(ហ្ស៊េរុយសាឡិម)៖ នាយករដ្ឋមន្ត្រីអ៊ីស្រាអែល លោក បេនយ៉ាមីន ណេតាន់យ៉ាហ៊ូ នៅថ្ងៃព្រហស្បតិ៍នេះ បានចោទគណបក្សអារ៉ាប់ថា ជ័យជម្នះដ៏ធំមិនធ្លាប់មានរបស់ពួកគេក្នុងការបោះឆ្នោតសប្តាហ៍នេះ គឺមួយផ្នែកដោយសារការបន្លំឆ្នោត ខណៈមេដឹកនាំអារ៉ាប់បានច្រានចោលការចោទនេះ ហើយចោទលោកវិញថាកំពុងញុះញង់។នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ការចោទប្រកាន់នេះ បង្ហាញពីការបង្កើនវោហារប្រឆាំងជនជាតិអារ៉ាប់របស់លោក ណេតាន់យ៉ាហ៊ូ និងដៃគូស្តាំនិយមជ្រុលរបស់លោក។ វាកើតឡើងបន្ទាប់ពីជនជាតិអារ៉ាប់បានចេញទៅបោះឆ្នោតយ៉ាងច្រើនកុះករកាលពីថ្ងៃអង្គារ ដែលធ្វើឱ្យទាំងលោក និងគូប្រជែងជនជាតិជ្វីហ្វសំខាន់ៗ មិនអាចឡើងកាន់អំណាចបានដោយងាយ។ ទោះជាយ៉ាងណា មន្ត្រីបោះឆ្នោតបានឱ្យដឹងថា ពួកគេកំពុងស៊ើបអង្កេតលើការចោទប្រកាន់ពីការបន្លំ តែភាពត្រឹមត្រូវនៃការបោះឆ្នោតមិន «រងការប៉ះពាល់ជាប្រព័ន្ធ» នោះទេ។

ក្រោយរាប់សន្លឹកឆ្នោតបានជិត៩៣ភាគរយ សម្ព័ន្ធគណបក្សរបស់លោក ណេតាន់យ៉ាហ៊ូ ទទួលបាន៥៣អាសនៈ នាំមុខបន្តិចលើសម្ព័ន្ធគណបក្សរបស់លោក Gadi Eisenkot ដែលទទួលបាន៤៨អាសនៈ ប៉ុន្តែគ្មានសម្ព័ន្ធណាមួយទទួលបានដល់៦១អាសនៈ ដែលជាចំនួនត្រូវការសម្រាប់បង្កើតរដ្ឋាភិបាលនោះទេ។ ចំណែកគណបក្សតំណាងជនជាតិអារ៉ាប់ ដែលមាន២១ភាគរយនៃប្រជាជន ត្រូវបានព្យាករថានឹងឈ្នះ១៩អាសនៈ ច្រើនជាងពេលណាៗទាំងអស់។ លទ្ធផលនេះធ្វើឱ្យលោក Eisenkot គ្មានផ្លូវឡើងកាន់អំណាចទេ បើគ្មានការគាំទ្រពីគណបក្សអារ៉ាប់ ទោះបីលោកបានបដិសេធជម្រើសនេះរហូតមកដល់ពេលនេះក៏ដោយ។

អ្នកវិភាគយល់ថា តាមរយៈការវាយប្រហារលើគណបក្សអារ៉ាប់ លោក ណេតាន់យ៉ាហ៊ូ អាចកំពុងព្យាយាមធ្វើឱ្យលោក Eisenkot មិនហ៊ានសូម្បីតែគិតដល់ការបង្កើតរដ្ឋាភិបាលភាគតិច ដោយពឹងលើការគាំទ្រពីគណបក្សអារ៉ាប់។ សាស្ត្រាចារ្យនយោបាយម្នាក់បានលើកឡើងថា គោលដៅរបស់លោក ណេតាន់យ៉ាហ៊ូ គឺ «ធ្វើឱ្យកិច្ចសហការអារ៉ាប់-ជ្វីហ្វណាមួយ បាត់បង់ភាពស្របច្បាប់»៕