(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ បាននិយាយកាលពីថ្ងៃអង្គារ ទី២៧ ខែតុលា ឆ្នាំ២០២៦ ថា លោកនឹងគោរពលទ្ធផល នៃការបោះឆ្នោតសភាពាក់កណ្តាលអាណត្តិ ប្រសិនបើការបោះឆ្នោតប្រព្រឹត្តទៅ ដោយមានភាពស្មោះត្រង់។ ការលើកឡើងបែបនេះ ហាក់ដូចជាការប៉ុនប៉ងថ្មីមួយទៀត ដើម្បីបង្កឱ្យមានមន្ទិលសង្ស័យ មុនការបោះឆ្នោតដ៏សំខាន់របស់អាមេរិក នៅសប្តាហ៍ក្រោយ។ នេះបើតាមការចេញផ្សាយដោយ ទីភ្នាក់ងារព័ត៌មាន ​AFP។

លោក ត្រាំ បានបង្កើនការអះអាងគ្មានមូលដ្ឋានជាយូរមកហើយរបស់លោក អំពីការក្លែងបន្លំសន្លឹកឆ្នោតក្នុងទ្រង់ទ្រាយធំ ស្របពេលដែលការស្ទង់មតិបង្ហាញថា គណបក្សសាធារណរដ្ឋអាចបាត់បង់ការគ្រប់គ្រងសភា ក្នុងការបោះឆ្នោតនាថ្ងៃអង្គារសប្តាហ៍ខាងមុខ។ លោក ត្រាំ បានប្រាប់អ្នកសារព័ត៌មានដូច្នេះថា «ខ្ញុំនឹងគោរព ប្រសិនបើការបោះឆ្នោតមានភាពស្មោះត្រង់» នៅពេលត្រូវបានសួរថា តើរូបលោកនឹងគោរពលទ្ធផលបោះឆ្នោតពាក់កណ្តាលអាណត្តិដែរឬទេ អំឡុងពេលលោកធ្វើដំណើរទៅរដ្ឋតិចសាស់ ដើម្បីឃោសនាបោះឆ្នោត។

ប្រធានាធិបតីវ័យ ៨០ឆ្នាំរូបនេះ ក៏បានសន្យាដោយស្ទាក់ស្ទើរផងដែរថា លោកនឹងធ្វើការជាមួយគណបក្សប្រជាធិបតេយ្យ ដែលជាគូប្រជែង ប្រសិនបើគណបក្សសាធារណរដ្ឋ បាត់បង់ការគ្រប់គ្រងនៅសភាតំណាងរាស្ត្រ (រដ្ឋសភា) និងព្រឹទ្ធសភា។ គណបក្សសាធារណរដ្ឋ បារម្ភថា ខ្លួនអាចប្រឈមនឹងការដណ្តើមជ័យជម្នះភ្លូកទឹកភ្លូកដីពីសំណាក់បក្សប្រជាធិបេតយ្យ ក្នុងការបោះឆ្នោតសភាពាក់កណ្តាលអាណត្តិ ខណៈអ្នកបោះឆ្នោតទម្លាក់កំហុសលើបក្សនេះ ជុំវិញបញ្ហាអតិផរណាដែលកាន់តែធ្ងន់ធ្ងរ ដោយសារតម្លៃប្រេងហក់ឡើងខ្ពស់ ចាប់តាំងពីលោក ត្រាំ បង្កសង្គ្រាមប្រឆាំងប្រទេសអ៉ីរ៉ង់។

ក្នុងរយៈពេលមួយខែកន្លងមកនេះ លោក ត្រាំ បានខិតខំចូលរួមព្រឹត្តិការណ៍ជួបជុំឃោសនារកសំឡេងឆ្នោត ស្ទើរតែរៀងរាល់ថ្ងៃ នៅទូទាំងសហរដ្ឋអាមេរិក ដើម្បីជំរុញឱ្យអ្នកគាំទ្រចូលរួមបោះឆ្នោតកាន់តែច្រើន ជាពិសេសចលនាស្នូល MAGA របស់លោក។ លោកបានអះអាងថា មានតែរូបលោកម្នាក់គត់ ដែលអាចទប់ស្កាត់ភាពបរាជ័យបាន។ ដំណើរទស្សនកិច្ចលើកទី៣របស់លោក ត្រាំ ទៅកាន់រដ្ឋតិចសាស់ ក្នុងរយៈពេលត្រឹមមួយខែចុងក្រោយ សបញ្ជាក់ឱ្យឃើញពីការព្រួយបារម្ភនេះ ខណៈការស្ទង់មតិបង្ហាញថា ការប្រកួតប្រជែងដណ្តើមអាសនៈព្រឹទ្ធសភានៅរដ្ឋនេះ កំពុងមានភាពប្រកៀកប្រកិតគ្នាខ្លាំង ទោះបីជារដ្ឋតិចសាស់ គឺជាមូលដ្ឋានយ៉ាងរឹងមាំ របស់បក្សសាធារណរដ្ឋ អស់រយៈពេលជាង៣០ឆ្នាំក៏ដោយ។

គួរបញ្ជាក់ថា ក្នុងពេលប៉ុន្មានថ្ងៃថ្មីៗនេះ លោក ត្រាំ បានបង្កើនការចោទប្រកាន់អំពីការក្លែងបន្លំសន្លឹកឆ្នោត ដែលជាបញ្ហាមួយបានដក់ជាប់ នៅក្នុងចិត្តរបស់លោក ចាប់តាំងពីលោកចាញ់ការបោះឆ្នោតប្រធានាធិបតីអាមេរិក ឆ្នាំ២០២០មក។ បន្ទាប់ពីចាញ់លោក ចូ បៃដិន លោក ត្រាំ បានញុះញង់ក្រុមអ្នកតវ៉ា ដែលក្រោយមកបានវាយប្រហារវិមានសភាអាមេរិក កាលពីថ្ងៃទី៦ ខែមករា ឆ្នាំ២០២១ ក្នុងគោលបំណងរារាំងការទទួលស្គាល់ជាផ្លូវការ នូវលទ្ធផលបោះឆ្នោតចុងក្រោយ នាពេលនោះ។

បច្ចុប្បន្ន អ្នករិះគន់មួយចំនួនបារម្ភថា លោក ត្រាំ កំពុងរៀបចំផ្លូវ ដើម្បីប្រឆាំងនឹងលទ្ធផលបោះឆ្នោតសភាពាក់កណ្តាលអាណត្តិ ឬដើម្បីយកលេសប្រើប្រាស់អំណាចពិសេស ក្នុងទម្រង់ណាមួយ។ កាលពីថ្ងៃចន្ទដើមសប្តាហ៍នេះ លោកប្រធានាធិបតីអាមេរិក បានប្រកាសផ្តល់ប្រាក់រង្វាន់ចំនួន ១លានដុល្លារ ដល់អ្នកណាដែលមានព័ត៌មាន នាំទៅឈានដល់ការផ្តន្ទាទោសអ្នកប្រព្រឹត្ត អំពើក្លែងបន្លំសន្លឹកឆ្នោត៕