(កៀវ)៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី បាននិយាយថា ការព្រមានឱ្យដឹងជាមុនរបស់សហរដ្ឋអាមេរិក អំពីការវាយប្រហារដោយមីស៊ីលបាលិស្ទីគរបស់រុស្ស៊ី ដែលមានសារៈសំខាន់ជាខ្លាំង ចំពោះការការពារដែនអាកាសរបស់អ៊ុយក្រែន ត្រូវបានស្តារឡើងវិញទាំងស្រុងហើយ បន្ទាប់ពីមានបញ្ហានាពេលថ្មីៗនេះ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

ក្នុងបទសម្ភាសមួយជាមួយប្រព័ន្ធផ្សព្វផ្សាយក្នុងស្រុក TSN លោក ហ្សេលេនស្គី បាននិយាយថា សេវាអ៉ីនធឺណិតផ្កាយរណប Starshield របស់ក្រុមហ៊ុនអាមេរិក SpaceX បានដំណើរការក្នុងល្បឿនរហូតដល់ ៤២០គីឡូម៉ែត្រក្នុងមួយម៉ោង ចាប់តាំងពីថ្ងៃសៅរ៍ចុងសប្តាហ៍មុន បន្ទាប់ពីសេវានេះ ត្រូវបានកម្រិតល្បឿន នៅក្នុងខែតុលានេះ ចំពេលមានការដាក់សម្ពាធការទូតពីទីក្រុងវ៉ាស៊ីនតោនលើទីក្រុងកៀវ។ លោក ហ្សេលេនស្គី បាននិយាយថា លោកបានពិភាក្សាអំពីបញ្ហាទាំងពីរ ក្នុងជំនួបជាមួយបេសកជនពិសេសអាមេរិក លោក Steve Witkoff នៅទីក្រុង Oslo ប្រទេសន័រវែស កាលពីពេលថ្មីៗនេះ ហើយបានអះអាងថា ការផ្លាស់ប្តូរទាំងនេះថា ជាលទ្ធផលនៃជំនួបនោះ។

កន្លងមក សហរដ្ឋអាមេរិកបានដាក់សម្ពាធឱ្យអ៊ុយក្រែន ផ្អាកការវាយប្រហារលើរោងចក្រចម្រាញ់ប្រេងរបស់រុស្ស៊ី ដោយលើកហេតុផលថា ការវាយប្រហារទាំងនោះ បានរួមចំណែកធ្វើឱ្យតម្លៃថាមពលកើនឡើង។ បញ្ហាប្រេងឡើងថ្លៃ មានភាពរសើបជាខ្លាំងចំពោះរដ្ឋបាលលោក ដូណាល់ ត្រាំ ចំពេលដែលអាមេរិកកំពុងធ្វើសង្គ្រាមជាមួយអ៉ីរ៉ង់ និងការបោះឆ្នោតពាក់កណ្តាលអាណត្តិនៅខែវិច្ឆិកា។ លោក ហ្សេលេនស្គី បាននិយាយថា ដើម្បីឱ្យទីក្រុងកៀវបញ្ឈប់ការវាយប្រហារទាំងនេះ ទីក្រុងមូស្គូត្រូវតែបញ្ឈប់ការវាយប្រហាររបស់ខ្លួន លើហេដ្ឋារចនាសម្ព័ន្ធអគ្គិសនីរបស់អ៊ុយក្រែន ឬមួយក៏អាមេរិកត្រូវអនុញ្ញាតឱ្យប្រើប្រាស់បណ្តាញ Starshield នៅលើទឹកដីរុស្ស៊ី ដើម្បីរកឃើញទីតាំងបាញ់មីស៊ីលបាលិស្ទីគរបស់រុស្ស៊ី ឬផ្គត់ផ្គង់មីស៊ីល Patriot ដល់អ៊ុយក្រែន។

ដោយឡែក ពាក់ព័ន្ធនឹងកិច្ចចរចាបច្ចេកទេស ដែលគ្រោងធ្វើឡើងរវាងទីក្រុងកៀវ មូស្គូ និងវ៉ាស៊ីនតោន នៅខែវិច្ឆិកា លោក ហ្សេលេនស្គី បាននិយាយថា អ៊ុយក្រែន នឹងមិនពិភាក្សាអំពីការកំណត់ទំហំកងកម្លាំងប្រដាប់អាវុធរបស់ខ្លួន ឬការបង្ខំឱ្យប្រទេសនេះ រក្សាអព្យាក្រឹតភាពក្រោយសង្គ្រាមនោះទេ។ ទីក្រុងកៀវ បានព្យាយាមចូលជា សមាជិករបស់អង្គការណាតូជាយូរមកហើយ ទោះបីសមាជិកមួយចំនួន មានការស្ទាក់ស្ទើរក៏ដោយ។ លោក ហ្សេលេនស្គី ក៏បានជំរុញជាថ្មីឱ្យមានជំនួបត្រីភាគី ដែលមានអាមេរិកជាអ្នកសម្របសម្រួល រវាងលោក និងប្រធានាធិបតីរុស្ស៊ី លោក វ្ល៉ាឌីមៀ ពូទីន ផងដែរ។

មេដឹកនាំអ៊ុយក្រែនរូបនេះ បានលើកឡើងជាយូរមកហើយថា លោក ពូទីន គឺជាបុគ្គលតែម្នាក់គត់នៅក្នុងប្រទេសរុស្ស៊ី ដែលអាចធ្វើការសម្រេចចិត្តសំខាន់ៗ ដើម្បីបញ្ចប់សង្គ្រាម ឬបើកកិច្ចពិភាក្សាដែលអាចយកជាការបានអំពីបញ្ហាស្នូល ដូចជាអនាគតនៃទឹកដីអ៊ុយក្រែនជិត ២០ភាគរយ ដែលរុស្ស៊ីកំពុងកាន់កាប់ ជាដើម។ លោក ហ្សេលេនស្គី បានសង្កត់ធ្ងន់ដូច្នេះថា «បញ្ហាទឹកដីគឺជាបន្ទាត់ក្រហម ដែលអាចពិភាក្សាបានតែនៅកម្រិតមេដឹកនាំប៉ុណ្ណោះ»៕