(រីយ៉ាដ)៖ ក្រុមចម្រុះយោធាដឹកនាំដោយអារ៉ាប៊ីសាអូឌីត បានប្រកាសនាថ្ងៃចន្ទ ទី២៦ ខែតុលានេះ ថាខ្លួនបានស្ទាក់ចាប់មីស៉ីលបាលីស្ទីគ ដែលបាញ់ចេញដោយក្រុមហ៊ូទីរបស់យេម៉ែន បន្ទាប់ពីក្រុមគាំទ្រដោយអ៉ីរ៉ង់នេះ អះអាងពីការវាយប្រហារថ្មីលើអាកាសយានដ្ឋានអន្តរជាតិ ក្នុងទីក្រុងរីយ៉ាដ។ នេះបើយោងតាមការចេញផ្សាយដោយទីភ្នាក់ងារព័ត៌មាន AFP។

អ្នកនាំពាក្យនៃក្រុមចម្រុះ លោក Turki Al-Malki និយាយថា ប្រព័ន្ធការពារដែនអាកាសបានស្ទាក់ចាប់ និងបំផ្លាញមីស៉ីលបាលីស្ទីគមួយគ្រាប់ ដែលក្រុមហ៊ូទីបាញ់សំដៅមកទីក្រុងរីយ៉ាដ ព្រមទាំងបានបំផ្លាញទីតាំងបាញ់មីស៉ីលផ្លោង ២កន្លែង នៅក្នុងរដ្ឋធានី Sanaa ប្រទេសយេម៉ែន។ ចំណែក លោក Yahya Saree អ្នកនាំពាក្យយោធាហ៊ូទី បាននិយាយថា ក្រុមរបស់ខ្លួនបានវាយប្រហារដោយជោគជ័យ លើអាកាសយានដ្ឋានមួយដោយប្រើមីស៉ីលបាលីស្ទីគ និងបានវាយប្រហារស្ថានីយបូមប្រេងដោយប្រើដ្រូន។

ការវាយប្រហារនេះកើតមានឡើង បន្ទាប់ពីអារ៉ាប៊ីសាអូឌីតប្រកាសបើកដំណើរការជើងហោះហើរឡើងវិញ។ ការបិទអាកាសយានដ្ឋាន គឺជាផលប៉ះពាល់យ៉ាងធ្ងន់ធ្ងរសម្រាប់អារ៉ាប៊ីសាអូឌីត ដោយបង្ខំឱ្យមានការពន្យារពេលសន្និសីទវិនិយោគដ៏សំខាន់បំផុត រហូតដល់ឆ្នាំ ២០២៧ និងបានរំខានដល់ផែនការធ្វើដំណើររបស់អ្នកដំណើររាប់ពាន់នាក់៕