាក់ទណ្ឌកម្មអន្តរជាតិនានា។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអាទិត្យ ទី២៥ ខែតុលា ឆ្នាំ២០២៦។

ក្នុងបទសម្ភាសន៍ជាមួយទូរទស្សន៍អ៊ីស្រាអែល Channel 10 កាលពីថ្ងៃសុក្រ លោក ណេតាន់យ៉ាហ៊ូ បានបញ្ជាក់ថា លោកកំពុងត្រៀមលក្ខណៈសម្រាប់សេណារីយ៉ូដែលអ៊ីស្រាអែលរងការដាក់ទណ្ឌកម្មកាន់តែទូលំទូលាយ រួមទាំងទណ្ឌកម្មលើប្រព័ន្ធធនាគារ ដោយត្រូវរៀបចំប្រព័ន្ធសេដ្ឋកិច្ចជំនួសតាមរយៈរូបិយប័ណ្ណគ្រីបតូ និងបច្ចេកវិទ្យា Blockchain។ ការលើកឡើងនេះបានជំរុញឱ្យធនាគារកណ្តាលអ៊ីស្រាអែល (Bank of Israel) ចេញសេចក្តីថ្លែងការណ៍រិះគន់ដ៏កម្រមួយ ដោយសង្កត់ធ្ងន់ថា រូបិយប័ណ្ណគ្រីបតូមិនអាចប្រើជាមធ្យោបាយដើម្បីគេចវេះពីទណ្ឌកម្មបានឡើយ ហើយមេដឹកនាំនយោបាយគួរតែផ្តោតលើការអនុវត្តគោលនយោបាយថែរក្សាទំនាក់ទំនងសេដ្ឋកិច្ចជាមួយដៃគូពាណិជ្ជកម្មសំខាន់ៗ ដើម្បីទប់ស្កាត់កុំឱ្យមានការដាក់ទណ្ឌកម្ម និងផលប៉ះពាល់អវិជ្ជមានមកលើសេដ្ឋកិច្ចជាតិ។

គួរបញ្ជាក់ថា ភាពឯកោផ្នែកការទូតរបស់អ៊ីស្រាអែលក្នុងចំណោមសម្ព័ន្ធមិត្តប្រពៃណីមួយចំនួនបានកើនឡើងគួរឱ្យកត់សម្គាល់ បន្ទាប់ពីចក្រភពអង់គ្លេស បារាំង និងកាណាដា បានប្រកាសកាលពីខែមុនថានឹងបិទការនាំចូលទំនិញពីតំបន់តាំងទីលំនៅរបស់អ៊ីស្រាអែលក្នុងតំបន់ West Bank។ ទោះបីរងការរិះគន់ក៏ដោយ នៅថ្ងៃអាទិត្យនេះ លោក ណេតាន់យ៉ាហ៊ូ នៅតែបន្តការពារស្នាដៃដឹកនាំរបស់ខ្លួន ព្រមទាំងអះអាងថារូបលោក និងប្រធានាធិបតីអាមេរិក លោក ដូណាល់ ត្រាំ នៅសល់ពេលពីរឆ្នាំទៀតដើម្បីធ្វើការរួមគ្នាក្នុងការផ្តួលរំលំរបបដឹកនាំអ៊ីរ៉ង់៕