(វ៉ាស៊ីនតោន)៖ ទីបញ្ជាការយោធាអាមេរិក CENTCOM កាលពីថ្ងៃអាទិត្យ ទី២៥ ខែតុលា ឆ្នាំ២០២៦ បាននិយាយថា ខ្លួនបានជួយបណ្តាប្រទេសនៅតំបន់ឈូងសមុទ្រ នាំចេញប្រេងចំនួន ១,៥ពាន់លានបារ៉ែល តាមច្រកសមុទ្រ Hormuz គិតចាប់តាំងពីរដូវក្តៅ ឆ្លងកាត់ការបិទខ្ទប់របស់អ៉ីរ៉ង់។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

CENTCOM បានអះអាងក្នុងសេចក្តីថ្លែងការណ៍ដូច្នេះថា «កងកម្លាំងអាមេរិក សម្រេចបាននូវសមិទ្ធផលដ៏សំខាន់ ដោយបានជួយដៃគូក្នុងតំបន់ឈូងសមុទ្រអារ៉ាប់ នាំចេញប្រេងឆៅជាង១,៥ ពាន់លានបារ៉ែល ចាប់តាំងពីរដូវក្តៅមក។ កប៉ាល់ពាណិជ្ជកម្មជាង ៣០០០ គ្រឿងបានឆ្លងកាត់ច្រកសមុទ្រ Hormuz ដោយជោគជ័យ ដោយមានការគាំទ្រពីកងកម្លាំងរបស់ CENTCOM ក្នុងរយៈពេល៦ខែកន្លងមកនេះ»។ សេចក្តីថ្លែងការណ៍ ក៏បានបញ្ជាក់ថា «កប៉ាល់ជាង ៩៥ភាគរយ ដែលធ្វើដំណើរតាមច្រកសមុទ្រ Hormuz បានបើកឆ្លងកាត់ដោយសុវត្ថិភាព»។

យ៉ាងណាមិញ កាលពីសប្តាហ៍មុន កងកម្លាំងឆ្មាំបដិវត្តន៍អ៉ីរ៉ង់ IRGC បានរាយការណ៍ថា កប៉ាល់ពាណិជ្ជកម្មប៉ុន្មានគ្រឿង បានបើកបុកគ្រាប់មីន និងរងការវាយប្រហារ នៅឈូងសមុទ្រពែក្ស និងច្រកសមុទ្រ Hormuz។ អ៉ីរ៉ង់បានគ្រប់គ្រងច្រកផ្លូវទឹកដ៏សំខាន់នេះ ចាប់តាំងពីសង្គ្រាមនៅមជ្ឈិមបូព៌ាបានផ្ទុះឡើង ក្រោយការវាយប្រហាររបស់អាមេរិក និងអ៉ីស្រាអែល លើសាធារណរដ្ឋអ៉ីស្លាមមួយនេះ កាលពីថ្ងៃទី២៨ ខែកុម្ភៈ។ អ៉ីរ៉ង់បានទាមទារឱ្យកប៉ាល់នានាសុំការអនុញ្ញាតពីខ្លួន មុននឹងឆ្លងកាត់ច្រកសមុទ្រ Hormuz ដែលកាលពីមុនពេលមានជម្លោះ គឺជាកន្លែងដែលការផ្គត់ផ្គង់ប្រេងនិងឧស្ម័នប្រហែល ២០ភាគរយរបស់ពិភពលោក ឆ្លងកាត់។

រដ្ឋមន្ត្រីការបរទេសអាមេរិក លោក Marco Rubio បាននិយាយក្នុងខែតុលានេះថា អ៉ីរ៉ង់បានបាត់បង់ការគ្រប់គ្រងទាំងស្រុង លើច្រកសមុទ្រ Hormuz ហើយបានអះអាងថា សេដ្ឋកិច្ចរបស់ទីក្រុងតេហេរ៉ង់ កំពុងដាំក្បាលចុះខ្លាំងយ៉ាងគំហុក។ លោកបាននិយាយដូច្នេះថា «ច្រកសមុទ្រ Hormuz បានបើកដំណើរការឡើងវិញហើយ។ បច្ចុប្បន្ន បរិមាណប្រេងដែលហូរចេញពីតំបន់នេះ មានចំនួនស្ទើរតែស្មើនឹងមុនពេលជម្លោះចាប់ផ្តើម។ ដូច្នេះមានន័យថា ពួកគេបានបាត់បង់ការគ្រប់គ្រងទាំងស្រុងលើច្រកសមុទ្រនេះ»។

គួរបញ្ជាក់ថា យោងតាមទិន្នន័យពីក្រុមហ៊ុនតាមដានចរាចរណ៍ដែនសមុទ្រ Kpler ការនាំចេញប្រេងឆៅ បានត្រឡប់ទៅដល់ កម្រិតមុនសង្គ្រាមវិញ កាលពីក្នុងខែកញ្ញា ដោយមានប្រេងយ៉ាងហោច ១៦,៥លានបារ៉ែល ត្រូវបាននាំចេញពីតំបន់នេះ ដោយមិនរាប់បញ្ចូលប្រេងរបស់អ៉ីរ៉ង់៕