(សេអ៊ូល)៖ អាល្លឺម៉ង់ និងកូរ៉េខាងត្បូង បានដាក់ចេញនូវភាពជាដៃគូសន្តិសុខកម្រិតខ្ពស់នៅថ្ងៃព្រហស្បតិ៍នេះ ដោយលើកឡើងថាការកើនឡើងនៃកិច្ចសហប្រតិបត្តិការរវាងទីក្រុងមូស្គូ និងទីក្រុងព្យុងយ៉ាង បានបង្ហាញឱ្យឃើញថាសន្តិសុខរបស់ទ្វីបអឺរ៉ុប និងអាស៊ី កាន់តែមានការផ្សារភ្ជាប់គ្នាដោយមិនអាចកាត់ផ្តាច់បាន។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃព្រហស្បតិ៍ ទី២៩ ខែតុលា ឆ្នាំ២០២៦។

ក្នុងកិច្ចប្រជុំកំពូលនៅទីក្រុងសេអ៊ូល ប្រធានាធិបតីកូរ៉េខាងត្បូង លោក លី ចេម្យុង (Lee Jae-myung) បានឱ្យដឹងថា រដ្ឋាភិបាលទាំងពីរបានឯកភាពពង្រីកកិច្ចសហប្រតិបត្តិការលើវិស័យការពារជាតិ និងសន្តិសុខ ព្រមទាំងគ្រោងឈានទៅចុះកិច្ចព្រមព្រៀងស្តីពីការការពារព័ត៌មានសម្ងាត់យោធា ខណៈក្រុមហ៊ុនការពារជាតិកូរ៉េខាងត្បូងមានចំណាប់អារម្មណ៍យ៉ាងខ្លាំងក្នុងការបណ្តាក់ទុនរួមគ្នា និងអភិវឌ្ឍន៍គម្រោងរយៈពេលវែងជាមួយអាល្លឺម៉ង់។ ចំណែកអធិការបតីអាល្លឺម៉ង់ លោក ហ្វ្រីដ្រិច មឺស (Friedrich Merz) ដែលគ្រោងទៅទស្សនាតំបន់គ្មានយោធា (DMZ) នៅថ្ងៃសុក្រស្អែកនេះ បានគូសបញ្ជាក់ថា ការបញ្ជូនទាហានកូរ៉េខាងជើងទៅច្បាំងប្រឆាំងនឹងអ៊ុយក្រែន បានសបញ្ជាក់ថាជម្លោះលែងស្ថិតនៅត្រឹមតែតំបន់ណាមួយដាច់ដោយឡែកទៀតហើយ។

គួរបញ្ជាក់ថា តាមភ្នាក់ងារចារកម្មកូរ៉េខាងត្បូង ចាប់តាំងពីឆ្នាំ២០២៤ មក កូរ៉េខាងជើងបានបញ្ជូនទាហានជាង ១០,០០០នាក់ និងសព្វាវុធជាច្រើនទៅជួយរុស្ស៊ីក្នុងសង្គ្រាមអ៊ុយក្រែន ដែលធ្វើឱ្យលោកខាងលិចបារម្ភថាទីក្រុងព្យុងយ៉ាងអាចទទួលបានបច្ចេកវិទ្យាយោធាទំនើបៗជាថ្នូរមកវិញ។ កូរ៉េខាងត្បូងគឺជាគោលដៅចុងក្រោយនៃដំណើរទស្សនកិច្ចរយៈពេលមួយសប្តាហ៍របស់លោក មឺស នៅតំបន់អាស៊ី បន្ទាប់ពីប្រទេសសិង្ហបុរី និងជប៉ុន ក្នុងគោលបំណងពង្រឹងទំនាក់ទំនងការពារជាតិ និងជំរុញកិច្ចសហប្រតិបត្តិការសេដ្ឋកិច្ចឱ្យកាន់តែជិតស្និទ្ធ ដើម្បីទប់ទល់នឹងគោលនយោបាយពន្ធគយរបស់សហរដ្ឋអាមេរិក និងការពង្រីកឥទ្ធិពលឧស្សាហកម្មរបស់ប្រទេសចិន៕