(តូក្យូ)៖ ជប៉ុនកំពុងជំរុញក្រុមការងារចាត់វិធានការហិរញ្ញវត្ថុ (FATF) ដែលជាស្ថាប័នតាមដានឧក្រិដ្ឋកម្មហិរញ្ញវត្ថុសកល ឱ្យដកមីយ៉ាន់ម៉ាចេញពីបញ្ជីខ្មៅ ដើម្បីឱ្យការធ្វើជំនួញនៅទីនោះកាន់តែងាយស្រួល។ នេះជាសញ្ញាចុងក្រោយបង្អស់ ដែលបង្ហាញថាប្រទេសធំៗមួយចំនួនចង់នាំរដ្ឋាភិបាលមីយ៉ាន់ម៉ា ដែលគាំទ្រដោយយោធា ចេញពីភាពឯកោ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

មន្ត្រីជាន់ខ្ពស់រដ្ឋាភិបាលជប៉ុនម្នាក់ និងប្រភពម្នាក់ទៀតដែលដឹងរឿងនេះ បានឱ្យដឹងថា ជប៉ុនចង់ឱ្យ FATF លុបចោលតម្រូវការដែលឱ្យប្រទេសសមាជិកត្រួតពិនិត្យយ៉ាងតឹងរ៉ឹងលើប្រតិបត្តិការហិរញ្ញវត្ថុជាមួយមីយ៉ាន់ម៉ា។ តម្រូវការនេះមានគោលបំណងការពារការលាងលុយកខ្វក់ និងការផ្តល់ហិរញ្ញប្បទានដល់ភេរវកម្ម។ ប្រភពទីពីរក៏បានបន្ថែមថា យ៉ាងហោចណាស់មានប្រទេសធំមួយទៀតនៅអាស៊ី កំពុងជំរុញរឿងដដែលនេះ ប៉ុន្តែមិនទាន់ច្បាស់ថាការផ្លាស់ប្តូរនឹងកើតឡើងឆាប់ៗនោះទេ។

FATF មានសមាជិក៤០ ហើយនឹងបញ្ចប់កិច្ចប្រជុំពេញអង្គលើកទី៣ ដែលជាលើកចុងក្រោយសម្រាប់ឆ្នាំនេះ នៅទីក្រុងប៉ារីសនៅថ្ងៃសុក្រ ទី៣០ ខែតុលា ឆ្នាំ២០២៦នេះ។ អ្នកនាំពាក្យលេខាធិការដ្ឋាន FATF បានឱ្យដឹងថា ការផ្លាស់ប្តូរណាមួយលើបញ្ជីខ្មៅ នឹងត្រូវប្រកាសក្រោយកិច្ចប្រជុំបញ្ចប់។ បច្ចុប្បន្ន ក្រៅពីមីយ៉ាន់ម៉ា មានតែអ៊ីរ៉ង់ និងកូរ៉េខាងជើងប៉ុណ្ណោះ ដែលនៅក្នុងបញ្ជីខ្មៅនេះ។

គួររំលឹកថា FATF បានដាក់មីយ៉ាន់ម៉ាចូលក្នុងបញ្ជីខ្មៅកាលពីឆ្នាំ២០២២ ក្រោយរដ្ឋប្រហារយោធាឆ្នាំ២០២១ ដែលធ្វើឱ្យប្រទេសនេះធ្លាក់ចូលក្នុងភាពវឹកវរ និងសង្គ្រាមស៊ីវិល។ ភាពវឹកវរនេះបានជំរុញឱ្យមានការផលិត និងជួញដូរគ្រឿងញៀន ព្រមទាំងមជ្ឈមណ្ឌលបោកប្រាស់ខ្នាតធំនៅតំបន់ត្រីកោណមាស។ មជ្ឈមណ្ឌលខ្លះ ស្ថិតក្រោមការគ្រប់គ្រងរបស់កងជីវពលដែលនៅខាងរដ្ឋាភិបាល។ ទោះជាយ៉ាងណា រដ្ឋាភិបាលមីយ៉ាន់ម៉ាថា ខ្លួនកំពុងចូលរួមកិច្ចខិតខំពហុជាតិ ដើម្បីទប់ស្កាត់មជ្ឈមណ្ឌលបោកប្រាស់ ហើយការផលិត និងជួញដូរគ្រឿងញៀន គឺជាស្នាដៃរបស់ក្រុមប្រដាប់អាវុធ៕