(ការ៉ាកាស)៖ មេដឹកនាំបក្សប្រឆាំង និងជាជ័យលាភីពានរង្វាន់ណូបែល លោកស្រី Maria Corina Machado បានបង្ហាញខ្លួនជាថ្មី នៅប្រទេសវ៉េណេស៊ុយអេឡា កាលពីថ្ងៃអាទិត្យ ទី២៥ ខែតុលា ឆ្នាំ២០២៥ ជាលើកដំបូងចាប់តាំងពីខែធ្នូ ឆ្នាំមុន ដោយត្រឡប់មកពីការនិរទេសខ្លួន ចំពេលដែលមន្ទិលសង្ស័យ អំពីអនាគតលទ្ធិប្រជាធិបតេយ្យរបស់ប្រទេសអាមេរិកឡាទីនមួយនេះ ក៏ដូចជាតួនាទីរបស់សហរដ្ឋអាមេរិក កំពុងកាន់តែរីកធំឡើង។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

នេះជាការបង្ហាញខ្លួនជាសាធារណៈលើកដំបូងរបស់លោកស្រី ចាប់តាំងពីយោធាអាមេរិក បានផ្ដួលរំលំអតីតប្រធានាធិបតីវ៉េណេស៊ុយអេឡា លោក Nicolas Maduro កាលពីខែមករា ហើយដាក់អនុប្រធានាធិបតីជំនួសបណ្ដោះអាសន្ន ដែលបានកាន់តំណែងហួសពីរយៈពេល ដែលត្រូវបានអនុញ្ញាតទៅហើយ។ លោកស្រី Machado បានមកដល់រដ្ឋធានីការ៉ាកាស កាលពីយប់ថ្ងៃអាទិត្យ ក្រោមការទទួលស្វាគមន៍ពីក្រុមអ្នកគាំទ្រយ៉ាងច្រើន។

ចាប់តាំងពីលោក Maduro ត្រូវបានទម្លាក់ចេញពីអំណាចមក ប្រទេសវ៉េណេស៊ុយអេឡា បានស្ថិតក្រោមការដឹកនាំរបស់ប្រធានាធិបតីស្ដីទី លោកស្រី Delcy Rodriguez ដែលជាសម្ព័ន្ធមិត្តយូរអង្វែងរបស់លោក Maduro ផ្ទាល់ និងទទួលបានការគាំទ្រពីរដ្ឋបាលប្រធានាធិបតីអាមេរិក លោក ដូណាល់ ត្រាំ ឱ្យឡើងកាន់តំណែងបន្ត។ ដំបូងឡើយ លោកស្រី Rodriguez ត្រូវកាន់តំណែងជាប្រធានាធិបតីស្ដីទី បានត្រឹមតែ៩០ថ្ងៃប៉ុណ្ណោះ ប៉ុន្តែមកទល់ពេលនេះ លោកស្រីនៅបន្តកាន់អំណាច ហើយមិនបានចាត់វិធានការណាមួយ ដើម្បីកំណត់ការបោះឆ្នោតថ្មីឡើយ។

លោកស្រី Machado ធ្លាប់ត្រូវបានឃាត់ខ្លួនមួយរយៈពេលខ្លី កាលពីក្នុងខែមករា ឆ្នាំ២០២៥ បន្ទាប់ពីការតវ៉ាប្រឆាំងនឹង ពិធីស្បថចូលកាន់តំណែងរបស់លោក Maduro ហើយលោកស្រី បានសំងំលាក់ខ្លួននៅក្នុងប្រទេសវ៉េណេស៊ុយអេឡា អស់រយៈពេល ១១ខែ។ ក្រោយពីចាកចេញពីប្រទេសដោយសម្ងាត់ លោកស្រីបានលេចមុខនៅប្រទេសន័រវែស កាលពីខែធ្នូ ឆ្នាំដដែលនោះ ជាទីដែលលោកស្រីទទួលបានពានរង្វាន់ណូបែលសន្តិភាព ដោយសារកិច្ចប្រឹងប្រែងតតាំងដោយសន្តិវិធីរបស់លោកស្រី ប្រឆាំងរដ្ឋាភិបាលរបស់លោក Maduro ដែលត្រូវបានចោទប្រកាន់ថា ជារបបផ្តាច់ការ។

គួរបញ្ជាក់ថា លោកស្រី Machado និងសម្ព័ន្ធមិត្តរបស់លោកស្រី បាននិងកំពុងទាមទារឱ្យមានការកំណត់ កាលបរិច្ឆេទបោះឆ្នោតប្រធានាធិបតីនៅប្រទេសវ៉េណេស៊ុយអេឡា ប៉ុន្តែមន្ត្រីអាមេរិកបានសង្កត់ធ្ងន់អាទិភាព លើការធ្វើឱ្យសេដ្ឋកិច្ចមានស្ថិរភាពជាមុនសិន៕