(SAO PAULO)៖ សមាជិកព្រឹទ្ធសភាប្រេស៊ីល និងជាបេក្ខជនប្រធានាធិបតីចាញ់ឆ្នោត លោក Flavio Bolsonaro បានភៀសខ្លួនចេញពីប្រទេស ឆ្ពោះទៅកាន់សហរដ្ឋអាមេរិក បន្ទាប់ពីទទួលបរាជ័យក្នុងការបោះឆ្នោតប្រធានាធិបតីប្រេស៊ីលកាលពីថ្ងៃអាទិត្យសប្ដាហ៍មុន ខណៈក្រសួងការបរទេសអាមេរិកគ្រោងនឹងផ្ដល់ទិដ្ឋាការដល់រូបលោក និងក្រុមគ្រួសារ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

លោក Flavio ដែលមិនបានទទួលស្គាល់បរាជ័យនៅក្រោមថ្វីដៃប្រធានាធិបតីប្រេស៊ីលបច្ចុប្បន្ន លោក Luiz Inacio Lula da Silva បានភៀសខ្លួនចេញពីប្រេស៊ីល បន្ទាប់ពីរូបលោកបដិសេធអនុវត្តតាមតុលាការកំពូលប្រេស៊ីល ដែលបង្គាប់ឱ្យរូបលោកប្រគល់លិខិតឆ្លងដែនទៅឱ្យប៉ូលិសប្រេស៊ីល។ ការបង្គាប់របស់តុលាការកំពូលប្រេស៊ីលធ្វើឡើងក្នុងសំណុំរឿងដែលគេចោទប្រកាន់លោក Flavio ពីបទលាងលុយ ដែលលោកផ្ទាល់បានច្រានចោល។

ភ្លាមៗកន្លែងស្នាក់នៅរបស់លោក Flavio ភរិយា និងកូនស្រី ២នាក់របស់លោកមិនទាន់មានការបញ្ជាក់ឱ្យច្បាស់នៅឡើយទេ។ តែបើតាមប្រព័ន្ធផ្សព្វផ្សាយអាមេរិក លោក Flavio និងក្រុមគ្រួសារបានភៀសខ្លួនទៅដល់រដ្ឋ Florida ហើយ។ ដោយឡែក មន្ត្រីជាន់ខ្ពស់ម្នាក់នៃក្រសួងការបរទេសអាមេរិកក៏បានឱ្យដឹងដែរថាក្រសួងការបរទេសអាមេរិកនឹងចេញទិដ្ឋាកាឱ្យ លោក Flavio Bolsonaro និងគ្រួសារ ដើម្បីអនុញ្ញាត ឱ្យពួកគេចូលទៅកាន់សហរដ្ឋអាមេរិក។

ការនិរទេសខ្លួនឯងរបស់លោក Flavio Bolsonaro ត្រូវបានរំពឹងថានឹងបង្កភាពតានតឹងរវាងសហរដ្ឋអាមេរិក និងប្រេស៊ីល។ លោក Lula ធ្លាប់បានចោទប្រកាន់ទីក្រុងវ៉ាស៊ីនតោនថាបានគប់គិតជាមួយលោក Flavio ដើម្បីឱ្យកូនប្រុសរបស់អតីតប្រធានាធិបតីប្រេស៊ីលលោក Jair Bolsonaro រូបនេះឡើងកាន់អំណាច។ Reuters បានរាយការណ៍នៅមុនការបោះឆ្នោតកាលពីថ្ងៃអាទិត្យចុងសប្ដាហ៍កន្លងទៅថាក្រសួងការបរទេសអាមេរិកបានធ្វើយុទ្ធនាការមួយដើម្បីជួយរកសំឡេងឆ្នោតឱ្យលោក Flavio។

គួរបញ្ជាក់ថា លោកប្រធានាធិបតីអាមេរិក លោក ដូណាល់ ត្រាំ ធ្លាប់បានអះអាងថាឪពុករបស់លោក Flavio គឺអតីតប្រធានាធិបតីប្រេស៊ីល លោក Jair Bolsonaro ជាជនរងគ្រោះនៃការធ្វើទុកបុកម្នេញនយោបាយនៅប្រេស៊ីល។ លោក Jair Bolsonaro ក៏ធ្លាប់បានរត់ទៅកាន់សហរដ្ឋអាមេរិកផងដែរ បន្ទាប់ពីបដិសេធទទួលស្គាល់បរាជ័យក្រោមថ្វីដៃរបស់លោក Lula កាលពីឆ្នាំ២០២២ នៅក្រោមអាណត្តិរបស់អតីតប្រធានាធិបតីអាមេរិក លោក ចូ បៃដិន។ តែនៅចុងបញ្ចប់ លោក Bolsonaro បានសម្រេចចិត្តធ្វើមាតុភូមិវត្តន៍ទៅកាន់ប្រេស៊ីលវិញ និងត្រូវបានតុលាការផ្តន្ទាទោសដាក់ពន្ធនាគារ ២៧ឆ្នាំ ពីបទប៉ុនប៉ងធ្វើរដ្ឋប្រហារ បន្ទាប់ពីក្រុមអ្នកគាំទ្ររបស់លោកចូលអុកឡុក និងបំផ្លិចបំផ្លាញអគាររដ្ឋាភិបាលក្នុងទីក្រុងប្រាស៊ីលីយ៉ា៕