(វ៉ាស៊ីនតោន)៖ មន្ទីរបញ្ចកោណ បានចាត់តាំងនាវាមុជទឹក USS Colorado ជានាវាមុជទឹកប្រយុទ្ធដើរដោយថាមពលនុយក្លេអ៊ែរដំបូង របស់សហរដ្ឋអាមេរិក ដែលនឹងចូលរួមក្នុងកងកម្លាំងនាវាមុជទឹក ដែលត្រូវឈរជើងឆ្លាស់វេនគ្នា នៅភាគខាងលិចប្រទេសអូស្ត្រាលី។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃអង្គារ ទី២៧ ខែតុលា ឆ្នាំ២០២៦។

នាថ្ងៃអង្គារនេះ ក្រុមមន្រ្តីបានឱ្យដឹងថា នាវាមុជទឹកថ្នាក់ Virginia-class ដែលមានប្រវែង ១១៥ម៉ែត្រ និងបំពាក់ដោយមីស៊ីលវាយប្រហារគោលដៅលើដីគោក ក៏ដូចជាមីស៉ីលរត់ក្រោមផ្ទៃទឹកទំនើបៗ នឹងធ្វើដំណើរទៅកាន់មូលដ្ឋានថ្មីនៅប្រទេសអូស្ត្រាលី អំឡុងចុងឆ្នាំ២០២៧។ ប្រទេសសម្ព័ន្ធភាព ​AUKUS បាននិយាយក្នុងសេចក្តីថ្លែងការណ៍រួមថា ការដាក់ពង្រាយនេះគឺជា «ជំហានដ៏សំខាន់មួយ» ក្នុងការពង្រឹងសមត្ថភាពរារាំងរួមគ្នារវាងសហរដ្ឋអាមេរិក អូស្ត្រាលី និងព្រីតថេន (ចក្រភពអង់គ្លេស) នៅតំបន់ប៉ាស៊ីហ្វិក ក្រោមកិច្ចព្រមព្រៀងការពារជាតិ AUKUS។

កិច្ចព្រមព្រៀងការពារជាតិខាងលើ ដែលត្រូវបានគេមើលឃើញថា ជាការឆ្លើយតបទៅនឹងការពង្រីកអំណាចយោធារបស់ចិនក្នុងតំបន់ មានគោលដៅផ្តល់ឱ្យកងទ័ពជើងទឹកអូស្ត្រាលី នូវកងនាវាមុជទឹកដើរដោយថាមពលនុយក្លេអ៊ែរ ដែលមានសមត្ថភាពលាក់ខ្លួនខ្ពស់ ព្រមទាំងពង្រីកកិច្ចសហប្រតិបត្តិការយោធារវាងប្រទេសសម្ព័ន្ធមិត្តទាំង៣។

ជាទូទៅ អូស្ត្រាលីមិនអនុញ្ញាតឱ្យមានមូលដ្ឋានយោធាបរទេសនៅលើទឹកដីរបស់ខ្លួនទេ ប៉ុន្តែបានបើកឱ្យកងម៉ារីនអាមេរិក អាចធ្វើសមយុទ្ធនៅទីក្រុង Darwin ភាគខាងជើងប្រទេស រយៈពេល៦ខែក្នុងមួយឆ្នាំ។ ក្រុមនាវាមុជទឹកដើរដោយថាមពលនុយក្លេអ៊ែរ ដែលប្តូរវេនគ្នាឈរជើងនេះ ត្រូវបានគេស្គាល់ថា Submarine Rotational Force-West នឹងត្រូវដាក់ឱ្យឈរជើង នៅមូលដ្ឋានទ័ពជើងទឹក HMAS Stirling ក្នុងរដ្ឋអូស្ត្រាលីខាងលិច។

មូលដ្ឋាននេះត្រូវបានគេរំពឹងថា នឹងអាចទទួលនាវាមុជទឹក ដែលមានសមត្ថភាពវាយប្រហារល្បឿនលឿន បានសរុប៥គ្រឿង ក្នុងនោះមាន៤គ្រឿងមកពីអាមេរិក និង១គ្រឿងមកពីព្រីតថេន ដែលនឹងមកឈរជើងប្តូរវេនគ្នា។ ប្រទេសទាំង៣ បាននិយាយថា មូលដ្ឋាននេះនឹងជួយឱ្យអូស្ត្រាលីត្រៀមខ្លួនសម្រាប់ការធ្វើប្រតិបត្តិការនិងថែទាំ កងនាវាមុជទឹកដើរដោយថាមពលនុយក្លេអ៊ែររបស់ខ្លួនផ្ទាល់ ហើយទន្ទឹមគ្នានោះគាំទ្រដល់ការដាក់ពង្រាយនិងការថែទាំ នៃនាវារបស់ប្រទេសជាសម្ព័ន្ធមិត្ត។

គួរបញ្ជាក់ថា កម្មវិធីនាវាមុជទឹក AUKUS គឺជាចំណុចស្នូលនៃយុទ្ធសាស្ត្រការពារជាតិរបស់អូស្ត្រាលី ហើយអាចចំណាយថវិការហូតដល់ ២៣៥ ពាន់លានដុល្លារអាមេរិក ក្នុងរយៈពេល៣០ឆ្នាំ បើតាមការព្យាករណ៍របស់រដ្ឋាភិបាល៕