(ដាក្កា)៖ ប្រទេសបង់ក្លាដែស បានកត់ត្រាពីការកើនឡើងនូវចំនួនអ្នកស្លាប់ដោយសារជំងឺគ្រុនឈាម ក្នុងឆ្នាំនេះគិតត្រឹមខែតុលា ខណៈដែលអ្នកជំនាញព្រមានថា ការផ្ទុះឡើងនេះទំនងជាមិនថមថយចុះគួរឱ្យកត់សម្គាល់ឡើយ នៅមុនខែធ្នូ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃសៅរ៍ ទី៣១ ខែតុលា ឆ្នាំ២០២៦។

យោងតាមទិន្នន័យរបស់ក្រសួងសុខាភិបាល គិតត្រឹមថ្ងៃទី៣០ ខែតុលា ឆ្នាំ២០២៦ ការផ្ទុះឡើងនៃជំងឺគ្រុនឈាមបណ្តាលឱ្យមនុស្ស ៤១៨នាក់ស្លាប់ និងមានអ្នកចូលសម្រាកព្យាបាលនៅមន្ទីរពេទ្យជាង ១៣៣ ០០០នាក់។ សម្រាប់តែខែតុលាតែមួយ មានអ្នកស្លាប់ចំនួន ១៧៣នាក់ ដែលចំនួននេះគឺលើសពីខែកញ្ញាដែលមានអ្នកស្លាប់ ១៤៨នាក់ ហើយធ្វើឱ្យខែតុលាក្លាយជាខែដែលមានអ្នកស្លាប់ច្រើនបំផុតក្នុងឆ្នាំ២០២៦ គិតរហូតមកទល់ពេលនេះ។

គ្រូពេទ្យបានឱ្យដឹងថា អ្នកជំងឺគ្រុនឈាមជាច្រើនសម្រេចចិត្តចូលសម្រាកព្យាបាលនៅមន្ទីរពេទ្យ លុះត្រាតែពួកគេជួបធ្លាក់ខ្លួនឈឺធ្ងន់រួចទៅហើយ។ លោក Mirza Golam Sarwar នាយកមន្ទីរពេទ្យរដ្ឋមួយក្នុងទីក្រុងដាក្កា និយាយថាមានអ្នកជំងឺគ្រុនឈាមចំនួន ២៧៩នាក់កំពុងទទួលការព្យាបាល ដោយក្នុងនោះអ្នកជំងឺថ្មី ៦៧នាក់បានចូលសម្រាកព្យាបាលក្នុងរយៈពេលតែមួយថ្ងៃប៉ុណ្ណោះ។

លោក ABM Abdullah ដែលជាអ្នកឯកទេសផ្នែកវេជ្ជសាស្ត្រ បានលើកឡើងថាការឆ្លងជំងឺដដែលៗ រួមទាំងការពន្យារពេលក្នុងការធ្វើរោគវិនិច្ឆ័យ និងការព្យាបាល គឺជាកត្តាដែលនាំឱ្យមានករណីធ្ងន់ធ្ងរ និងការស្លាប់។ អ្នកជំនាញផ្នែកសុខាភិបាល ព្រមានថា ការចរាចរនៃវីរុសគ្រុនឈាមទាំង ៤ប្រភេទ (serotypes) កំពុងបង្កើនហានិភ័យនៃការកើតជំងឺក្នុងកម្រិតធ្ងន់ធ្ងរ។ អ្នកដែលធ្លាប់ឆ្លងវីរុសប្រភេទមួយហើយ អាចនឹងឆ្លងវីរុសប្រភេទផ្សេងទៀតនៅពេលក្រោយ ដែលធ្វើឱ្យកើនឡើងនូវលទ្ធភាពនៃការវិវត្តទៅជាផលវិបាកធ្ងន់ធ្ងរ។

ប្រទេសបង់ក្លាដែស មិនទាន់មានការដាក់ឱ្យប្រើប្រាស់វ៉ាក់សាំងការពារជំងឺគ្រុនឈាមនៅឡើយទេ ខណៈអាជ្ញាធរកំពុងពិចារណាលើវិធានការនេះក្នុងរយៈពេលវែង៕